សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សៀមរាប ៖ នាងអំ ដែលជាឈ្មោះអង្ករមួយប្រភេទដែលមានប្រភព និងបង្កាត់ពូជ ដាំដុះ ដោយលោកយាយមួយម្នាក់ឈ្មោះថា អំ នៅឃុំស្វាយជ្រះ ស្រុកស្នួល ខេត្តក្រចេះ កំពុងទទួលបានការចាប់អារម្មណ៍ និងសន្ទុះនៃតម្រូវការកើនឡើងខ្ពស់។
បើយោងតាមការចុះផ្សាយរបស់ក្រសួងកសិកម្មបានឱ្យដឹងពីប្រវត្តិអង្ករនាងអំ ថា នៅថ្ងៃមួយនាសម័យគេកាប់ដឹកជញ្ជូនឈើជាច្រើនក្នុងទសវត្សរ៍ប្រមាណជាទី ៨០ ក្រោយការប្រមូលផលស្រូវចម្ការអស់ហើយ នាងអំ ឬយាយអំ បានឃើញស្រូវមួយគុម្ពនៅជាយចម្ការ ដោយមានគ្រាប់ប្លែកពីស្រូវ ដែលបានច្រូតហើយ ហើយក៏បូតយកគ្រាប់ស្រូវនោះបានប្រមាណមួយទូកដៃ ខ្ចប់នឹងក្រណាត់តូចយ៉ាងស្អាតយកទៅរក្សាទុក។
លុះដល់រដូវសាបព្រោះ ក៏យកទៅដាំដុះលើដីដាច់ដោយឡែក ក្រោយមកប្រមូលផលបានប្រមាណមួយល្អីតូច ហើយក៏សាបព្រោះបន្តទៀត ដោយការដណ្តាំបាយសាកល្បង ឃើញថា ពូជស្រូវនេះមានរសជាតិឆ្ងាញ់ហើយក្រអូបទៀត។
យាយអំតាំងពីថ្ងៃនោះមក ក៏ផ្សព្វផ្សាយដោយខ្លួនឯងផ្ទាល់ ដោយចែករំលែកពូជជូនអ្នកស្រុកម្នាក់បន្តិចៗឱ្យធ្វើការសាកល្បង ដែលរហូតប្រមាណ ១០ ឆ្នាំក្រោយមក អង្ករនាងអំត្រូវបានទទួលស្គាល់ស្ទើរគ្រប់មជ្ឈដ្ឋានក្នុងឃុំ ហើយក៏ល្បីសាយភាយមកដល់ទីរួមខេត្តទៀត ដែលមកទល់ពេលនេះលោកយាយចង់ឱ្យកូនចៅបន្តពូជស្រូវនេះ ដោយបន្សុទ្ធពូជឱ្យបានល្អ កុំឱ្យបាត់គុណភាពដើម ដែលគេបានយកឈ្មោះលោកយាយទៅដាក់ជាសម្គាល់ពូជនោះ។
មកទល់បច្ចុប្បន្ននេះ បើទោះពុំទាន់ល្បីល្បាញខ្លាំងដូចប្រភេទអង្ករល្បីៗ ដូចជាអង្ករ ផ្កាម្លិះ ឬរំដួលក្តី តែអង្ករនាងអំ កំពុងទទួលបានការចាប់អារម្មណ៍ មានតម្រូវការកើនឡើងខ្លាំង ហើយការដាំដុះទៀតសោត គឺមានភាពងាយស្រួល។ នេះបើតាមការឲ្យដឹងពី លោកស្រី ឈឺន សុភាសី ហៅស្រី មុំ ដែលជាម្ចាស់ហាងអង្ករស្រីមុំកៅសិបប្រាំបួន ដែលលក់តែអង្ករនាងអំ សុទ្ធ។
