ភ្នំពេញ ៖ ប្រទេសអៀរឡង់ បានផ្តល់ថវិកាចំនួន៨០០,០០០អឺរ៉ូ សម្រាប់គម្រោង “ភាពធន់នឹងអាកាសធាតុសម្រាប់ទាំងអស់គ្នា” នៅប្រទេសកម្ពុជាសម្រាប់ឆ្នាំ២០២៤។ គម្រោងនេះដឹកនាំអនុវត្តដោយអង្គការអុកស្វាម ក្នុងគោលបំណងឆ្លើយតបនឹងភាពងាយរងគ្រោះដែលបណ្តាលមកពីការប្រែប្រួលអាកាសធាតុ និងពង្រឹងយុទ្ធសាស្ត្របន្សុំា និងកាត់បន្ថយការប្រែប្រួលអាកាសធាតុ។

ទាក់ទងនឹងគម្រោងនេះ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន និងលោកជំទាវ Deirdre Ní Fhallúin អគ្គរដ្ឋទូតអៀរឡង់ប្រចាំនៅកម្ពុជា នាពាក់កណ្តាលសប្តាហ៍នេះបានពិភាក្សាផ្តោតលើផែនការទ្រង់ទ្រាយធំសម្រាប់ប្រទេសអៀរឡង់ និងប្រទេសកម្ពុជា ដើម្បីឈានសម្រេចគោលដៅនៃអព្យាក្រិតកាបូននៅឆ្នាំ២០៥០ និងការប៉ះពាល់ដោយសារការប្រែប្រួលអាកាសធាតុមកលើប្រទេសដែលបង្កឲ្យមានបញ្ហាប្រឈមធ្ងន់ធ្ងរទៅដល់ការអភិវឌ្ឍសេដ្ឋកិច្ច និងការចិញ្ចឹមជីវិតរបស់ប្រជាជននៅជនបទ។

លោកជំទាវ Ní Fhallúin ឯកអគ្គរដ្ឋទូតអៀរឡង់ បានមានប្រសាសន៍ថា ការគាំទ្រកម្មវិធីអាកាសធាតុ គឺជាផ្នែកមួយដ៏សំខាន់សម្រាប់យុទ្ធសាស្ត្រប្រទេសអៀរឡង់ក្នុងការអភិវឌ្ឍអន្តរជាតិ។ វាជាផ្នែកមួយនៃការចូលរួមក្នុងប្រទេសកម្ពុជា ហើយយើងរីករាយដែលបានបង្កើនមូលនិធិរបស់យើងសម្រាប់គាំទ្រកម្មវិធីអាកាសធាតុ។ យើងដឹងថាការប្រែប្រួលអាកាសធាតុប៉ះពាល់គ្រប់ៗគ្នា ប៉ុន្តែមិនមានភាពស្មើគ្នា។ ប្រជាជនក្រីក្របំផុតប្រឈមនឹងផលប៉ះពាល់ខ្លាំងបំផុង។ ប្រទេសអៀរឡង់ជឿជាក់លើការគាំទ្រប្រជាជនដែលងាយរងគ្រោះបំផុតដើម្បីប្រឈមនឹងបញ្ហាដែលបង្កឡើងដោយការប្រែប្រួលអាកាសធាតុ ហើយយើងរីករាយដែលបានផ្តល់មូលនិធិដល់កម្មវិធីនេះជាមួយអង្គការអុកស្វាម ដែលជាផ្នែកមួយនៃការប្តេជ្ញាចិត្តរបស់យើងចំពោះអាកាសធាតុ ចំពោះប្រទេសកម្ពុជា និងចំពោះអ្នកដែលរងផលប៉ះពាល់ខ្លាំងបំផុត។

ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានស្វាគមន៍ចំពោះការយកចិត្តទុកដាក់កាន់តែខ្លាំងឡើងរបស់ប្រទេសអៀរឡង់។ ឯកឧត្តមបានគូសបញ្ជាក់ពីយុទ្ធសាស្ត្ររបស់ក្រសួងបរិស្ថាន ២០២៣-២០២៨ ដើម្បីធានានិរន្តរភាព លើកកម្ពស់សេដ្ឋកិច្ចបៃតង និងឆ្លើយតបទៅនឹងការប្រែប្រួលអាកាសធាតុ។

ឯកឧត្តមបណ្ឌិតរដ្ឋមន្ត្រីបានមានប្រសាសន៍ថា “ក្រសួងបរិស្ថានទទួលស្គាល់ថាបញ្ហាបរិស្ថាន គឺគ្មានព្រំដែន និងទាមទារឲ្យមានកិច្ចសហប្រតិបត្តិការជាសកល។ យើងសូមស្វគមន៍ដៃគូអភិវឌ្ឍន៍ទាំងអស់ដែលមានបំណងចូលរួមក្នុងការអនុវត្តយុទ្ធសាស្ត្រអាកាសធាតុនេះ។ ខ្ញុំសូមថ្លែងអំណរគុណចំពោះការងារដែលប្រទេសអៀរឡង់កំពុងធ្វើក្នុងប្រទេសកម្ពុជា ហើយយើងនឹងទន្ទឹងរង់ចាំកិច្ចសហការទៅថ្ងៃខាងមុខទៀត” ។

លោកស្រី ភាណ សោភ័ណ នាយិកាអង្គការអុកស្វាមបានបញ្ជាក់ថាគម្រោង “ភាពធន់នឹងអាកាសធាតុសម្រាប់ទាំងអស់គ្នា”ស្របតាមអាទិភាពផែនការយុទ្ធសាស្ត្ររបស់រាជរដ្ឋាភិបាលកម្ពុជានិងប្រទេសអៀរឡង់ ហើយលោកស្រីបានថ្លែងអំណរគុណដល់ឯកឧត្តមបណ្ឌិតរដ្ឋមន្ត្រី និងលោកជំទាវអគ្គរដ្ឋទូតសម្រាប់ការគាំទ្រគម្រោងនេះ។ លោកស្រី សោភ័ណ មានប្រសាសន៍ថា “តាមរយៈគម្រោងនេះ យើងនឹងចូលរួមដោះស្រាយបញ្ហាការប្រែប្រួលអាកាសធាតុនៅក្នុងតំបន់ក្រីក្របំផុតក្នុងប្រទេសកម្ពុជា” ។ កិច្ចសហការជាមួយប្រទេសអៀរឡង់ ក្រសួងបរិស្ថាន អង្គការដៃគូ និងវិស័យឯកជន បញ្ជាក់ពីសារៈសំខាន់នៃការធ្វើការរួមគ្នាលើសកម្មភាពអាកាសធាតុ និងដើម្បីសម្រេចបានការអភិវឌ្ឍប្រកបដោយចីរភាពនៅក្នុងប្រទេសកម្ពុជា” ៕