ភ្នំពេញ ៖ យោង​តាម​របាយការណ៍​របស់​សហ​ព័ន្ធ​ស្រូវ​អង្ករ​កម្ពុជាបានបង្ហាញថា​ ​ក្នុងរយៈពេល ៣ ​ខែ​ដំបូង​នៃ​ឆ្នាំ២០២៤នេះ​ ​កម្ពុជា​បាន​នាំចេញ​អង្ករ​ចំនួន​ ១​៦​៦​ ​៤​៥​១​ ​តោន​ទៅកាន់​ទី​ផ្សារ​អន្តរជាតិ​ ​ថយ​ចុះ​បន្តិច​ពី​ចំនួន​ ​១​៧​៦​ ៥​៨​១​ ​តោន​ក្នុងរយៈពេល​ដូចគ្នា​កាលពីឆ្នាំមុន​។​

​របាយការណ៍បានបង្ហាញថា ក្នុង​អំឡុង​ខែ​មករា​ដល់​ខែ​មីនា កម្ពុជា​រកចំណូល​បាន​ជាង​ ​១​២​៣​.​៦​ ​លាន​ដុល្លារ​ពី​ ​ធ្លាក់ចុះ​១​,​៩​ ​ភាគរយ​ ខណៈដែលរយៈពេលដូចគ្នាកាលពីឆ្នាំ២០២៣ មានទំហំ ​១​២​៦​លាន​ដុល្លារ​។​

អង្ករ​ដែល​បាន​នាំចេញ​រួម​មាន​ ​អង្ករ​ក្រអូប​ ​អង្ករ​ស​គ្រាប់​វែង​ ​អង្ករ​ចំហុយ​ ​និង​អង្ករ​សរីរាង្គ​ ​ដោយ​អង្ករ​ក្រអូប​បានរួមចំណែកដល់ការនាំចេញ​ចំនួនជាង ​៨​១​ ​ភាគរយ​នៃ​ការនាំចេញ​អង្ករ​សរុប​។​

​របាយការណ៍​នេះ​បាន​ឱ្យ​ដឹង​ទៀត​ថា​ ​អង្ករ​កម្ពុជា​ត្រូវ​បាន​នាំចេញ​ទៅកាន់​ប្រទេស​ ​និង​តំបន់​ចំនួន​៥​៦​ ​ជុំវិញ​ពិភពលោក​ ក្រោមការនាំចេញពី​ក្រុមហ៊ុនចំនួន​៤​៦​ ​ខណៈដែល​ប្រទេស​ទិញ​អង្ករ​សំខាន់​ៗ​របស់​កម្ពុជា​រួម​មាន​ សហភាព​អឺរ៉ុប​ ​ប្រទេស​ចិន​ ​និង​ប្រទេស​សមាជិក​អា​ស៊ាន​។​

​របាយការណ៍​បាន​បន្ត​ថា​ ​ប្រទេស​ចិន​នៅតែ​ជា​អ្នកទិញ​អង្ករ​នាំមុខ​គេ​របស់​កម្ពុជា​ ​ដោយ​បាន​ទិញ​អង្ករ​ចំនួន​ ​៤​៣​ ​០​៣​៩​ ​តោន​ ​ឬ​ ​២​៥​,​៨​ ​ភាគរយ​នៃ​ការនាំចេញ​អង្ករ​សរុប​របស់​កម្ពុជា​នៅ​ក្នុង​ត្រីមាស​ទីមួយ​។​ ​ទន្ទឹម​នឹង​នេះ​ ​កម្ពុជា​រកចំណូល​បាន​ប្រមាណ​ ​៦​០​០​ ​លាន​ដុល្លារ​ ​ពី​ការនាំចេញ​ស្រូវ​ប្រមាណ​ជាង​ ​២​,​២​២​ ​លាន​តោន​ ​ក្នុងរយៈពេល​បី​ខែ​។​

