បរទេស៖ យោងតាមប្រភពពី Inclusivebusiness.Net បានលើកឡើងថា ក្រុមហ៊ុន និងឧស្សាហកម្មជាច្រើននៅជុំវិញពិភពលោកកំពុងរួមចំណែកដល់ការកាត់បន្ថយបម្រែបម្រួលអាកាសធាតុ និងកាត់បន្ថយផលប៉ះពាល់អវិជ្ជមាននៃសកម្មភាពអាជីវកម្មលើបរិស្ថាន។ ដើម្បីសម្រេចបាននូវលទ្ធផលទាំងនេះ អាជីវកម្មក្នុងវិស័យឯកជន និងរដ្ឋាភិបាលនៃប្រទេសនីមួយៗ កំពុងធ្វើការរួមគ្នាដើម្បីបង្កើតគំនិតផ្តួចផ្តើម និងរិះរកវិធីដោះស្រាយក្នុងការជំរុញការប្រើប្រាស់ឲ្យកាន់តែមានផលិតភាព និងការពារបរិស្ថាន។

នៅក្នុងគោលដៅនេះ Burapha Agro-Forestry និង SilviCarbon កំពុងធ្វើការជាមួយរដ្ឋាភិបាល​ឡាវ​ក្នុង​ការ​បំប្លែង​ផ្ទៃដី​ដែល​មិន​បាន​ប្រើប្រាស់ និង​ខូចគុណភាព​ទៅ​ជា​ចម្ការ​ទ្រង់ទ្រាយ​ធំ ដែលជួយការពារជីវចម្រុះក្នុងតំបន់ បង្កើនគម្របដើមឈើ និងជួយកាត់បន្ថយការបំភាយកាបូន។ Burapha Agro-Forestry យកចិត្តទុកដាក់សំខាន់ទៅលើការដាំដើមប្រេងខ្យល់ និងអាកាស្យានៅប្រទេសឡាវតាំងពីឆ្នាំ ១៩៩៣ ហើយធ្វើការជាមួយក្រុមហ៊ុន SilviCarbon ដែលជាក្រុមហ៊ុនស៊ុយអែតចាំទិញចំការ និងប្រើប្រាស់គំនិតផ្តួចផ្តើមកាត់បន្ថយកាបូននៅជុំវិញពិភពលោក។ Burapha ទទួលបានប្រាក់ចំណូលពីការនាំចេញគ្រឿងសង្ហារឹម និងបន្ទះឈើ ព្រមទាំងទទួលបានជំនួយពីខាងក្រៅសម្រាប់គម្រោងផ្សេងៗផងដែរ។

បច្ចុប្បន្ននេះ Burapha ​កំពុងគ្រប់គ្រងលើ​ផ្ទៃដី​ចំនួន ៥ ៨៥៩ ហិកតា​នៃ​ចម្ការ ​៧៥ កន្លែងនៅ​ទូទាំង​ប្រទេសឡាវ។ ក្រុមហ៊ុននេះអនុវត្តគំរូអាជីវកម្មបរិយាបន្ន ដោយធ្វើការជាដៃគូជាមួយសហគមន៍មូលដ្ឋានជាង ៥៣ ភូមិក្នុងការដាំស្រូវ ការចិញ្ចឹមសត្វ និងផលិតផលមិនមែនជាឈើហ៊ុប។ Burapha ក៏មានរោងម៉ាស៊ីនផលិតក្តារបន្ទះដែលមានសមត្ថភាពផលិតប្រចាំឆ្នាំ ៥០ ០០០ ម៉ែត្រគូប និងរោងចក្រផលិតគ្រឿងសង្ហារិមដែលមានប្រភពឈើដោយផ្ទាល់ពីចម្ការរបស់ពួកគេ។ មិនត្រឹមតែប៉ុណ្ណោះ Burapha ត្រូវបានទទួលស្គាល់ដោយក្រុមប្រឹក្សាគ្រប់គ្រងព្រៃឈើ (FSC) សម្រាប់ខ្សែសង្វាក់នៃការគ្រប់គ្រងព្រៃឈើ ដែលមានន័យថាក្រុមហ៊ុននេះប្រើប្រាស់តែសម្ភារៈ ឬវត្ថុធាតុដើមដោយស្របច្បាប់ និងមានការទទួលខុសត្រូវក្នុងការថែរក្សាព្រៃឈើសម្រាប់ធនធានរបស់ខ្លួន។

ក្នុងរយៈពេលប៉ុន្មានឆ្នាំកន្លងមកនេះ អ្នកភូមិនៅក្នុងសហគមន៍បានចូលរួមនៅក្នុងដំណាក់កាលផ្សេងគ្នានៃការធ្វើចម្ការ ការរៀបចំដី ការគ្រប់គ្រងប្រតិបត្តិការ និងថែទាំចម្ការ។​ កាលពីឆ្នាំ ២០១៩ Burapha បានជួលកសិករចំនួន ៨៩១ នាក់ (៣១៧ នាក់ជាស្ត្រី) មកពី ៣៥ ភូមិ។ អ្នកភូមិទាំងនោះត្រូវបានបណ្តុះបណ្តាលក្នុងការគ្រប់គ្រងចំការ និងផ្នែកគ្រឿងចក្រ ឬឧបករណ៍ផ្សេងៗ។ ការចូលរួមរបស់អ្នកភូមិបានទទួលអត្ថប្រយោជន៍គួរឱ្យកត់សម្គាល់ជាពិសេសអ្នកចំណូលទាប ឬអ្នកក្រីក្រ (BoP)  និងជនជាតិភាគតិចផងដែរ។ ជាមួយនឹងដំណើរការនៃការទទួលបានដីដែលមិនប្រើប្រាស់ពីកសិករឲ្យប្រែក្លាយជាការដាំដើមឈើ Burapha ក៏កំពុងជួយកសិករក្នុងការទទួលសិទ្ធិកាន់កាប់ដីធ្លីរបស់ដូនតាពួកគេផងដែរ។ លើសពីនេះ Burapha ក៏បានបង្កើតមូលនិធិអភិវឌ្ឍន៍ភូមិសម្រាប់ការកែលម្អហេដ្ឋារចនាសម្ព័ន្ធ និងជំនួយគោលដៅសម្រាប់ភូមិជាដៃគូថែមទៀតផង ហើយថវិកាត្រូវបានប្រើប្រាស់ក្នុងការសង្គ្រោះគ្រោះមហន្តរាយ ការកែលម្អសាលារៀនក្នុងស្រុក ផ្ទះសម្បែង និងផ្លូវថ្នល់។

