សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភពព័ត៌មានពីរ៉យទ័រ បានរាយការណ៍ថា តម្លៃប្រេងបានបន្តកើនឡើងជាង ៩០ ដុល្លារក្នុងមួយបារ៉ែល ដោយសារភាពតានតឹងផ្នែកភូមិសាស្ត្រនយោបាយ និងការរំពឹងទុកអំពីការកាត់បន្ថយអត្រាការប្រាក់របស់ធនាគារកណ្តាលអាម៉េរិក។
តម្លៃប្រេងឆៅម៉ាក Brent ឡើងថ្លៃ ១,៥ ភាគរយ ឬ ៩០,៦៥ ដុល្លារក្នុងមួយបារ៉ែល ខណៈដែលតម្លៃប្រេងឆៅម៉ាក West Texas Intermediate (WTI) ឡើងថ្លៃ ១,៤ ភាគរយ ឬ ៨៦,៥៩ ដុល្លារក្នុងមួយបារ៉ែល។ តម្លៃប្រេងទាំងពីរបានឡើងថ្លៃដល់កម្រិតខ្ពស់បំផុតចាប់តាំងពីខែតុលា ដោយសារក្នុងរយៈពេលប៉ុន្មានថ្ងៃចុងក្រោយនេះ មានការកើនឡើងនៃភាពតានតឹងភូមិសាស្ត្រនយោបាយ និងហានិភ័យនៃការផ្គត់ផ្គង់ប្រេង។
កាលពីថ្ងៃព្រហស្បតិ៍នៃសប្ដាហ៍កន្លងទៅនេះ តម្លៃប្រេងបានឡើងថ្លៃបន្ទាប់ពីមានសេចក្តីរាយការណ៍ព័ត៌មានថា ស្ថានទូតអ៊ីស្រាអែលជុំវិញពិភពលោកត្រូវបានណែនាំឱ្យមានការប្រុងប្រយ័ត្នខ្ពស់ ដោយសារតែមានការកើនឡើងការគំរាមកំហែងនៃការវាយប្រហាររបស់អ៊ីរ៉ង់លើអ្នកការទូតអ៊ីស្រាអែល។ អ៊ីរ៉ង់ ដែលជាប្រទេសផលិតធំជាងគេទី ៣ នៅក្នុងអង្គការ OPEC បានប្តេជ្ញាសងសឹកប្រឆាំងនឹងអ៊ីស្រាអែលចំពោះការវាយប្រហារកាលពីថ្ងៃចន្ទ ដែលបានសម្លាប់យោធាជាន់ខ្ពស់អ៊ីរ៉ង់។ លើសពីនេះ អ៊ីស្រាអែលមិនបានអះអាងទទួលខុសត្រូវចំពោះការវាយប្រហារលើបរិវេណស្ថានទូតអ៊ីរ៉ង់នៅស៊ីរីទេ។ មិនត្រឹមតែប៉ុណ្ណោះ ទីក្រុងវ៉ាស៊ីនតោនបានព្រមានថា គោលនយោបាយរបស់សហរដ្ឋអាម៉េរិកខ្លាំងខ្លាចំពោះអ៊ីស្រាអែលជុំវិញជម្លោះតំបន់ហ្គាហ្សានឹងអាស្រ័យលើថា តើអ៊ីស្រាអែលនឹងចាត់វិធានការដើម្បីធានាសុវត្ថិភាពរបស់ជនស៊ីវិលប៉ាឡេស្ទីន និងបុគ្គលិកមនុស្សធម៌ដែរឬទេ?
កាលពីថ្ងៃព្រហស្បតិ៍ សប្ដាហ៍មុននេះ សហរដ្ឋអាមេរិកបានដាក់ទណ្ឌកម្មថ្មីប្រឆាំងអំពើភេរវកម្មដែលទាក់ទងនឹងអ៊ីរ៉ង់ ខណៈដែលនាយកដ្ឋានរតនាគារបាននិយាយថា អ៊ីរ៉ង់កំពុងត្រូវបានដាក់ទណ្ឌកម្មផ្នែកហិរញ្ញវត្ថុដោយអាមេរិក ក្នុងកិច្ចខិតខំប្រឹងប្រែងមួយដើម្បីការពារខ្លួនពីការផ្តល់មូលនិធិដល់អ្នកតំណាងរបស់អ៊ីរ៉ង់ និងរារាំងអ៊ីរ៉ង់ពីការគាំទ្រយុទ្ធនាការយោធារបស់រុស្ស៊ីនៅក្នុងប្រទេសអ៊ុយក្រែន។ ការឡើងថ្លៃតម្លៃប្រេងថ្មីៗនេះ ក៏កើតឡើងដោយសារការវាយប្រហាររបស់អ៊ុយក្រែនលើរោងចក្រចម្រាញ់ប្រេងរបស់រុស្ស៊ីផងដែរ ដោយរុស្ស៊ីបានកាត់បន្ថយការផ្គត់ផ្គង់ប្រេងឥន្ធនៈ។
លោក Frank Monkam អ្នកគ្រប់គ្រងផលប័ត្រជាន់ខ្ពស់នៅ Altimo LLC បានលើកឡើងថា កត្តាភូមិសាស្ត្រនយោបាយទាំងអស់នេះបានកើតឡើងក្នុងពេលតែមួយ ដែលជំរុញឱ្យមានអ្នកវិនិយោគប្រេងមានអារម្មណ៍វិជ្ជមានក្នុងការទទួលបានប្រាក់ចំណេញមួយចំនួន។ ទន្ទឹមនឹងនេះ កិច្ចប្រជុំនៃរដ្ឋមន្ត្រីកំពូលមកពីអង្គការនៃប្រទេសនាំចេញប្រេង និងសម្ព័ន្ធមិត្ត (OPEC+) បានរក្សាគោលនយោបាយកាត់បន្ថយការផ្គត់ផ្គង់ប្រេង ហើយបានជំរុញប្រទេសមួយចំនួនអនុលោមតាមការកាត់បន្ថយទិន្នផលរបស់ខ្លួន។
ទន្ទឹមនឹងនេះ ការទាមទារផលប្រយោជន៍ពីភាពអត់ការងារធ្វើរបស់សហរដ្ឋអាមេរិកបានកើនឡើងច្រើនជាងការរំពឹងទុកក្នុងសប្តាហ៍មុន ទោះបីជាមានការបន្ធូរបន្ថយលក្ខខណ្ឌទីផ្សារការងារក៏ដោយ។ វាបានកើតឡើងបន្ទាប់ពីប្រធានធនាគារកណ្តាលអាម៉េរិក Jerome Powell បានលើកឡើងពីការប្រុងប្រយ័ត្នអំពីពេលវេលានៃការកាត់បន្ថយអត្រាការប្រាក់នាពេលអនាគត បន្ទាប់ពីទិន្នន័យថ្មីៗនេះបានបង្ហាញពីកំណើនការងារ និងអតិផរណាខ្ពស់ជាងការរំពឹងទុក៕
Account
Security
Favourite Content