​សូមរំលឹកថា ក្នុង​ឆ្នាំ​២​០​២​៣​ ​កម្ពុជា​បាន​នាំចេញ​អង្ករ​ជាង​ ៦​៥​៦​ ០​០​០​តោន​ ​ដោយ​រកចំណូល​បាន​៤​៦​៦​លាន​ដុល្លារ​ ​កើន​ឡើង​៣​ភាគរយ​ក្នុង​បរិមាណ ​និង​១​៣​ភាគរយ​ជា​តម្លៃ​ធៀប​នឹង​ឆ្នាំ​២​០​២​២​។​ ជាមួយគ្នានេះ ​សហ​ព័ន្ធ​ស្រូវ​អង្ករ​កម្ពុជា​បាន​កំណត់​គោលដៅប្រកបដោយមហិច្ឆិតាក្នុងការនាំចេញ​​អង្ករ​ឱ្យ​បាន​យ៉ាងហោចណាស់​មួយលាន​តោន​នៅ​ឆ្នាំ​២​០​២​៥​។​

អនុប្រធានមន្ទីរកសិកម្ម រុក្ខាប្រមាញ់ និង នេសាទខេត្តបាត់ដំបង លោក អន សុវណ្ណមុន្នី បានឱ្យដឹងថា ឆ្នាំនេះប្រជាកសិករបានផុសផុលក្នុងការធ្វើស្រូវប្រាំង ដែលមានចំនួនរហូតដល់ ៦ម៉ឺន ៤៥៥៦ហិកតា ដោយសារតែនៅក្នុងឆ្នាំនេះ ស្រូវមានតម្លៃទីផ្សារល្អ តម្លៃស្រូវមានការកើនឡើងជាងឆ្នាំមុនៗ អាចលក់ចេញក្នុងតម្លៃចាប់ពី១,០០០ ទៅ១,៤០០រៀលក្នុង១គីឡូក្រាម ។ កត្តានេះ បានជំរុញឱ្យប្រជាកសិករព្យាយាមដាំដុះច្រើន ដែលក្នុងផែនការផលិតត្រឹមតែជាង២ម៉ឺនហិកតាប៉ុណ្ណោះ ប៉ុន្តែប្រជាកសិករផលិតដល់ជាង៦ម៉ឺនហិកតា លើសផែនការរហូតដល់ប្រមាណ៣០០ភាគរយ ខណៈដែលកាលពីឆ្នាំមុន កសិករដាំដុះត្រឹមតែប្រមាណជិត៤ម៉ឺនហិកតាប៉ុណ្ណោះ ។

សូមជម្រាបថា ក្រសួងកសិកម្ម រុក្ខាប្រមាញ់ និងនេសាទ បាន និងកំពុងធ្វើឱ្យប្រសើរឡើងនូវខ្សែចង្វាក់ផលិតកម្មស្រូវ-អង្ករ ក៏ដូចជាអភិវឌ្ឍនូវហេដ្ឋារចនាសម្ព័ន្ធគាំទ្រសំខាន់ៗសម្រាប់ការកែច្នៃ ការបង្កើនសេវាគាំទ្រ ការធ្វើឱ្យប្រសើរឡើងនូវខ្សែចង្វាក់ផលិតកម្មគ្រាប់ពូជ ការពង្រឹងសមត្ថភាពកសិករ សមាជិកសហគមន៍ វិស័យឯកជន តាមរយ:ការបណ្តុះបណ្តាល និងផ្សព្វផ្សាយបច្ចេកទេស ការងារស្រាវជ្រាវ ការអនុវត្តផលិតកម្មកសិកម្មតាមកិច្ចសន្យា ការអនុវត្ត CamGAP, GMP និងការអនុវត្តអនាម័យ និងភូតគាមអនាម័យក្នុងរោងម៉ាស៊ីនកិនស្រូវ ក៏ដូចជាការរៀបចំចងក្រងឯកសារបច្ចេកទេសដំណាំស្រូវ រួមទាំងការធ្វើទំនើបកម្មកសិកម្មជាដើម៕