ទីក្រុងឡុងដ៍ ត្រូវបានគេស្គាល់យ៉ាងទូលំទូលាយជាមជ្ឈមណ្ឌលសេដ្ឋកិច្ច ការដឹកជញ្ជូន និងវប្បធម៌ដ៏រីកចម្រើសរបស់ប្រទេសអង់គ្លេស ហើយក្រៅពីនេះវាក៏ជាទីក្រុងដែលសំបូរដោយប្រវត្តិសាស្រ្ត សិល្បៈ និងនយោបាយ ដែលជាគោលដៅទេសចរណ៍ដ៏ពេញនិយម រួមមានទាំងសារមន្ទីរ ហាង ភោជនីយដ្ឋាន និងក្រុមកីឡាជាច្រើនប្រភេទ។

ក្នុងនាមជាទីក្រុងដែលពោរពេញទៅដោយកេរ្ត៍ឈ្មោះ និងជារដ្ឋធានីនៃប្រទេសដ៏អភិវឌ្ឍន៍ និងប្រជាធិបតេយ្យបំផុតផងនោះ ប៉ុន្តែក្រោមកិច្ចខិតខំស្រាវជ្រាវ និងសិក្សាជាច្រើនដោយអ្នកជំនាញបានរកឃើញថា ទីក្រុងឡុងដ៍បច្ចប្បន្ន គឺជាឋានសួគ៌ដ៏មានប្រជាប្រិយសម្រាប់ក្រុមអ្នកលាងលុយខុសច្បាប់ធំបំផុតរបស់ពិភពលោកដែលជារៀងរាល់ឆ្នាំគេអាចព្យាករណ៍បានថា លុយខុសច្បាប់ដល់ទៅជាងរាប់សិបពាន់លានដុល្លារត្រូវបានហូរចូលក្នុងទីក្រុងមួយនេះ។

របាយការណ៍ស្រាវជ្រាវច្រើនប្រភពត្រូវបានយកមកចេញផ្សាយព្រោងព្រាតតាមបណ្តាញសារព័ត៌មានអន្តរជាតិដែលជាភស្តុតាងបង្ហាញយ៉ាងច្បាស់អំពីរឿងរ៉ាវមិនគួរឲ្យនឹកស្មានដល់មួយនេះ។ គេហទំព័រជាច្រើន រួមមានទាំង The Guardian, The Print, Ahram, The Malta Independent, The Equifax UK និង Aicpa-cima ជាដើមជាមួយនឹងចំណងជើងធំៗផ្តោតទៅលើពាក្យក្តៅៗ និងចំៗ ដូចជា Dirty Money, Money Laundering ឬ Fraudsters ជាដើម។

នៅលើគេហទំព័រ​ The Print ដែលជារបាយការណ៍ចេញផ្សាយកាលពីឆ្នាំទៅបានសរសេរបែបនេះថា ៖ អ្នកជំនាញខាងអំពើពុករលួយមួយក្រុមបានបើកការសិក្សាស្រាវជ្រាវអំពីមូលហេតុអ្វីដែលធ្វើឲ្យទីក្រុងឡុងដ៍ក្លាយជាទីក្រុងដ៏សំខាន់ជាងគេបំផុតក្នុងដំណើរការលាងលុយខុសច្បាប់របស់ពិភពលោក ហើយមូលហេតុសំខាន់តែមួយគត់នោះគឺជាកង្វះខាតផ្នែកចំណាត់ការនយោបាយក្នុងការដោះស្រាយបញ្ហាដ៏អាក្រក់មួយនេះ។

ដោយឡែកនៅ The Financial Times វិញបានបញ្ចេញរបាយការណ៍ និងចេញផ្សាយកាលពីឆ្នាំកន្លងទៅដូចគ្នាបានបង្ហាញថា ៖ នៅអង់គ្លេសក្រុមហ៊ុនផ្នែកច្បាប់ចំនួន៣១, ធនាគារចំនួន៨៦ និងវិទ្យាស្ថានអប់រំប្រមាណ១៧៧កន្លែង គឺជាកន្លែងដែលទទួលយក និងជួយធ្វើការផ្ទេរលុយខុសច្បាប់ទាំងនោះពីបណ្តាប្រទេសនានាលើពិភពលោក ជាពិសេសលុយខុសច្បាប់ពីក្រុមហ៊ុនធំៗរបស់រុស្ស៊ី ដែលបានបង្វែរមកអង់គ្លេសដើម្បីជំនួសឲ្យប្លុកអឺរ៉ុបវិញចាប់តាំងតែពីពេលមានជម្លោះជាមួយនឹងអ៊ុយក្រែន។

ក្នុងនោះផងដែរ​ Transparency International UK ក៏បានធ្វើការស្រាវជ្រាវរកឃើញផងដែរថា គិតត្រឹមសកម្មភាពលាងលុយខុសច្បាប់លើតែវិស័យអចលនទ្រព្យប៉ុណ្ណោះ ទីក្រុងឡុងដ៍ក៏កំពុងចុះបញ្ជីអចលនទ្រព្យពាក់ព័ន្ធសរុបដែលមានទំហំដល់ទៅ ៦,៧ពាន់លានផោន ជាពិសេសនៅទីក្រុងឡុងដ៍ និងទីក្រុងក្បែរខាងផ្សេងទៀត ដូចជា Westminster,Kensington និង Chelsea ជាដើម។

Credas ដែលជាក្រុមហ៊ុនអ្នកជំនាញផ្តល់សេវាកម្មផ្ទៀងផ្ទាត់អត្តសញ្ញាណបានប៉ាន់ប្រមាណថា យ៉ាងហោចណាស់លុយខុសច្បាប់ដល់ទៅ៨៨ពាន់លានផោនត្រូវបានចាក់បញ្ចូលនៅក្នុងចក្រភពអង់គ្លេសជារៀងរាល់ឆ្នាំដោយក្នុងនោះភាគច្រើនគឺជាលុយដែលបានមកពីការក្លែងបន្លំ ,​ការគេចពន្ធ ឬដំណើរការឧក្រិដ្ឋកម្ម រួមជាមួយនឹងការសូកប៉ាន់ ឧក្រិដ្ឋកម្មតាមអ៊ីនធឺណិត ការជួញដូរមនុស្ស និងគ្រឿងញៀនខុសច្បាប់៕