សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ គិតត្រឹមខែវិច្ឆិកានេះ បំណុលសរុបរបស់ប្រទេសអាមេរិកត្រូវបានគេមើលឃើញថាកើនឡើងដល់កំណត់ត្រាខ្ពស់បំផុតក្នុងប្រវត្តិសាស្ត្រ ពោលគឺកើនឡើងដល់ប្រមាណជាជាង៣៦ទ្រីលានដុល្លារ។
គេហទំព័រ និងសារព័ត៌មានក្នុងស្រុកជាច្រើនបានចេញផ្សាយរបាយការណ៍នេះកាលពីថ្ងៃសុក្រសប្តាហ៍មុនដែលក្នុងនោះមានទាំង US Debt Clock និង Finsyn.com ជាដើម។ តួលេខបានបង្ហាញថាកំណើនបំណុលបានហក់ឡើងក្នុងអត្រាដល់ទៅ៦ភាគរយធៀបទៅនឹងពេលវេលាដូចគ្នាកាលពីខែមករាដល់ខែវិច្ឆិកាឆ្នាំកន្លងទៅ។
បំណុលក្នុងចន្លោះពេល៤ខែចុងក្រោយនេះមានការកើនឡើងប្រមាណជា១ទ្រីលានដុល្លារ ឬប្រមាណជា២ទ្រីលានដុល្លារក្នុងរយៈពេលមួយឆ្នាំចុងក្រោយដោយក្នុងនោះកាលពីចុងខែកក្កដាតួលេខនេះបានឡើងពី៣៤ទ្រីលានដុល្លារទៅដល់៣៥ទ្រីលានដុល្លារ។
យ៉ាងណាក្តី រតនាគារជាតិមិនទាន់ហ៊ានធ្វើការប្រកាសជាផ្លូវការ និងទទួលស្គាល់របាយការណ៍ណាមួយនៅឡើយទេ ខណៈដែលគេសង្កេតឃើញទៀតថាតួលេខបំណុលនៅក្នុងការតាមដានប្រចាំថ្ងៃមានការកើនឡើងខ្លាំងដោយគិតត្រឹមខែមករា មាន ៣៤ទ្រីលានដុល្លារ ហើយកើនឡើង១ទ្រីលានដុល្លារក្នុងរយៈពេលមិនដល់ពេល៦ខែផង។
កាលពីខែសីហាកន្លងទៅ ការិយាល័យកិច្ចការងារថវិការបស់សភាជាតិអាមេរិកបានរាយការណ៍អំពីការព្យាករណ៍ទុករបស់ខ្លួនថា បំណុលជាតិនឹងកើនឡើងដល់កំណត់ត្រាជាង១០៦ភាគរយនៃផលិតផលក្នុងស្រុកសរុប ( GDP ) នៅត្រឹមឆ្នាំ២០២៧ និងទៅដល់១២២ភាគរយនៅត្រឹមឆ្នាំ២០៣៤។ មិនត្រឹមតែប៉ុណ្ណោះ មូលនិធិរូបិយវត្ថុអន្តរជាតិហៅកាត់ថា IMF បានគូសបញ្ជាក់អំពីស្ថានភាពអាក្រក់បន្ថែមទៀតនៅក្នុងរបាយការណ៍ទស្សនវិស័យសេដ្ឋកិច្ចអាមេរិករបស់ខ្លួននៅក្នុងខែកក្កដា ដែលស្ថិតក្រោមគោលនយោបាយបច្ចុប្បន្នថា បំណុលរបស់រដ្ឋអាចរំពឹងថានឹងកើនឡើងជាលំដាប់ និងលើសពី១៤០ភាគរយនៃ GDP នៅក្នុងឆ្នាំ២០៣២។ IMF បានព្រមានកាលពីខែកក្កដាថា បញ្ហាឱនភាពសារពើពន្ធខ្ពស់ និងការកើនឡើងជាបន្តបន្ទាប់នៃបំណុលសាធារណៈរបស់សហរដ្ឋអាមេរិកចំពោះ GDP នឹងបង្កហានិភ័យមិនត្រឹមតែសម្រាប់សហរដ្ឋអាមេរិកប៉ុណ្ណោះទេ ថែមទាំងសេដ្ឋកិច្ចពិភពលោកផងដែរ ហើយថែមទាំងបានសង្កត់ធ្ងន់ថា ត្រូវតែមានការចាត់វិធានការជាបន្ទាន់សម្រាប់ការកែតម្រូវសារពើពន្ធនៅក្នុងពេលនេះ។
គួរឲ្យដឹងដែរថា ថ្មីៗនេះ មហាសេដ្ឋីបច្ចេកវិទ្យា លោក Elon Musk ដែលប្រធានាធិបតីជាប់ឆ្នោត Donald Trump កំពុងស្វែងលទ្ធភាពក្នុងការតែងតាំងជាអ្នកគ្រប់គ្រងអង្គភាពថ្មីរបស់រដ្ឋដើម្បីបង្កើនប្រសិទ្ធភាពរដ្ឋាភិបាលក្នុងការចំណាយថវិកាជាតិនាពេលខាងមុខនោះក៏បានព្រមានដូចគ្នាដែរថា សហរដ្ឋអាមេរិកកំពុងប្រទះនឹងហានិភ័យក្នុងការសងបំណុលរបស់ខ្លួន៕
Account
Security
Favourite Content