បរទេស៖ យោងតាមប្រភពពី IMF បានលើកឡើងថា កំណើនសេដ្ឋកិច្ចរបស់ជប៉ុននឹងកើនឡើងប្រសិនបើមានស្ត្រីបានចូលរួមក្នុងវិស័យបច្ចេកវិទ្យា និងវិទ្យាសាស្ត្រ (STEM) ហើយវានឹងជំរុញយ៉ាងខ្លាំងដល់កំណើនផលិតភាពរបស់ប្រទេសផងដែរ។

ជប៉ុន ជាប្រទេសសម្បូរប្រជាជនវ័យចំណាស់ជាងគេមួយនៅលើពិភពលោក ដោយចំនួនប្រជាជនក្នុងវ័យធ្វើការបានធ្លាក់ចុះចាប់តាំងពីចុងទសវត្សរ៍ឆ្នាំ១៩៩០ មកម្ល៉េះ។ ទោះបីជាយ៉ាងណាក្តី ជប៉ុនសម្រេចបាននូវកំណើនផលិតផលក្នុងស្រុកសរុបសម្រាប់មនុស្សម្នាក់ៗដ៏គួរឱ្យចាប់អារម្មណ៍ ដែលនៅពីក្រោយសហរដ្ឋអាមេរិកប៉ុណ្ណោះ ចាប់ពីឆ្នាំ ២០១២ ដល់ឆ្នាំ ២០១៩ ក្នុងអំឡុងពេល “Abenomics” ដែលជាការរួមបញ្ចូលគ្នានៃការជំរុញរូបិយវត្ថុ ភាពបត់បែននៃសារពើពន្ធ និងកំណែទម្រង់រចនាសម្ព័ន្ធដែលគាំទ្រដោយអតីតនាយករដ្ឋមន្ត្រី Shinzō Abe ។

ទន្ទឹមនឹងកត្តារួមចំណែកដ៏សំខាន់ដល់កំណើនមនុស្សម្នាក់ៗគឺការកើនឡើងនៃចំនួនស្ត្រីដែលចូលក្នុងកម្លាំងពលកម្ម ដោយអត្រាកម្លាំងពលកម្មស្ត្រីនៅជប៉ុនបានកើនឡើងដល់ ៧៤ ភាគរយក្នុងឆ្នាំ២០២២ កើនឡើងពី ៦៣ ភាគរយក្នុងឆ្នាំ២០១២។ មិនត្រឹមតែប៉ុណ្ណោះ អ្នកចូលរួមក្នុងកម្លាំងពលកម្មភាគច្រើនជាម្តាយដែលធ្លាប់នៅផ្ទះ ដោយពួកគាត់អាចចូលរួមក្នុងកម្លាំងពលកម្មវិញដោយមានការគាំទ្រពីរដ្ឋាភិបាល និងកែលម្អគោលនយោបាយឈប់សម្រាកលំហែមាតុភាព។ ការកើនឡើងអ្នកធ្វើការជាស្ត្រីបានជួយដល់កង្វះកម្លាំងពលកម្មដ៏ខ្សោយរបស់ប្រទេស បង្កើនប្រាក់ចំណូលគ្រួសារ និងជំរុញដល់កំណើនសេដ្ឋកិច្ច។

ទោះជាយ៉ាងណាក្តី និន្នាការនៃអត្រាចូលរួមក្នុងកម្លាំងពលកម្មរបស់ស្ត្រីមានភាពយឺតឥឡូវនេះ ហើយជប៉ុនកំពុងស្វែងរកដំណោះស្រាយថ្មីក្នុងការជំរុញកំណើន។ ទន្ទឹមនឹងនេះដែរ ដំណោះស្រាយមួយដែលត្រូវបានណែនាំជាញឹកញាប់ គឺការនាំយកអ្នកមានទេពកោសល្យឲ្យកាន់តែច្រើនមកពីបរទេស។ បើប្រៀបធៀបជាមួយក្រុមប្រទេស G7 ផ្សេងទៀត ជប៉ុនមានចំនួនពលករបរទេសទាបបំផុតត្រឹមតែ ២,៨ ភាគរយប៉ុណ្ណោះនៃកម្លាំងការងារសរុប។ ជាការឆ្លើយតប រដ្ឋាភិបាលកំពុងអនុវត្តគោលនយោបាយដើម្បីទាក់ទាញអ្នកមានសមត្ថភាព ឬជំនាញកាន់តែច្រើនពីបរទេស ប៉ុន្តែទំនងជាមិនឈានដល់ទំហំដែលចង់បាន ដើម្បីទប់ទល់នឹងការធ្លាក់ចុះនៃកម្លាំងពលកម្មនោះទេ។

