សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ខណៈដែលចំណុចលេចធ្លោជាច្រើនបាន និងកំពុងកើតមាននៅក្នុងសហគមន៍អេកូទេសចរណ៍ទឹកធ្លាក់អូរជាំ បានជំរុញឱ្យប្រជាសហគមន៍ គណកម្មការសហគមន៍ ក៏ដូចជាក្រសួងបរិស្ថានផ្ទាល់ ដាក់ការរំពឹងខ្ពស់លើការទាញចំណូលចូលក្នុងតំបន់ ខណៈសម្រស់ទឹកធ្លាក់ដ៏ស្រស់ស្អាតបានទាក់ទាញទេសចរឱ្យចូលទៅលេងកម្សាន្ដ និងជួយឱ្យប្រជាពលរដ្ឋក្នុងតំបន់រកចំណូលបានពីវិស័យទេសចរណ៍។
ខុសពីទឹកជ្រោះនៅតំបន់ផ្សេង ទឹកជ្រោះក្នុងសហគមន៍អូរជាំ នៅតែបន្តហូរទម្លាក់ខ្លួនពីលើភ្នំសំកុសមកមិនថាខែប្រាំង ឬខែវស្សានោះទេ។ ក្រៅពីទឹកជ្រោះ សហគមន៍មួយនេះមាននូវព្រៃឈើ ក៏ដូចជាជីវៈចម្រុះជាច្រើន ដែលអំណោយផលដល់ការដើរកម្សាន្ដបែបផ្សងព្រេង បោះតង់ មើលផ្កាយជាដើម។
ក្រៅតែជាតំបន់ទេសចរណ៍ធម្មជាតិ កាលពីដើមខែកុម្ភៈ ឆ្នាំ២០២៣ កន្លងទៅនេះ ក្រសួងបរិស្ថានក៏បានចាប់អនុវត្តការដាំក្រវាញលើសហគមន៍ចំនួនពីរ ហើយសហគមន៍អូរជាំជាសហគមន៍មួយក្នុងចំណោមសហគមន៍ពីរដែលត្រូវបានជ្រើសរើស។ ការដាំក្រវាញក្នុងសហគមន៍អូរជាំនេះផងដែរ នឹងត្រូវអនុវត្តលើផ្ទៃដីទំហំ៥ហិកតា ដែលជាការសាកល្បងទ្រង់ទ្រាយធំមួយ ហើយប្រសិនបើការដាំនៅក្នុងតំបន់នេះទទួលបានលទ្ធផលល្អ សហគមន៍អូរជាំអាចនឹងក្លាយជាទីតាំងដែលចែកចាយពូជក្រវាញទៅឱ្យសហគមន៍ផ្សេងទៀត ឬលក់ឱ្យឈ្មួញដែលមានបំណងចង់ដាំ។
របកគំហើញថ្មីមួយទៀតនៅក្នុងសហគមន៍មួយនេះ គឺ «បឹងអូរជាំ» ឬ «ទន្លេផែន» បានក្លាយជាទំពក់ដ៏រឹងមុំាក្នុងការទាក់ទាញទេសចរជាច្រើននាក់ឱ្យចូលទៅកម្សាន្ដនៅតំបន់អូរជាំ។ ជាក់ស្ដែង ត្រឹមរយៈពេលប្រមាណជាជិត១ខែបន្ទាប់ពីរកឃើញទន្លេផែន អាត្រាភ្ញៀវដែលចូលទៅ លេងក្នុងសហគមន៍អូរជាំបានកើនឡើងរហូតដល់ ៣០% ដែលជាអាត្រាមិនធ្លាប់មានពីមុនមក។
លោក គីម សុង ប្រធានសហគមន៍ទេសចរណ៍ទឹកធ្លាក់អូរជាំបានបង្ហាញនូវក្ដីរំពឹងខ្ពស់ថា លក្ខណៈពិសេសរបស់សហគមន៍ទាំងថ្មី ទាំងចាស់នេះ នឹងអាចក្លាយជាមុខរបរដ៏សំខាន់ក្នុងការលើកស្ទួយជីវភាពប្រជាជនទាំងជាង១ពាន់នាក់។ ម្យ៉ាងទៀត ក្រសួង ស្ថាប័នដែលពាក់ព័ន្ធក៏កំពុងធ្វើការកែលម្អហេដ្ឋារចនាសម្ព័ន្ធក្នុងតំបន់នេះ ដើម្បីផ្ដល់ភាពងាយស្រួលដល់ភ្ញៀវទេសចរ ក៏ដូចជាដើម្បីការអភិវឌ្ឍក្នុងតំបន់ផងដែរ៕
Account
Security
Favourite Content