ភ្នំពេញ ៖ ចាប់តាំងពីរាជរដ្ឋាភិបាល​កម្ពុជា​បាន​ប្រកាស​ដាក់ឱ្យ​អនុវត្តនូវកម្មវិធីជំរុញការ​វិនិយោគ​តាមបណ្តាខេត្ត​នៅភូមិភាគឦសាន​ ឃើញថា​ ខេត្ត​ចំនួន២ រួមមាន ខេត្តក្រចេះ និងមណ្ឌលគិរី​ ទទួលបានការ​ចាប់អារម្មណ៍​ និងមានការ​បណ្ដាក់ទុនវិនិយោគច្រើនជា​ងគេ​ ។

យោងតាម​ក្រុមការងារជំរុញការ​វិនិយោគក្នុងភូមិភាគឦសាន​បានបង្ហាញឱ្យឃើញថា ក្នុង​ចំណោម​ខេត្ត​ទាំង៤ ​នៅភូមិភាគឦសាន ​រួមមានខេត្តក្រចេះ ស្ទឹង​ត្រែង រតនគិរី និងមណ្ឌលគិរី ខេត្តដែល​ទទួលបាន​ការ​វិនិយោគ​ និងចាប់អារម្មណ៍​វិនិយោគច្រើនជាង​គេ មានខេត្ត​ក្រចេះ និង​ខេត្ត​មណ្ឌលគិរី ។ ជាក់ស្ដែង​​កាលពីឆ្នាំ២០២៥កន្លងទៅ​ក្រុមការងារ​កម្មវិធីពិសេស​ជំរុញការ​វិនិយោគបានអនុម័ត​គម្រោង​វិនិយោគ​សរុប​ចំនួន​១៣ ជាមួយ​​ទុនវិនិយោគប្រមាណ ៦៦៨លានដុល្លារអាម៉េរិក​​ ដោយក្នុងនោះ ខេត្ត​ក្រចេះ​មាន​ចំនួន​៦គម្រោង ខេត្តមណ្ឌល​គិរីមាន​៤គម្រោង​ ។​

ដោយឡែក​ក្នុងឆ្នាំ២០២៦នេះ ខេត្ត​ក្រចេះ និងខេត្តមណ្ឌលគិរី ក៏នៅតែបន្តទាក់ទាញការ​វិនិយោគ​នានា​លើ​​​វិស័យគ្នា ដូចជា ​ទេសចរ​ណ៍ កសិកម្ម និងឧស្សាហកម្ម ដោយ​ក្នុងនោះ ខេត្តក្រចេះ មាន​តំបន់​សេ​ដ្ឋកិ​​ច្ច​ពិសេស​ចំនួន ១ ​គឺ តំបន់សេដ្ឋកិច្ច​យូប៊ីអ៊ី​ ស្នួល​ ស្ថិតនៅក្នុង​ស្រុក​ស្នួល ​ខេត្ត​ក្រចេះ បាន និងកំពុង​ទាក់ទាញ​ការ​វិនិយោគ​ពីក្នុង​ និងក្រៅប្រទេស​ ជាពិសេស​គម្រោង​វិនិយោគមកពីប្រទេស​ចិន។​

បើតាមក្រុមការងារ​ជំរុញវិនិយោគក្នុងភូមិ​ភាគឦសាន​បាន​បង្ហាញថា ​តំបន់សេដ្ឋកិច្ចពិសេស យូ ប៊ី អ៊ី ស្នួល គឺជាតំបន់សេដ្ឋកិច្ចពិសេស ដែលមានភាពសកម្មបំផុតមួយនៅភូមិភាគឦសាន ដោយបច្ចុប្បន្នមានគម្រោងវិនិយោគផ្តោតលើការផលិតសំបកកង់យានយន្ត និងការផលិតពុម្ពសំបកកង់យានយន្ត ក្រោមទុនវិយោគជិត ៦០០ លានដុល្លារអាម៉េរិក ដែលអាចបង្កើតឱកាសការងារប្រមាណ ២ ០១៤ កន្លែង ។

ឯកឧត្តម ​វ៉ា ថន អភិបាលខេត្តក្រចេះ បាន​ថ្លែងប្រាប់​សារព័ត៌មាន​ AMS ឱ្យដឹងថា តាមរយៈកម្មវិធីពិសេស​ជំរុញកា​រវិនិយោគក្នុងភូមិភាគឦសាន​នេះ ខេត្តក្រចេះមានគម្រោង​វិនិយោគថ្មី និងគម្រោង​វិនិយោគដែល​ជាប់គាំងកន្លងទៅ​ស្នើសុំលើកទឹកចិត្ត​ពិសេស ដើម្បីដំណើរការ​វិនិយោគ ហើយក៏មានគម្រោង​ច្រើន​ទៀតត្រូវ​បាន​អនុម័តឱ្យដំណើរការ​វិនិយោគក្នុង​ខេត្តក្រចេះដែរ ។

ឯកឧត្តមបន្តថា ដើម្បីឱ្យ​ការ​វិនិយោគរបស់វិនិយោគិន ​និងធុរជន​នៅក្នុងខេត្តក្រចេះ កាន់តែរលូន អាជ្ញាធរ​បានជួយ​សម្រួលដល់​វិនិយោគិន​ និងធុរជន ស្រ​បតាម​គោលនយោបាយរបស់កម្មវិធីពិសេស​ជំរុញការ​វិនិយោគក្នុងភូមិ​ភាគឦសាន ដែលចង់ឱ្យវិនិយោគិន​ចូលម​ក​បណ្ដាក់ទុនវិនិយោគនៅតំបន់ភូមិភាគឦសាន​កាន់តែច្រើន​ ។