លោក ស្រី មុំ ដែលអ្នកជាផលិតអង្ករនាងអំដោយខ្លួនឯងលើផ្ទៃដីជាង ២០០ ហិតា និងលក់ដោយខ្លួនឯងបានឱ្យដឹងថា ៖
“ពាក់ព័ន្ធនឹងតម្រូវការអង្ករនាងអំ នាពេលបច្ចុប្បន្ននេះ សម្រាប់ហាងនាងអំ របស់ខ្ញុំ និយាយរួម ពេលដែលផ្តើមសាងអង្ករនាងអំ នេះនៅលើទីផ្សារ ខ្ញុំឃើញថា តម្រូវការរបស់អតិថិជនយើងចេះតែកើនឡើងបន្តបន្ទាប់ តាមរយៈការផ្សព្វផ្សាយរបស់យើង តាមរយៈការទិញយកទៅសាកញុំា តាមរយៈបងប្អូនជួយណែនាំ យើងឃើញថា តម្រូវការនិងការគាំទ្រ ចេះតែបន្តកើនឡើង”
លោក ស្រី មុំ បានបន្តទៀតថា ៖
“វាចាប់ផ្ដើមប្រសើរពីមួយថ្ងៃទៅមួយថ្ងៃ […] ប្រហែល ១៦ទៅ១៧លាននាក់ ភាគច្រើនស្គាល់តែពូជ ម្លិះ រំដួល ផ្កាភ្ញី ហើយចំណែកអង្ករនាងអំនេះពុំទាន់មានអ្នកស្គាល់ច្រើនទេ។ ពេលដែលខ្ញុំយកមកលក់ដំបូងក៏មានអ្នកឆ្ងល់ដែរ តែក្រោយពេលបានភ្លក់ហើយ គាត់ជាប់ចិត្ត ស្ទើរតែថា ១០ នាក់គាត់ទិញទៅ មានតែម្នាក់អីទេដែលគាត់ញុំាមិនត្រូវមាត់មិនត្រូវចិត្ត”
ដោយឡែក ពូជស្រូវដែលមានប្រភពមកពីខេត្តក្រចេះនេះ មានលក្ខណៈពិសេសប្លែកគេគឺធន់នឹងអាកាសធាតុ ងាយស្រួលថែទាំ ដាំដុះ ហើយអង្ករក៏ដូចគ្នាក្រោយពេលចម្អិនរួចរាល់ហើយមានភាពទន់ បើដាក់ទឹលជ្រុលគឺមិនរអៀច។
លោក ស្រី មុំ ជាម្ចាស់អាជីវកម្មអង្ករ និងជាអ្នកដាំដុះអង្ករមួយប្រភេទនេះ បានបញ្ជាក់ឱ្យដឹងថា៖
“ខ្ញុំចង់បញ្ជាក់ថា ស្រូវនាងអំ គឺជាដើមស្រូវម្យ៉ាងដែលមានសុខភាពរឹងមាំពីកំណើត ដែលធន់នឹងអាកាសធាតុ បើទោះបីជាមេឃរាំង មេឃមិនមានភ្លៀង ខ្វះទឹក ១០ថ្ងៃ ឬ ២០ថ្ងៃ អីក៏ស្រូវនឹងនៅតែធន់បាន”
លោកស្រី បានបន្តថា ៖
“បើទោះមានទឹកជន់លេចក៏ស្រូវប្រភេទនេះធន់បាន ពោលគឺងាយស្រួលដាំដុះ តែម្តង ពិសេសក្នុងតំបន់ខ្ញុំ ព្រោះខ្ញុំបានពិសោធន៍ស្រូវច្រើន វាអត់ដូចស្រូវនាងអំទេ ស្រូវនាងអំ គឺជាពូជស្រូវម្យ៉ាងដែលងាយស្រួលថែទាំ ងាយស្រួលដាំដុះ មិនចាំបាច់ប្រើជីគីមីអីដែរ”
