សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី CNBC បានរាយការណ៍ថា រដ្ឋមន្ត្រីកសិកម្មរបស់ប្រទេសជប៉ុនបានលាលែងពីតំណែងកាលពីថ្ងៃពុធសប្ដាហ៍នេះ ដោយសារពលរដ្ឋខឹងសម្បារចំពោះការអត្ថាធិប្បាយរបស់លោកថា «មិនដែលទិញអង្ករនោះទេ»។
កាលពីថ្ងៃអាទិត្យ កន្លងទៅ រដ្ឋមន្ត្រីកសិកម្មជប៉ុន លោក Taku Eto បាននិយាយជាសាធារណៈថា លោកមិនដែលទិញអង្កនោះទេ ដោយសារលោកទទួលបានអំណោយភាគច្រើនជាគ្រាប់ធញ្ញជាតិពីអ្នកគាំទ្រ។ ការលើកឡើងរបស់រដ្ឋមន្ត្រីកសិកម្មរូបនេះបានធ្វើឱ្យពលរដ្ឋមានការខឹងសម្បារ ខណៈដែលពួកគេកំពុងជួបការលំបាកនឹងតម្លៃអង្ករឡើងថ្លៃខ្ពស់។ គួរឲ្យបញ្ជាក់ដែរ ជប៉ុនកំពុងប្រឈមមុខនឹងបញ្ហាស្រូវឡើងថ្លៃជាច្រើនខែ ដោយសារអាកាសធាតុមិនអំណោយផល និងគោលនយោបាយរបស់ប្រទេស ដើម្បីការពារផលប្រយោជន៍កសិករក្នុងស្រុក ដែលធ្វើឲ្យការផ្គត់ផ្គង់ធ្លាក់ចុះ។
ទន្ទឹមនឹងនេះ ការលាលែងពីតំណែងរបស់រដ្ឋមន្ត្រីកសិកម្ម Taku កើតឡើងចំពេលដែលរដ្ឋាភិបាលរបស់នាយករដ្ឋមន្ត្រី Shigeru Ishiba កំពុងប្រឈមនឹងការវាយតម្លៃទាបមុនពេលការបោះឆ្នោតសភាជាន់ខ្ពស់ដ៏សំខាន់មួយនៅរដូវក្តៅនេះ។ ការវាយតម្លៃសម្រាប់អនុម័តគណៈរដ្ឋមន្ត្រីរបស់ Ishiba បានធ្លាក់ចុះដល់កម្រិតទាបបំផុត ២៧,៤% ដោយសារតែអ្នកបោះឆ្នោតកាន់តែមិនសប្បាយចិត្តជាមួយនឹងការបរាជ័យរបស់រដ្ឋបាលក្នុងការដោះស្រាយការឡើងថ្លៃតម្លៃអង្ករ និងការបដិសេធមិនកាត់បន្ថយពន្ធប្រើប្រាស់ ខណៈដែលអតិផរណាកំពុងកើនឡើង។ តម្លៃអង្ករនៅក្នុងផ្សារទំនើបប្រហែល ១ ពាន់កន្លែងនៅទូទាំងប្រទេសបានឡើងដល់កម្រិតខ្ពស់បំផុត ដោយតម្លៃអង្ករក្នុងមួយថង់មានទម្ងន់ ៥ គីឡូក្រាមមានតម្លៃ ៤ ២៦៨ យ៉េន (២៩,៦៣ ដុល្លារ)។
កាលពីខែមីនា កន្លងទៅ អតិផរណារបស់ជប៉ុនកើនឡើង ៣,៦% បើប្រៀបធៀបនឹងរយៈពេលដូចគ្នាកាលពីឆ្នាំមុន។ គេកត់សម្គាល់ថា ក្នុងរយៈពេលបីឆ្នាំនេះ តួរលេខនៃអតិផរណាជប៉ុនលើសពីគោលដៅ ២% របស់ធនាគារកណ្តាលជប៉ុន។ សេដ្ឋវិទូលើកឡើងថា អតិផរណារបស់ជប៉ុនមានបញ្ហាច្រើនទាក់ទងនឹងសម្ពាធតម្លៃ ជាពិសេសតម្លៃម្ហូបអាហារឡើងថ្លៃក្នុងកម្រិតខ្ពស់បើធៀបនឹងសហរដ្ឋអាមេរិក ឬអឺរ៉ុប។ បន្ថែមពីនេះ ការធ្លាក់តម្លៃនៃប្រាក់យ៉េនបានធ្វើឱ្យការនាំចូលម្ហូបអាហារមានតម្លៃថ្លៃផងដែរ ខណៈដែលជប៉ុននាំចូលអាហារប្រហែល ៦០% នៃការផ្គត់ផ្គង់ស្បៀងអាហាររបស់ខ្លួន។
បន្ទាប់ពីជប៉ុនជួបប្រទះនឹងវិបត្តិកង្វះអង្ករនៅរដូវក្តៅកាលពីឆ្នាំ២០២៤ តម្លៃបានបន្តកើនឡើងថ្លៃតាំងពីពេលនោះ ទោះបីជាមានការដាំដុះថ្មី និងការនាំចូលក៏ដោយ។ លោក Frederic Neumann ប្រធានសេដ្ឋវិទូប្រចាំតំបន់អាស៊ីរបស់ HSBC លើកឡើងថា ការឡើងថ្លៃតម្លៃស្រូវឆ្លុះបញ្ចាំងពីផលប៉ះពាល់នៃការប្រមូលផលមិនល្អកាលពីឆ្នាំមុន ខណៈដែលការប្រើប្រាស់អង្ករក្នុងស្រុកពឹងផ្អែកលើផលិតកម្មក្នុងស្រុកជាជាងការនាំចូល។ មិនត្រឹមតែប៉ុណ្ណោះ ចំនួនកសិករក៏ធ្លាក់ចុះទៅតាមចំនួនប្រជាជនវ័យចំណាស់ផងដែរ។លើសពីនេះ អង្កររបស់ជប៉ុនសឹងតែដាច់តែឯងពីទីផ្សារពិភពលោក ដោយសារប្រជាជនជប៉ុនចូលចិត្តអង្ករក្នុងស្រុកជាងអង្ករបរទេស ហើយប្រទេសនេះយកពន្ធខ្ពស់លើអង្ករនាំចូលក្នុងគោលបំណងការពារកសិករស្រូវរបស់ខ្លួន៕
Account
Security
Favourite Content