ភ្នំពេញ ៖ ក្រុមហ៊ុន លីលី ហ៊្វូត អ៊ីនដាសទ្រី ខូអិលធីឌី បានបង្កើតឡើងក្នុងគោលបំណងជួយដល់បងប្អូនកម្មករ កសិករ ឲ្យមានការងារធ្វើ មានចំណូលបន្ថែម និងចង់ចូលរួមចំណែកជាមួយរាជរដ្ឋាភិបាលក្នុងការកាត់បន្ថយភាពក្រីក្ររបស់ប្រជាពលរដ្ឋ កាត់បន្ថយចំណាកស្រុក និងជួយលើកកម្ពស់ជីវភាពកសិករតាមរយៈជំរុញការដាំបន្លែ ជួយទិញកសិផល ព្រមទាំងជួយរកទីផ្សារជូនកសិករផងដែរ។

លោកជំទាវ ឧកញ៉ា មហាឧបាសិកា កែវ មុំ ស្ថាបនិកក្រុមហ៊ុន លីលី ហ៊្វូត អ៊ីនដាសទ្រី ខូអិលធីឌី បានបញ្ជាក់ឱ្យដឹងថា ចំណុចដូចដែលលើកឡើងខាងលើនេះបូករួមទាំងលក្ខណៈពិសេសជាប្រព័ន្ធមួយចំនួនទៀត បានជាធ្វើឲ្យក្រុមហ៊ុន លីលី ឈ្នះពានរង្វាន់អាជីវកម្មបរិយាប័ន្ន (Inclusive Business) ​កាលពីឆ្នាំ២០២១។

លោកជំទាវ ឧកញ៉ា មហាឧបាសិកា បានលើកឡើងថា ៖ លីលី ហ៊្វូត អ៊ីនដាសទ្រី ខូអិលធីឌី គឺជាក្រុមហ៊ុនមួយមានស្តង់ដារគ្រប់មុខ ដូចជា ISO , GMP, ហាឡាល់ , AIB , BRC រួមទាំងស្តង់ដារជាច្រើនទៀត។ ក្រុមហ៊ុនមានការចុះបញ្ជីការ និងបង់ពន្ធជូនរដ្ឋត្រឹមត្រូវ ជួយទៅដល់ប្រជាកសិករក្រីក្រ ជួយដល់បរិស្ថាន និងសង្គម ជាពិសេសជួយទៅដល់អ្នកដែលមានកម្រិតជីវភាពស្ថិតនៅផ្ទៃបាតពីរ៉ាមីតផងដែរ។ មិនត្រឹមតែប៉ុណ្ណោះ ខ្សែចង្វាក់ផលិតកម្មបំពាក់ដោយបច្ចេកវិទ្យាទំនើប និងមានការច្នៃប្រឌិត។ ចំណុចទាំងអស់នេះ ក៏ជាលក្ខណសម្បត្តិដែលធ្វើឱ្យក្រុមហ៊ុន លីលី ទទួលបានពានរង្វាន់អាជីវកម្មបិរយាបន្ន។

ទាក់ទងទៅនឹងចម្ងល់ថា តើអ្វីទៅជាអាជីវកម្មបរិយាប័ន្ន ? លោកជំទាវ ឧកញ៉ា កែវ មុំ បានលើកឡើងថា ៖ អាជីវកម្មបរិយាបន្ន ហាក់បីដូចជារបត់ថ្មីនៅក្នុងសង្គមកម្ពុជា ដែលអាជីវករ កសិករ និងប្រជាពលរដ្ឋមួយចំនួនធំពុំទាន់បានយល់ច្បាស់។ អាជីវកម្មបរិយាបន្ន គឺសំដៅដល់អាជីវកម្មណាដែលផ្ដោតសំខាន់ទៅលើការជួយដល់បងប្អូនប្រជាពលរដ្ឋដែលមានជីវភាពក្រីក្រស្ថិតនៅក្នុងផ្ទៃបាតពីរ៉ាមីតឱ្យមានលទ្ធភាពទទួលបានចំណូលមធ្យម និងមានភាពស្ថិតស្ថេរយូរអង្វែង ជាមួយនឹងការទទួលបានឱកាសបណ្តះបណ្តាលជំនាញបន្ថែម។

