សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ថ្នាក់ដឹកនាំជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ បានស្នើដល់ស្ថាប័នអប់រំសាធារណរដ្ឋកូរ៉េ ជួយបណ្តុះបណ្តាលដល់ពលករកម្ពុជាដែលកំពុងមានវត្តមាននៅកូរ៉េឱ្យមានជំនាញខាងកសិកម្មច្បាស់លាស់ដែលអាចឱ្យពួកគេចូលរួមកសាងសេដ្ឋកិច្ចជាតិ និងសេដ្ឋកិច្ចគ្រួសារបានល្អប្រសើរក្រោយពេលត្រឡប់មកស្រុកកំណើតវិញ។
ឯកឧត្ដម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានស្នើឡើងដូច្នេះក្នុងជំនួបពិភាក្សាជាមួយលោកបណ្ឌិត Lee Woosung នាយកប្រតិបត្ដិនៃវិទ្យាស្ថានកូរ៉េ RISTI ,លោកស្រីបណ្ឌិត OH Jung-Eun និងលោកសាស្ត្រាចារ្យ Park Yang-Hee នៃវិទ្យាស្ថានជាតិពហុបច្ចេកទេសកម្ពុជា នាពេលថ្មីៗនេះ។
ឯកឧត្តមរដ្ឋលេខាធិការក្រសួងកសិកម្ម បានមានប្រសាសន៍ឱ្យដឹងថា៖ ជំនួបពិភាក្សានេះផ្ដោតលើការស្វែងរកឱកាសសហការរវាងវិទ្យាស្ថាន RISTI នៃក្រសួងការងារកូរ៉េ ជាមួយក្រសួងកសិកម្មកម្ពុជា ក្នុងការជួយផ្តល់វគ្គបណ្តុះបណ្តាលពិសេសដល់ពលករ/កសិករកម្ពុជា ដែលបានត្រឡប់ពីបំពេញការងារនៅកូរ៉េ ដើម្បីចាប់យកមុខរបរក្នុងផលិតកម្មកសិកម្មដ៏រឹងមាំមួយដែលអាចចូលរួមកសាងសេដ្ឋកិច្ចជាតិ។
ឯកឧត្តម ហ៊ាន វណ្ណហន បានថ្លែងប្រាប់ភាគីកូរ៉េថា៖ វិសាលភាពនៃការផ្តល់វគ្គបណ្តុះបណ្តាលនេះ មិនគួរកំណត់ត្រឹមពលករដែលត្រឡប់ពីកូរ៉េ ប៉ុន្ដែត្រូវយកចិត្តទុកដាក់ចំពោះសមាជិកសហគមន៍កសិកម្មទំនើប ដែលជាអាទិភាពរបស់ក្រសួងកសិកម្មផងដែរ។ វគ្គបណ្តុះបណ្តាលនេះ គួរត្រូវធ្វើឡើងនៅតាមកសិដ្ឋានផលិតដោយផ្ទាល់ពេញមួយរដូវ ផ្អែកលើភាពចាំបាច់ដែលសហគមន៍ត្រូវការ និងស្របតាមតម្រូវការទីផ្សារ។
ជាលទ្ធផលនៃជំនួបពិភាក្សាបានឈានដល់ការឯកភាពគ្នាជាគោលការណ៍លើទស្សនទានការងារ និងត្រូវបន្តពិភាក្សារៀបចំឯកសារគោលនៃការឯកភាពគ្នាក្នុងទម្រង់ MOU ដើម្បីដាក់គោរពស្នើសុំអនុសាសន៍ និងការសម្រេចពី ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មុននឹងឈានទៅអនុវត្តជាផ្លូវការ៕
Account
Security
Favourite Content