សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ មន្រ្តីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ បានជំរុញដល់បណ្តាកសិករគួរចេះជី និងប្រើថ្នាំកមសិកម្មឱ្យត្រូវតាមបច្ចេកទេស ស្របតាមស្ដង់ដារ ដើម្បីអាចធានាបាននូវគុណភាព និងសុវត្ថិភាពខ្ពស់សម្រាប់ប្រើប្រាស់ និងអ្នកទទួលទាន។ ការជំរុញនេះត្រូវបានធ្វើឡើងក្រោយពីមានការរកឃើញថា មានកសិករជាច្រើននៅមិនទាន់មានការយល់ដឹង និងជំនាញក្នុងការប្រើប្រាស់ជីកសិកម្ម ឬថ្នាំពុលកសិកម្ម នៅឡើយ ហើយភាគច្រើនការប្រើប្រាស់ជីកសិកម្មត្រូវបានធ្វើឡើងទៅតាមការចង់ឱ្យដំណាំកសិកម្មរបស់ពួកគេលូតលាស់បានលឿន និងបានទិន្នផលខ្ពស់ ប៉ុន្តែមិនគិតពីផលប៉ះពាល់ទៅលើសុខភាព។
ឯកឧត្តម គង់ ច័ន្ទវាសនា រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ ក្នុងកម្មវិធីបើកវគ្គបណ្តុះបណ្តាលអប់រំសមត្ថភាពវិជ្ជាជីវៈ ដល់អាជីវករលក់ជី-កសិកម្ម នៅក្នុងខេត្តស្ទឹងត្រែង កាលពីថ្ងៃដើមសប្ដាហ៍នេះថា គោលនយោបាយក្នុងវិស័យកសិកម្ ដែលផ្តោតលើការធានាសន្តិសុខស្បៀង លើកកម្ពស់ជីវភាពកសិករ និងការរួមចំណែកទ្រទ្រង់សេដ្ឋកិច្ចជាតិ ជាពិសេស ទស្សនទាន “មានហូប មានប្រើ មានបាន និងមានរហូត” ដែលក្រសួងកំពុងជំរុញអនុវត្តយ៉ាងសកម្ម។
ឯកឧត្តមបានសង្កត់ធ្ងន់ថា ៖
«សន្តិសុខស្បៀង ទាំងសម្រាប់កសិករ ទាំងសម្រាប់អ្នកទទួលទានក្នុងស្រុក មិនថាក្នុងកាលៈទេសៈណា ឬសេដ្ឋកិច្ចកម្ពុជារីកចចម្រើនយ៉ាងណា គឺជាអាទិភាពខ្ពស់បំផុតនៃវិស័យកសិកម្មកម្ពុជា។ កម្មវិធីគោលនយោបាយអាទិភាពទី៥ និងទី៦ របស់រាជរដ្ឋាភិបាល នីតិកាលទី៧ ដែលរួមមាន យន្តការរក្សាលំនឹងថ្លៃកសិផលសំខាន់ៗ ការដាក់ពង្រាយមន្រ្តីកសិកម្មឃុំ និងការអភិវឌ្ឍសហគមន៍កសិកម្មទំនើប និងបានណែនាំដល់អាជីវករជី-ថ្នាំកសិកម្ម ឱ្យជួយណែនាំដល់ប្រជាកសិករក្នុងការប្រើប្រាស់ជី-ថ្នាំកសិកម្ម ស្របតាមស្តង់ដារបច្ចេកទេស ប្រកបដោយគុណភាព និងសុវត្ថិភាព ដើម្បីជួយកាត់បន្ថយថ្លៃដើមផលិត»។
សូមជម្រាបថា រាជរដ្ឋាភិបាលកម្ពុជានៅតែចាត់ទុកវិស័យកសិកម្មជាវិស័យអាទិភាព ដោយបានកំណត់យ៉ាងច្បាស់ថា វិស័យកសិកម្មនៅតែមានតួនាទីសំខាន់ក្នុងការទ្រទ្រង់កំណើនសេដ្ឋកិច្ច ធានាសមធម៌ ធានាសន្តិសុខស្បៀង និងជំរុញការអភិវឌ្ឍសេដ្ឋកិច្ចជនបទ។
ចក្ខុវិស័យរបស់រាជរដ្ឋាភិបាល គឺការធ្វើទំនើបកម្មវិស័យកសិកម្មកម្ពុជាតាមអភិក្រម ក្នុងវិសាលភាព និងល្បឿនថ្មី ដើម្បីប្រែក្លាយវិស័យនេះពីដំណាក់កាលនៃការអភិវឌ្ឍតាមបែបវិបុលកម្ម(បើកទូលាយ) ទៅពឹងផ្អែកជាសំខាន់លើធនធានមានស្រាប់ (ធនធានជី និងធនធានធម្មជាតិ) និងពឹងផ្អែកលើការប្រើប្រាស់ធាតុចូលកសិកម្មតាមបែបប្រពៃណីឈានទៅរកដំណាក់កាលថ្មី ដែលផ្តោតលើផលិតកម្មតាមបែបប្រពលវប្បកម្ម(ស៊ីជម្រៅ) ដោយពឹងផ្អែកជាសំខាន់លើការប្រើប្រាស់បច្ចេកទេស បច្ចេកវិទ្យាថ្មី ការស្រាវជ្រាវ និងការអភិវឌ្ឍយន្តបនីយកម្ម ព្រមទាំងការបង្កើនសមត្ថភាពស្រោចស្រព ដើម្បីលើកកម្ពស់ផលិតភាព ពិពិធភាវូបនីយកម្មមុខដំណាំ និងផលិតផលកសិកម្មផ្សេងទៀត រួមទាំងការចិញ្ចឹមសត្វ និងវារីវប្បកម្មផងដែរ ដោយគិតគូរអំពីភាពចាំបាច់ក្នុងការគ្រប់គ្រងដីធ្លីប្រកបដោយប្រសិទ្ធភាព ការធានាដល់បរិស្ថាន និងធនធានធម្មជាតិ៕
Account
Security
Favourite Content