ដើម្បី​បង្កើន​ទិន្នផល​ដោយមិនបន្ថែមមនុស្ស​ទៀតនោះ ជប៉ុន​ត្រូវ​តែ​បង្កើន​ផលិតភាព​ការងារ​នៃ​កម្លាំង​ការងារ​ដែល​មាន​ស្រាប់។ យ៉ាងណាមិញ លក្ខខណ្ឌនេះត្រូវជម្រុញស្វ័យប្រវត្តិកម្ម និងឌីជីថលនីយកម្ម ប៉ុន្តែទាំងពីរនេះត្រូវការសមត្ថភាព STEM (វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា ដែលកំពុងមានមានកម្រិតនៅក្នុងប្រទេសជប៉ុន។ ការស្រាវជ្រាវថ្មីៗរបស់​ IMF បង្ហាញថា ស្ត្រីនៅក្នុងប្រទេសជប៉ុនអាចក្លាយជាម៉ាស៊ីនជំរុញកំណើនម្តងទៀត ហើយស្ត្រីភាគច្រើនគួរតែត្រូវបានលើកទឹកចិត្តឱ្យបន្តអាជីពក្នុងវិស័យ STEM ជាចំណាយកម្លាំងពលកម្មថោក។ នៅក្នុងប្រទេសជប៉ុន មាននិស្សិតស្រីតែ ៧ ភាគរយប៉ុណ្ណោះដែលសិក្សាផ្នែក STEM ធៀបនឹង ៣៦ ភាគរយនៃនិស្សិតប្រុស។

កាស្រាវជ្រាវបានឆ្លុះបញ្ចាំងពីឧបសគ្គជាច្រើនដែលស្ត្រីជប៉ុនប្រឈមមុខក្នុងវិស័យ STEM ជាជាងកង្វះសមត្ថភាពស្ត្រី ។ តាមរយៈការដោះស្រាយលើឧបសគ្គទាំងនោះ ជប៉ុនអាចពង្រីកចំនួននៃសមត្ថភាពSTEM ដែលជម្រុញឱ្យកម្លាំងពលកម្មនៅជប៉ុន ដើម្បីរួមចំណែកដល់ស្វ័យប្រវត្តិកម្ម ឌីជីថល និងការបង្កើតថ្មីកាន់តែច្រើន។ លើសពីនេះ ការលុបបំបាត់ឧបសគ្គដែលស្ត្រីប្រឈមមុខក្នុងការងារអាចបង្កើនល្បឿនកំណើនផលិតភាព ២០ ភាគរយនៅក្នុងប្រទេសជប៉ុន។ ជាមួយនឹងផលិតភាពកើនឡើងក្នុងល្បឿនកាន់តែលឿន ទិន្នផល និងប្រាក់ឈ្នួលក៏នឹងកើនឡើងកាន់តែលឿនដូចគ្នា។

ទោះបីជាមានអត្ថប្រយោជន៍ដល់សេដ្ឋកិច្ចទាំងមូលក៏ដោយ ប៉ុន្តែគម្លាតយេនឌ័រនៅតែជាបញ្ហាប្រឈមដោយបុគ្គលិកស្រ្តីផ្នែក STEM អាចនឹងទទួលបានអត្ថប្រយោជន៍ និងប្រាក់ចំណូលច្រើនជាងបុរស។ ម្យ៉ាងវិញទៀត បុគ្គលិកបុរសផ្នែក STEM ដែលមានទេពកោសល្យតិចបំផុតអាចជំនួសដោយស្រ្តី។ មិនត្រឹមតែប៉ុណ្ណោះ ស្ត្រីនៅទូទាំងពិភពលោកប្រឈមមុខនឹងគម្លាតប្រាក់ចំណូលក្នុងវិស័យ STEM ហើយឧបសគ្គបែបនេះគឺងាយស្រួលក្នុងការកំណត់គោលដៅជាមួយនឹងគោលនយោបាយ។ លើសពីនេះ ស្ត្រីក៏ប្រឈមមុខនឹងគម្លាតប្រាក់បៀវត្សរ៍ និងការរើសអើងនៅកន្លែងធ្វើការផងដែរ។

ស្របពេលនេះដែរ រដ្ឋាភិបាល​ជប៉ុន​កំពុងរៀបចំផែនការ​កាត់​បន្ថយ​គម្លាត​ប្រាក់​ខែ​។ ថ្មីៗនេះ គោលនយោបាយក្របខ័ណ្ឌបានតម្រូវឱ្យក្រុមហ៊ុនបង្កើនតម្លាភាពក្នុងការកាត់បន្ថយគម្លាតប្រាក់ឈ្នួលយេនឌ័រ។ វិធានការបែបនេះអាចជួយរដ្ឋាភិបាលអនុវត្តបទបញ្ញត្តិប្រាក់ឈ្នួលស្មើគ្នាសម្រាប់ការងារស្មើគ្នា និងបង្រួមគម្លាតយេនឌ័រសម្រាប់ប្រាក់បៀវត្សរ៍។ ​បន្ថែមពីនេះ​ទៀត ​​ជប៉ុនចាំបាច់គួររៀបចំកំណែទម្រង់បែបបទការងារ និងទីផ្សារការងារដែលអាចបត់បែនបាន ហើយកែសម្រួលទីផ្សារការងារដោយផ្អែកលើគុណសម្បត្តិនឹងជំរុញការអប់រំ STEM សម្រាប់ស្ត្រីផងដែរ។  មិនត្រឹមតែប៉ុណ្ណោះ ស្ត្រីជាច្រើនទៀតនឹងត្រូវបានលើកទឹកចិត្តឱ្យចូលក្នុងអាជីព STEM ខណៈដែលពួកគេឃើញស្ត្រីផ្សេងៗទៀតជោគជ័យក្នុងវិស័យទាំងនេះរួចទៅហើយ។ នៅពេលដែលរឿងនេះកើតឡើង ស្ត្រីដែលមានការបណ្តុះបណ្តាល STEM នឹងកាន់តែមានភាពច្នៃប្រឌិត និងរួមចំណែកដល់ភាពរីកចម្រើនផ្នែកសេដ្ឋកិច្ចរបស់ជប៉ុន៕