បរទេស ៖ ការនាំចេញរបស់ជប៉ុនបានកើនឡើងជាលើកដំបូងក្នុងរយៈពេល ៥ ខែចុងក្រោយ (គិតត្រឹមខែកញ្ញា) ដោយសារតែការចុះខ្សោយនៃតម្លៃប្រាក់យ៉េន នេះបើយោងតាមការរាយការណ៍ពី CNA។

នៅព្រឹកថ្ងៃពុធ សប្ដាហ៍នេះ ទិន្នន័យបានបង្ហាញថា តម្លៃនៃការនាំចេញសរុបរបស់ជប៉ុនបានកើនឡើង ៤,២% ក្នុងខែកញ្ញា បើធៀបនឹងរយៈពេលដូចគ្នាកាលពីឆ្នាំមុន ប៉ុន្តែទាបជាងការព្យាករណ៍ថានឹងកើនឡើង ៤,៦%។ ការនាំចេញទៅកាន់ប្រទេសចិនបានកើនឡើង ៥,៨% ដែលជំរុញដោយតម្រូវការរថយន្ត និងវត្ថុធាតុដើម។ លើសពីនេះ ការនាំចេញទៅខាងតំបន់អាស៊ី​បាន​កើន​ឡើង ៩,២%។ យ៉ាងណាមិញ ការនាំចេញទៅកាន់អាម៉េរិកបានធ្លាក់ចុះ ១៣,៣% ក្នុងខែកញ្ញាធៀបនឹងឆ្នាំមុន ដែលជាការធ្លាក់ចុះសម្រាប់រយៈពេល ៦ខែជាប់ៗគ្នា។ ការនាំចេញរថយន្តបានធ្លាក់ចុះ ២៤,២% និង សម្ភារៈផលិតបន្ទះឈីបធ្លាក់ចុះ ៤៥,៧% ភាគរយ។ យ៉ាងណាក៏ដោយ ទោះបីជាការនាំចេញទៅអាម៉េរិកបានបន្តធ្លាក់ចុះក៏ដោយ ប៉ុន្តែការនាំចេញទៅទិសដៅផ្សេងបានកើនឡើង និងបានបន្ថែមភាពវិជ្ជមានទៅលើទិន្នន័យ ដែលអាចឲ្យសេដ្ឋកិច្ចមានស្ថិរភាពជាងមុន។

លោក Takeshi Minami ប្រធានសេដ្ឋវិទូនៅវិទ្យាស្ថានស្រាវជ្រាវ Norinchukin បានលើកឡើងថា ទស្សនវិស័យសម្រាប់ការនាំចេញនៅតែមានភាពស្រពិចស្រពិល ដោយសារការនាំចេញទៅអាម៉េរិកនៅមានភាពលំបាក។ លើសពីនេះ ពន្ធគយមិនទាន់មានផលប៉ះពាល់ពេញលេញនៅឡើយទេ ដោយសារអ្នកនាំចេញរបស់ជប៉ុនមិនអាចទទួលយកថ្លៃដើមខ្ពស់។ ប្រសិនបើពួកគេចាប់ផ្តើមសម្របខ្លួននោះអាចនឹងកាត់បន្ថយបរិមាណនាំចេញ។

កាលពីខែកញ្ញា រដ្ឋាភិបាលទីក្រុងវ៉ាស៊ីនតោនបានធ្វើកិច្ចព្រមព្រៀងពាណិជ្ជកម្មជាផ្លូវការជាមួយទីក្រុងតូក្យូ ដោយបានអនុវត្តការកំណត់ពន្ធមូលដ្ឋាន ១៥% លើការនាំចូលស្ទើរតែទាំងអស់ពីជប៉ុន ដែលកាត់បន្ថយពីអត្រាលើកមុន ២៧,៥% លើរថយន្ត និង ២៥% លើទំនិញភាគច្រើនផ្សេងទៀត។ កិច្ចព្រមព្រៀងនេះបានបន្ធូរបន្ថយសម្ពាធខ្លះដល់ក្រុមហ៊ុនផលិតរថយន្តជប៉ុន ដែលភាគច្រើនរងឥទ្ធិពលពីតម្លៃពន្ធខ្ពស់កាលពីលើកមុន ដែលបានធ្វើឲ្យពួកគេកាត់បន្ថយតម្លៃនាំចេញ និងទទួលបានប្រាក់ចំណេញតិចជាងមុន។ អ្នកវិភាគបានព្រមានថា ប្រសិនបើប្រាក់ចំណេញបន្តធ្លាក់ចុះក្នុងរយៈពេលវែង នោះវានឹងរារាំងដល់ការវិនិយោគសាជីវកម្ម និងកំណើនប្រាក់ឈ្នួល។

លោក Minami បានលើកឡើងថា ក្រុមហ៊ុនផលិតដែលផ្តោតលើការនាំចេញអាចនឹងប្រឈមមុខនឹងការធ្លាក់ចុះប្រាក់ចំណេញ ដែលអាចប៉ះពាល់ដល់សមត្ថភាពរបស់ពួកគេក្នុងការដំឡើងប្រាក់ឈ្នួលបុគ្គលិក ហើយលទ្ធផលនោះនឹងមានឥទ្ធិពលខ្លាំងលើគោលនយោបាយរូបិយវត្ថុ៕