ជាការពិតណាស់ណាស់ ផ្អែកតាមការផ្សព្វផ្សាយរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងថា អាជីវកម្មបរិយាបន្ន គឺជាក្រុមហ៊ុនធ្វើអាជីវកម្មមួយដែលឈរលើគោលការណ៍ធុរកិច្ច អាចរកប្រាក់ចំណូលបាន មាននវានុវត្តន៍ និងដំណោះស្រាយជាប្រព័ន្ធ ដើម្បីឆ្លើយតបទៅនឹងបញ្ហាប្រឈមចាំបាច់របស់ប្រជាជនក្រីក្រ និងប្រជាជនដែលមានចំណូលទាបនៅផ្ទៃបាតពីរ៉ាមីត​។

លោកជំទាវ ឧកញ៉ា មហាឧបាសិកា កែវ មុំ ស្ថាបនិកក្រុមហ៊ុន លីលី បានបញ្ជាក់ថា ៖ « ពីរ៉ាមីតមានទំហំធំ។ អ្នកនៅបាតពីរ៉ាមីតមានចំនួនច្រើននាក់ រីឯអ្នកនៅកំពូលពីរ៉ាមីតមានចំនួនតិច។សម្រាប់អាជីវកម្មរបស់ លីលី ផ្ដោតទៅលើការជួយអ្នកដែលស្ថិតនៅបាតពីរ៉ាមីត ដូចជា ផ្តល់ឱកាសការងារ ទិញផលិតផលកសិផលពីពួកគាត់ ដើម្បីបង្កើនចំណូលប្រចាំថ្ងៃ ប្រចាំខែ និងប្រចាំឆ្នាំ។ ក្រុមហ៊ុន លីលី ហ៊្វូដ អ៊ិនដាសទ្រី មានរោងចក្រចំនួន ២។ មួយ​ស្ថិតនៅរាជធានីភ្នំពេញ មានបុគ្គលិកជាង ២០០នាក់ និងមួយទីតាំងទៀតស្ថិតនៅតំបន់សេដ្ឋកិច្ចពិសេសក្នុងខេត្តព្រះសីហនុ ដែលមានបុគ្គលិក ៣០០នាក់ ខណៈដែលបច្ចុប្បន្ននេះ ក្រុមហ៊ុនបានផលិតនំជាង ៣០ ប្រភេទ»​។

គួរជម្រាបថា ៖ ក្រុមហ៊ុន លីលី ហ៊្វូដ អ៊ិនដាសទ្រី ខូអិលធីឌី ទទួលបានពានរង្វាន់ឯកតំណាងឱ្យប្រទេសកម្ពុជា ក្នុងអាជីវកម្មបរិយាបន្នអាស៊ានឆ្នាំ២០២២ IB ( Inclusive business ) ASEAN 2022  ក្នុងចំណោម ១០ ក្រុមហ៊ុនមកពីបណ្តាប្រទេសក្នុងតំបន់អាស៊ាន នាកិច្ចប្រជុំកំពូលអាជីវកម្មបរិយាបន្នអាស៊ានលើកទី៥  និងមានកម្មវិធីលៀងសាយភោជន៍ ដែលប្រព្រឹត្តទៅនៅខេត្តសៀមរាប កាលពីថ្ងៃទី២៦-២៧ ខែតុលា ឆ្នាំ២០២២កន្លងទៅនេះ។

ក្រុមហ៊ុន លីលី​ ហ៊្វូដ អ៊ិនដាសទ្រី ខូអិលធីឌី អនុវត្តបានល្អនូវការប្រកាន់ខ្ជាប់នូវគោលគំនិតអាជីវកម្មបរិយាបន្ន និងកាត់បន្ថយផលប៉ះពាល់សេដ្ឋកិច្ចសង្គមលើក្រុមប្រជាពលរដ្ធ ដែលមានកម្រិតជីវភាពក្រីក្រស្ថិតនៅផ្ទៃបាតនៃជើងពីរ៉ាមីត (Base of the Pyramid – BoP) បានយ៉ាងប្រសើរ៕