បរទេស៖ យោងតាមប្រភពព័ត៌មានពីរ៉យទ័របានរាយការណ៍ថា តម្លៃប្រេងបានធ្លាក់ចុះជាង ២ ភាគរយ បន្ទាប់ពីប្រធានាធិបតីអាមេរិក Donald Trump អំពាវនាវឲ្យមានកិច្ចពិភាក្សាការទូតរវាងរុស្ស៊ី និងអ៊ុយក្រែន។

ថ្មីៗនេះ តម្លៃប្រេងឆៅម៉ាក Brent បានធ្លាក់ចុះ ២,៣៦ ភាគរយ ឬ ៧៥,១៨ ដុល្លារក្នុងមួយបារ៉ែល ខណៈដែលតម្លៃប្រេងឆៅម៉ាក West Texas Intermediate (WTI) បានធ្លាក់ចុះ ២,៦៦ ភាគរយ ឬ ៧១,៣៧ ដុល្លារក្នុងមួយបារ៉ែល។ តម្លៃប្រេងបានធ្លាក់ចុះបន្ទាប់​ពី​ប្រធានាធិបតីសហរដ្ឋ​អាម៉េរិក លោក Donald Trump បានពិភាក្សាអំពីបញ្ហាសង្គ្រាមនៅអ៊ុយក្រែនតាមរយៈទូរស័ព្ទជាមួយប្រធានាធិបតីរុស្ស៊ី Vladimir Putin និងប្រធានាធិបតីអ៊ុយក្រែន Volodymyr Zelenskiy។

នៅក្នុងការបង្ហោះនៅលើវេទិកាប្រព័ន្ធផ្សព្វផ្សាយសង្គមរបស់ Trump លោកបានអះអាងថា ប្រធានាធិបតីរុស្ស៊ី Vladimir Putin បានយល់ព្រមឱ្យក្រុមរៀងៗខ្លួនចាប់ផ្តើមការចរចា។ បន្ទាប់មក Trump បានហៅទូរស័ព្ទទៅកាន់ប្រធានាធិបតីអ៊ុយក្រែន Volodymyr Zelenskiy ដើម្បីជូនដំណឹងអំពីកិច្ចចរចានេះ។

គួរឲ្យបញ្ជាក់ដែរថា រុស្ស៊ី គឺជាប្រទេសផលិតប្រេងធំជាងគេទី ៣ របស់ពិភពលោក ប៉ុន្តែរងការដាក់ទណ្ឌកម្មលើការនាំចេញប្រេងឆៅរបស់ខ្លួនជុំវិញសង្គ្រាមជាមួយនឹងអ៊ុយក្រែន ដែលជាមូលហេតុនាំឲ្យ​​រំខាន​ដល់​ការ​ផ្គត់ផ្គង់ និងជំរុញតម្លៃប្រេងកាន់តែឡើងថ្លៃ។ មិនត្រឹមតែប៉ុណ្ណោះ រុស្ស៊ីគឺជាសមាជិករបស់អង្គការនៃប្រទេសនាំចេញប្រេង និងសម្ព័ន្ធមិត្ត OPEC+ ដើរតួនាទីយ៉ាងសំខាន់ក្នុងផលិតកម្មប្រេងពិភពលោក។ ប្រសិនបើការចរចាសន្តិភាពអាចបន្ធូរបន្ថយភាពតានតឹងនៃសង្គ្រាម ទណ្ឌកម្មលើការនាំចេញប្រេងរបស់រុស្ស៊ីអាចត្រូវបានដកចេញ ឬ  បន្ធូរបន្ថយ ហើយរុស្ស៊ីអាចនឹងបង្កើនការនាំចេញប្រេងរបស់ខ្លួនដែលនាំឱ្យការផ្គត់ផ្គង់លើសតម្រូវការ និងតម្លៃធ្លាក់ចុះ។  

លោក Phil Flynn អ្នកវិភាគជាន់ខ្ពស់របស់ក្រុមហ៊ុន Price Futures Group បានលើកឡើងថា ស្របពេលដែល Trump កំពុងធ្វើកិច្ចចរចាសន្តិភាព វាអាចមានហានិភ័យមួយចំនួនចេញពីតម្លៃប្រេងនៅពេលនេះ។ ទន្ទឹមនឹងនេះ វិនិយោគិនកំពុងព្យាករណ៍លើការផ្លាស់ប្តូរបន្ទាប់របស់ធនាគារកណ្តាលអាម៉េរិកលើការកាត់បន្ថយអត្រាការប្រាក់ បន្ទាប់ពីមានការអត្ថាធិប្បាយដោយប្រធានធនាគារ Jerome Powell។ បន្ថែមពីនេះ ទិន្នន័យបង្ហាញថា តម្លៃអ្នកប្រើប្រាស់របស់សហរដ្ឋអាមេរិកបានកើនឡើងច្រើនជាងការរំពឹងទុកនៅក្នុងខែមករា។ នៅពេលដែលសេដ្ឋកិច្ចស្ថិតក្នុងស្ថានភាពល្អ ធនាគារកណ្តាលអាម៉េរិក មិនប្រញាប់ប្រញាល់កាត់បន្ថយអត្រាការប្រាក់បន្ថែមទៀតទេ ប៉ុន្តែពួកគេនៅតែត្រៀមខ្លួនជានិច្ច ប្រសិនបើអតិផរណាធ្លាក់ចុះ ឬទីផ្សារការងារធ្លាក់ចុះ។

លើសពីនេះ ទិន្នន័យតម្លៃទំនិញប្រើប្រាស់ដែលចេញផ្សាយដោយក្រសួងការងារសហរដ្ឋអាមេរិកបានបង្ហាញពីអតិផរណាខ្ពស់នៅក្នុងខែមករា ដែលបង្កឱ្យមានការភ័យខ្លាចថា សេដ្ឋកិច្ចកាន់តែតានតឹង ខណៈដែលការកើនឡើងពន្ធកំពុងធ្វើឲ្យក្តីសង្ឃឹមធ្លាក់ចុះសម្រាប់ការកាត់បន្ថយអត្រាការប្រាក់។ ប្រសិនបើអត្រាខ្ពស់ជាងនេះអាចធ្វើឲ្យសកម្មភាពសេដ្ឋកិច្ចយឺតជាងមុន និងធ្វើឱ្យតម្រូវការប្រេងធ្លាក់ចុះ។ កាលពីថ្ងៃពុធសប្ដាហ៍នេះ រដ្ឋបាលព័ត៌មានថាមពល (EIA) បានលើកឡើងថា ស្តុកប្រេងឆៅរបស់សហរដ្ឋអាម៉េរិកបានកើនឡើងខ្ពស់ជាងការរំពឹងទុកកាលពីសប្តាហ៍មុន នេះមានន័យថា តម្រូវការធ្លាក់ចុះ៕