សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ទីភ្នាក់ងារសហប្រតិបត្តិការអន្តរជាតិកូរ៉េ(KOICA)ការិយាល័យកម្ពុជា និងរដ្ឋលេខាធិការដ្ឋានអាកាសចរស៊ីវិល(SSCA)នាថ្ងៃទី២៦ ខែមីនា ឆ្នាំ២០២៥ បានចុះហត្ថលេខាលើគម្រោងជំនួយឥតសំណងតម្លៃ១២លានដុល្លារសម្រាប់គម្រោងពង្រឹងប្រព័ន្ធបណ្តុះបណ្តាលអាកាសចរណ៍ស៊ីវិលនៅវិទ្យាស្ថានជាតិអាកាសចរណ៍ស៊ីវិលកម្ពុជា។
លោកស្រី Choi Moonjung នាយិកានៃការិយាល័យទីភ្នាក់ងាកយកា ប្រចាំប្រទេសកម្ពុជា និងឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រី ទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិលកម្ពុជា បានចុះហត្ថលេខាលើកិច្ចព្រមព្រៀងនេះ។
គម្រោងនេះមានថវិកាសរុបចំនួន១២លានដុល្លារអាមេរិកដែលជាជំនួយឥតសំណងរបស់សាធារណរដ្ឋកូរ៉េ និងត្រូវបានអនុវត្តចាប់ពីឆ្នាំ២០២៥ ដល់ឆ្នាំ២០២៩ ដោយមានធាតុផ្សំសំខាន់ៗដូចជា ១) ការអភិវឌ្ឍន៍កម្មវិធីសិក្សា៖ ការធ្វើទំនើបកម្ម និងធ្វើបច្ចុប្បន្នភាពកម្មវិធីសិក្សាបណ្តុះបណ្តាលឱ្យស្របតាមស្តង់ដារអន្តរជាតិ និងការអនុវត្តល្អបំផុត ២) ការបណ្តុះបណ្តាលគ្រូ៖ ពង្រឹងជំនាញបច្ចេកទេសរបស់គ្រូ នៅ NICA ៣) ការកែលម្អហេដ្ឋារចនាសម្ព័ន្ធ៖ ការធ្វើឱ្យប្រសើរឡើងនូវកន្លែងបណ្តុះបណ្តាល និងការផ្តល់ឧបករណ៍ទំនើបៗ ៤) ការកសាងសមត្ថភាព៖ ការពង្រឹងសមត្ថភាពស្ថាប័នរបស់ NICA ក្នុងការគ្រប់គ្រង និងផ្តល់កម្មវិធីបណ្តុះបណ្តាលប្រកបដោយប្រសិទ្ធភាព ៥) ការផ្តល់អ្នកជំនាញ៖ អ្នកជំនាញកូរ៉េនឹងត្រូវបានបញ្ជូនដើម្បីជួយសម្រួលដល់ការអភិវឌ្ឍន៍ប្រព័ន្ធបណ្តុះបណ្តាល នឹងចែករំលែកចំណេះដឹង និងបទពិសោធន៍។
គម្រោងពង្រឹងប្រព័ន្ធបណ្តុះបណ្តាលអាកាសចរណ៍ស៊ីវិលនៅវិទ្យាស្ថានជាតិអាកាសចរណ៍ស៊ីវិលនៅកម្ពុជានឹងផ្តោតលើការពង្រឹងសមត្ថភាពរបស់វិទ្យាស្ថានជាតិអាកាសចរណ៍ស៊ីវិលនៅកម្ពុជា(NICA)ដើម្បីផ្តល់កម្មវិធីបណ្តុះបណ្តាលដែលមានគុណភាពខ្ពស់ និងទទួលស្គាល់ជាអន្តរជាតិសម្រាប់អ្នកជំនាញអាកាសចរណ៍ស៊ីវិលនៅកម្ពុជា។ គំនិតផ្តួចផ្តើមនេះនឹងដោះស្រាយការកើនឡើងនៃតម្រូវការសម្រាប់បុគ្គលិកជំនាញក្នុងវិស័យអាកាសចរណ៍ដែលកំពុងរីកចម្រើនយ៉ាងឆាប់រហ័សដើម្បីធានាបាននូវសុវត្ថិភាព និងប្រសិទ្ធភាពក្នុងការធ្វើដំណើរតាមផ្លូវអាកាស។
ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិលកម្ពុជា មានប្រសាសន៍ថា៖
«តាមរយៈការពង្រឹងប្រព័ន្ធបណ្តុះបណ្តាលរបស់ NICA យើងបាន និងកំពុងវិនិយោគលើអនាគតនៃអ្នកជំនាញអាកាសចរណ៍របស់យើង និងធានាថា ពួកគេត្រូវបានបំពាក់ដោយជំនាញចាំបាច់ដើម្បីឆ្លើយតបទៅនឹងបញ្ហាប្រឈមនានា។ យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះការគាំទ្រ និងភាពជាដៃគូដ៏សប្បុរសរបស់ទីភ្នាក់ងារ KOICA»។
លោកស្រី Choi Moonjung នាយិកាប្រចាំប្រទេសនៃការិយាល័យ KOICA ប្រចាំកម្ពុជាបានមានប្រសាសន៍ថា៖
«គម្រោងនេះនឹងដើរតួយ៉ាងសំខាន់ក្នុងការអភិវឌ្ឍកម្លាំងពលកម្មជំនាញសម្រាប់វិស័យអាកាសចរណ៍ស៊ីវិល ដែលរួមចំណែកដល់កំណើន និងវិបុលភាពនៃប្រទេសកម្ពុជាទាំងមូល។ យើងមានមោទនភាពក្នុងការធ្វើជាដៃគូជាមួយ SSCA និង NICA លើគំនិតផ្តួចផ្តើមដ៏សំខាន់នេះ»។
គម្រោងនេះត្រូវបានគេរំពឹងថា នឹងមានឥទ្ធិពលយ៉ាងសំខាន់ទៅលើសុវត្ថិភាព ប្រសិទ្ធភាពនិង និរន្តរភាពនៃវិស័យអាកាសចរណ៍ស៊ីវិលរបស់កម្ពុជា។តាមរយៈការវិនិយោគលើការអភិវឌ្ឍន៍ធនធានមនុស្ស គម្រោងនេះនឹងរួមចំណែកដល់កំណើនរយៈពេលវែងនៃឧស្សាហកម្មនេះនិងលើកកំពស់កម្ពុជាឲ្យក្លាយជាមជ្ឈមណ្ឌលអាកាសចរណ៍ក្នុងតំបន់៕
Account
Security
Favourite Content