ងាកទៅមើល​មណ្ឌលគិរី ដែលជា​ខេត្តមួយក្នុង​តំបន់​ភូមិភាគឦសានដែរនោះ ចាប់តាំងពីកម្មវិធីពិសេស​នេះ បាន​ដាក់ឱ្យ​អនុវត្ត​ន៍ ក៏មានវិនិយោគិន​ និងធុរជនជាច្រើន​បានចូលទៅកាន់ខេត្ត​មួយនេះស្វែងរកការ​វិនិយោគ​ក្នុងពេល​កំពុង​មានឱកាស​ទទួល​បានការអនុគ្រោះពិសេសពីរាជរដ្ឋាភិបាល ។​

លោក ​ឌុក ពិសិដ្ឋ​ ប្រធានសមាគម​កាហ្វេ​កម្ពុជា និងជា​ម្ចាស់​កសិដ្ឋាន​ចម្ការ​កាហ្វេ, ផ្ទះស្នាក់ PIDA FARM ក្នុង​ក្រុងសែនមនោរម្យ​ ខេត្តមណ្ឌលគិរី បានឱ្យដឹងថា ក្នុងពេលរាជរដ្ឋាភិបាលកម្ពុជា​បាន និងកំពុង​យកចិត្តទុកដាក់ពីការ​វិនិយោគ​នៅក្នុង​ខេត្តមណ្ឌលគិរី ឃើញ​មាន​វិនិយោគិន និងធុរជន​ជាច្រើន​ ចូលមកកាន់​ខេត្តនេះ ដើម្បី​ស្វែងរកការ​វិនិយោគ​ ។

លោកសង្ឃឹមថា តាមរយៈកម្មវិធីជំរុញកា​រវិនិយោគ​ក្នុងភូមិភាគឦសាន​នឹង​នាំអ្នកវិនិយោគកាន់តែច្រើន​ទៀត​មក​កាន់ខេត្តមណ្ឌលគិរី​ ដើម្បីបណ្ដាក់ទុនវិនិយោគ បង្កើតកាងារជូន​ប្រជាពលរដ្ឋ​ ជាពិសេស​ពលរដ្ឋជនជាតិដើមភាគតិច ជាក់ស្ដែង ​ក្នុងកសិដ្ឋាន​របស់លោក​បច្ចុប្បន្ន​នេះ​ បានផ្ដល់​នូវការងារជូន​ជនជាតិដើមភាគតិចឱ្យ​ទទួល​បានឱកាស​ការងារ និងប្រាក់ចំណូលសម្រាប់ផ្គត់ផ្គង់គ្រួសារ ។ អ្វីដែលពិសេស​ ក្រុមហ៊ុនក៏បាន​បណ្ដុះបណ្ដាល​បងប្អូនជនជាតិដើម​ភាគតិចនូវ​ភាសាអង់គ្លេស​ដើម្បីប្រាស្រ័យ​ទាក់ទង​ជាមួយនឹ​ងភ្ញៀវទេសចបរទេសដែលមកសម្រាក​ និងទស្សនា​នៅក្នុងកសិដ្ឋាន ហើយជាលទ្ធផល បងប្អូន​ជនជាតិដើមភាគតិច​ដែលជា​បុគ្គលិកក៏ចាប់ផ្ដើម​ចេះ​និយាយភាសា​អង់គ្លេសជា​មួយភ្ញៀវទេសចរបរទេស​បានបណ្ដើរ​ៗ ។​

លោក​បន្ថែមថា ដោយសារតែក្រុមហ៊ុននៅតូច​នៅឡើយ ដូច្នេះការ​ផ្ដល់​ការងារ​ជូន​បងប្អូនពលរដ្ឋ​​នៅក្នុង​ខេត្តមណ្ឌលគិរីនៅមានចំនួនតិចតួច ប៉ុន្តែ​សង្ឃឹមថា​តាមរយៈការ​វិនិយោគ​ពីបណ្ដាអ្នកវិនិយោគនានានៅ​ក្នុង​ខេត្ត​មួយនេះ ​នឹ​ងផ្ដល់ការងារជាច្រើនទៀតដល់ពលរដ្ឋ​ក្នុង​តំបន់​ ។​

គួរ​រម្លឹកថា ក្នុងឆ្នាំ២០២៥កន្លង ខេត្តមណ្ឌលគិរី ទទួលបានការអនុម័តលើ​គម្រោងចំនួន២ ដែលជាគម្រោ​ងវិនិយោគ​ប្រវត្តិ​សាស្ត្រ​នៅកម្ពុជា ​គឺគម្រោងវិនិយោគថាមពលអគ្គិសនី​ដើរដោយកម្លាំងខ្យល់ ជាមួយទុនវិនិយោគចំនួន ៤៣០លានដុល្លារអាម៉េរិក​ ហើយនៅក្នុ​ងខែមករា​ឆ្នាំ២០២៦នេះដែរ ខេត្តមណ្ឌលគិរី ក៏ទទួលបានការអនុម័តឱ្យវិនិយោគ​លើ​ថាមពល​អគ្គិសនីដើរ​ដោយកម្លាំង​ខ្យល់​ចំនួន១ទៀត​ ដែលមាន​ទុនវិនិយោគចំនួន ២០០លានដុល្លារអាម៉េរិក ៕