សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ផ្លូវជាតិលេខ៧៦ បានក្លាយជាមធ្យោបាយដ៏សំខាន់មួយសម្រាប់ឆ្លងកាត់ទៅភូមិភាគឦសាននៃប្រទេសកម្ពុជា និងបានចូលរួមក្នុងការជំរុញវិស័យទេសចរណ៍ និងការវិនិយោគទៅកាន់តំបន់នោះ ស្របពេលដែលរាជរដ្ឋាភិបាលក៏បានដាក់ចេញនូវកម្មវិធីជំរុញការវិនិយោគនៅក្នុងខេត្តចំនួន៤ស្ថិតនៅភាគគឦសាននេះដែរ។
បើតាមក្រសួងសាធារណការ និងដឹកជញ្ជូនបានបញ្ជាក់ថា ក្រោយពីបានសាងសង់ផ្លូវជាតិលេខ៧៦ រួចរាល់ បានក្លាយជាផ្លូវយុទ្ធសាស្ត្រ និងជាសរសៃឈាមក្នុងវិស័យដឹកជញ្ជូនទៅកាន់ទីផ្សារក្នុងស្រុក និងនាំចេញទៅក្រៅប្រទេស ក៏ដូចជាបម្រើដល់វិស័យទេសចរណ៍ ជួយកាត់បន្ថយពេលវេលាធ្វើដំណើរ ផ្តល់ផាសុកភាព អមជាមួយទេសភាពដ៏ស្រស់បំព្រងសងខាងផ្លូវគួរជាទីទាក់ទាញ។
ផ្លូវជាតិដ៏សំខាន់មួយខ្សែនេះមានប្រវែងសរុបជាង ៣០៦គីឡូម៉ែត្រ ក្រាលកៅស៊ូ DBST ចាប់ផ្តើមចេញពីស្រុកស្នួល ខេត្តក្រចេះ រហូតដល់ស្រុកកូនមុំ ខេត្តរតនគិរី ក្នុងនោះផ្លូវជាតិលេខ៧៦-៤ ក៏បានតភ្ជាប់ទៅកាន់ច្រកព្រំដែនដាក់ដាំ ក្នុងខេត្តមណ្ឌលគិរី ផងដែរ ។
ជាការកត់សម្គាល់បានបង្ហាញឱ្យឃើញថា ទីណាមានការអភិវឌ្ឍលើហេដ្ឋារចនាសម្ព័ន្ធ ផ្លូវថ្នល់ និងអគ្គិសនី ទីនោះតែងតែទទួលបានការវិនិយោគច្រើន ខណៈដែលតំបន់មួយចំនួននៅតាមបណ្ដោយផ្លូវលេខ៧៦នេះដែរ ក៏រំពឹងថានឹងទទួលបានការវិនិយោគច្រើននាពេលអនាគតឆាប់ៗនេះផងដែរ ។ អ្វីដែលសំខាន់ តាមរយៈផ្លូវនេះដែរ នឹងជួយសម្រួលដល់ការអនុវត្តគម្រោងនៃកម្មវិធីពិសេសជំរុញការវិនិយោគក្នុងខេត្តទាំង៤ នៅភូមិភាគឦសាន របស់រាជរដ្ឋាភិបាលកម្ពុជា រួមមាន ខេត្តក្រចេះ ស្ទឺងត្រែង មណ្ឌលគិរី និងរតនគិរី ដែលត្រូវបានប្រកាសដាក់ឱ្យអនុវត្តកាលពីដើមខែមេសា ឆ្នា២០២៥ ក្រោមអធិបតីភាពសម្ដេចមហាបរវធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។
នៅក្នុងពិធីប្រកាសនោះដែរ សម្ដេចធិបតី បានដាក់ចេញនូវទស្សនចំនួន៣ ដើម្បីឱ្យអនុវត្តន៍រួមមាន ៖ ទី១. កែប្រែមុខមាត់នៃខេត្តទាំង៤ នៅភូមិភាគឦសាន ឲ្យក្លាយជាខេត្តដែលមានមូលដ្ឋានសេដ្ឋកិច្ចពឹងផ្អែកលើកសិកម្ម, កសិ-ឧស្សាហកម្ម និងទេសចរណ៍ ឈរលើកត្តាទាយជ្ជទានរបស់ខេត្តនីមួយៗ និង ដោយមានភាពប្រទាក់ក្រឡាគ្នា ជាមួយនឹងគោលនយោបាយជាតិនានា។ ទី២. ដោះស្រាយបញ្ហាប្រឈមជាក់ស្តែង ដែលនាំមកនូវលទ្ធផលរហ័ស ជាពិសេស កត្តាជំរុញការទាក់ទាញវិនិយោគឯកជន និងទី៣. ជំរុញសហថាមពលដែលកើតចេញពីការប្រមូលផ្តុំ (Clustering Effects) ដើម្បីឈានទៅអភិវឌ្ឍន៍សេដ្ឋកិច្ចមាត្រដ្ឋាន (Economies of Scale) ជាជាងការវិនិយោគដែលមានលក្ខណៈរាយប៉ាយ និងមិនអាចផ្សារភ្ជាប់គ្នាបាន ។
គួររម្លឹកថា តំបន់ឦសាន ជាពិសេសនៅខេត្តរតនគិរី និងមណ្ឌលគិរី ជាខេត្តដែលមានសក្ដានុពលខ្ពស់ក្នុងការវិនិយោគ និងដាំដុះលើតំបន់កាហ្វេ ខណៈកម្ពុជាមានតម្រូវការគ្រាប់កាហ្វេកាន់តែខ្ពស់ពីមួយឆ្នាំទៅមួយឆ្នាំ ខណៈការផ្គត់ផ្គង់នៅក្នុងស្រុកវិញមានចំនួនតិចតួចនៅឡើយ ។
លោក ឌុក ពិសិដ្ឋ ប្រធានសមាគមកាហ្វេកម្ពុជា បានថ្លែងឱ្យដឹងថា ខេត្តមណ្ឌលគិរី និងរតនគិរី ជាខេត្តដែលមានសក្ដានុពលខ្ពស់លើដំណាំកាហ្វេ ហើយវិនិយោគិនអាចពិចារណាក្នុងការវិនិយោគលើដំណាំកាហ្វេនៅខេត្តទាំងពីរដើម្បីផ្គត់ផ្គង់ក្នុងស្រុក ពីព្រោះតែតម្រូវការកាហ្វេកើនឡើងខ្ពស់ពីមួយឆ្នាំទៅមួយឆ្នាំ ។
លោកបញ្ជាក់ថា៖ ខេត្តមណ្ឌលគិរី និងរតនគិរី ជាខេត្តនៅជាប់នឹងប្រទេសវៀតណាម ហើយតំបន់នៃប្រទេសវៀតណាមដែលជាប់ខេត្តទាំងពីរនេះ មានការផលិតកាហ្វេបានច្រើនដើម្បីនាំចេញទៅកាន់ទីផ្សារពិភពលោក ដូច្នេះខេត្តទាំងពីរនេះក៏អាចដាំកាហ្វេបានដូចគ្នាផងដែរ៕
Account
Security
Favourite Content