ចំណែកឯលក្ខណៈពិសេស ពេលដែលស្រូវពូជនាងអំ ចេញទៅជាអង្ករ លោកស្រី មុំ បាននិយាយថា រូបសម្បត្តិរបស់អង្ករមួយនេះមិនស្អាតដូចអង្ករផ្សេងទេ ដោយសារគ្រាប់អង្ករនាងអំ គឺជាពូជម្យ៉ាងគ្រាប់ខ្លីៗ ដូច្នេះវាមិនស្រឡូនល្អដូចពូជអង្ករដទៃ តែបើនិយាយពីគុណភាព រសជាតិ ឆ្ញាញ់មិនចាញ់អង្ករល្បីៗ ព្រមទាំងមានក្លិនក្រអូបគួរសម។
លោក ស្រី មុំ ថ្លែងបន្តថា ៖
“លក្ខណៈពិសេសមួយទៀតរបស់អង្ករនាងអំ ពេលយើងដាំទៅវាទន់ តែវាអត់រអៀច គេហៅថាទន់ស្ងួត វាអត់ពិបាកដូចអង្ករខ្លះ។ បើយើងជ្រុះទឹកវាទៅជាបាយរអៀច ញុំាមិនឆ្ងាញ់ទេហើយអង្ករនាងអំនេះ ទន់ស្ងួត មានទម្ងន់គ្រាប់អង្ករ គឺធ្ងន់ជាងអង្ករផ្សេងៗ ពេលញុំាបាយអង្ករនាងអំ វាធ្ងន់ពោះ មិនងាយឃ្លានដូចអង្ករដទៃ ដូចថាវាឆ្អែតបានយូរ”
ជុំវិញការពូជស្រូវនាងអំ នេះ លោកស្រីបានបញ្ជាក់ថា គឺជាប្រភេទស្រូវវស្សា តែក៏ប្រកាន់រដូវដែរ បើទោះកសិករព្រួសនៅក្នុងខែ ៧ (ខែកក្កដា) ឬដាំពីខែ ៤ (ខែមេសា) ទៅក្តី ក៏នៅតែទទួលផលនៅពាក់កណ្តាលខែ ១១ (ខែវិច្ឆិកា) ពីចន្លោះថ្ងៃ ១៥ ដល់ថ្ងៃ ២៥ ដូចគ្នា។
ចំណែកឯផលវិបាកវិញ ម្ចាស់ ហាងអង្ករ ស្រីមុំ៩៩ បានឱ្យដឹងថា ៖
“អ្វីដែលផលជាផលលំបាកនោះគឺ យើងអាចធ្វើបានតែម្តងគត់ក្នុងមួយឆ្នាំ ព្រោះវាជាប្រភេទស្រូវចម្ការស្រូវវស្សាហើយ វាមិនអាចទៅបង្កាត់ពូជ មួយឆ្នាំ ធ្វើម្តង ឬពីរដងបានទេ”
លោកស្រី បានបន្ត ៖
“មួយវិញទៀត អ្វីដែលពិបាកពិតនោះ គឺវាអាស្រ័យទៅលើហាងឆេងស្រូវទៅវិញ តែបើថា ការដាំដុះថែទាំ ដូចជាមិនពិបាកពេកទេ”
លោក ស្រី មុំ ក៏បានជម្រាបថា អង្ករនាងអំ មានតម្លៃប្រហាក់ប្រហែលនឹងតម្លៃអង្ករដទៃទៀតនៅលើទីផ្សារ មិនលើគេទេ ហើយពេលខ្លះ អាចនឹងក្រោមគេទៅទៀត។
ក្រោយមានតម្រូវការកើនឡើងខ្លាំង លោក ស្រី មុំ បានបង្ហើបថាពីគម្រោងបន្ទាប់ថា៖
“បងមើលឃើញថាសន្ទុះនៃតម្រូវការអង្ករនាងអំមានការកើនឡើងច្រើន គឹលើសការរំពឹងទុក ហើយយើងមានគម្រោងដែរ នៅឆ្នាំនេះ យើងមានគម្រោងបង្កើតជាសហគមន៍ ដើម្បីពង្រីកទីផ្សារអង្ករនាងអំ ឱ្យបានច្រើនជាងឆ្នាំនេះទៅទៀត៕”
Account
Security
Favourite Content