ក្រៅពីនេះ Burapha បាន​ចាប់​ដៃគូ​ជាមួយ​អង្គការ​ក្រៅ​រដ្ឋាភិបាល​ដើម្បី​ពង្រឹង​សមត្ថភាព​របស់​ពួកគេ​ក្នុង​នាម​ជា​អ្នក​ពឹងផ្អែកលើ​ព្រៃឈើ និងសហគ្រាសសហគមន៍។ មជ្ឈមណ្ឌលបណ្តុះបណ្តាលសហគមន៍ព្រៃឈើប្រចាំតំបន់អាស៊ី និងប៉ាស៊ីហ្វិក (RECOFTC) បានធ្វើវគ្គបណ្តុះបណ្តាលស្តីពីការធ្វើផែនការហិរញ្ញវត្ថុ ការស្រាវជ្រាវទីផ្សារ និងការអភិវឌ្ឍន៍ផលិតផលនៅក្នុងភូមិដែលជាដៃគូរបស់ Burapha ។

ទាក់ទងទៅនឹងការថែរក្សាបរិស្ថាន Burapha មានប្រព័ន្ធគ្រប់គ្រងបរិស្ថាន សង្គម និងសុវត្ថិភាពនៅនឹងកន្លែងស្របតាម​ស្តង់ដាររបស់ IFC។ Burapha កំណត់អត្តសញ្ញាណ និងយកចិត្តទុកដាក់សម្រាប់លើតំបន់គ្រប់គ្រងពិសេសដូចជា តំបន់រសើប ឬនៅជាប់នឹងចម្ការរបស់ពួកគេ។ មិនត្រឹមតែប៉ុណ្ណោះ ក្រុមហ៊ុនបានធ្វើការជាមួយអ្នកប្រឹក្សាមកពីប្រទេសអាល្លឺម៉ង់ ដើម្បីទទួលបានវិញ្ញាបនប័ត្រកាបូនសម្រាប់គម្រោងបន្ថយកាបូនរបស់ខ្លួន។ ក្នុងរយៈពេលប្រតិបត្តិការ ៧ ឆ្នាំដំបូង  Burapha ចាប់យកឧស្ម័នកាបូនិកពីបរិយាកាសប្រមាណជាង ៨៤ តោនក្នុងមួយហិកតា ហើយចាប់តាំងពីឆ្នាំ ២០១៨ ពួកគេបានចាប់យកឧស្ម័នកាបូនិក ២៥៩ ០០០ តោន ជាមួយនឹងដើមឈើចំនួន ៤,៤ លានដើម។ បន្ថែមពីនេះ Burapha គឺជាសមាជិកនៃក្រុម Lao Plantation Forests Products Group (LPFP) មានមូលដ្ឋាននៅប្រទេសឡាវ ដែលធ្វើការតស៊ូមតិសម្រាប់ការរីកចម្រើនប្រកបដោយនិរន្តរភាពនៃឧស្សាហកម្មឈើក្នុងស្រុក។ LPFP ធ្វើការលើគម្រោងពាក់ព័ន្ធ និងការផ្តួចផ្តើមគំនិតជាមួយរដ្ឋាភិបាលជាតិ និងអន្តរជាតិ ទីភ្នាក់ងារផ្តល់ជំនួយ រួមទាំងធនាគារពិភពលោកផងដែរ។

ទោះជាយ៉ាងណាក្តី Burapha បានជួបប្រទះបញ្ហាប្រឈមដ៏សំខាន់មួយគឺ ហានិភ័យខ្ពស់នៃអគ្គីភ័យនៅក្នុងចម្ការរបស់ពួកគេ។ ដើម្បីដោះស្រាយបញ្ហានេះ អ្នកភូមិត្រូវបានបណ្តុះបណ្តាលផ្នែកគ្រប់គ្រងគ្រោះថ្នាក់អគ្គីភ័យ និងផ្តល់ការលើកទឹកចិត្តដល់​កសិករ​កុំឲ្យ​​ដុត​ផ្ទះ​ចោល និង​ការទុកដាក់​សំរាម​ឲ្យ​បាន​ត្រឹមត្រូវជាពិសេសសំរាមងាយឆេះ ដូចជាបារី។ មួយវិញទៀត ក្រុមហ៊ុនក៏បានវិនិយោគលើរថយន្តពន្លត់អគ្គីភ័យផងដែរ ដើម្បីអាចឆ្លើយតបយ៉ាងឆាប់រហ័សចំពោះគ្រោះអាសន្នអគ្គីភ័យ៕