បរទេស ៖ ចាប់តាំងតែពីវិបត្តិជម្លោះនៅស៊ីរីឆ្នាំ២០១៥មក ប្រទេសតួគី បានក្លាយជាតួអង្គដ៏សំខាន់ក្នុងការទទួលយករំហូរនៃជនភៀសខ្លួនធំបំផុតនៅក្នុងតំបន់អឺរ៉ុប ហើយគិតត្រឹមសហភាពអឺរ៉ុបប៉ុណ្ណោះបានចាយលុយជាង១១ពាន់លានអឺរ៉ូរួចមកហើយដើម្បីស្វាគមន៍ជនអន្តោប្រវេសន៍រាប់សិបលាននាក់មកកាន់ប្រទេសអ៊ីស្លាមមួយនេះ។

យ៉ាងណាក៏ដោយ បើទោះបីជាបានបង្ហាញប្រាប់ពិភពលោកថាខ្លួនជាអ្នកព្យាយាមថែរក្សាសុវត្ថិភាព និងអាយុជីវិតរបស់ក្រុមជនអន្តោប្រវេសន៍ពីប្រទេសមានសង្គ្រាមក្តី ប៉ុន្តែក្រុមអ្នកកាសែត និងអ្នកវិភាគរបស់អន្តរជាតិមួយចំនួនបានស្រាវជ្រាវរកឃើញថា ភាគីទាំងតួគី និងអឺរ៉ុប ក៏ចាប់់ផ្តើមបង្ហាញរូបភាពមួយជ្រុងទៀតនៃគោលដៅរបស់ពួកគេនៅក្នុងកិច្ចការងារមួយនេះទៅវិញ។

ក្នុងកិច្ចការងារ​ពង្រឹង​សន្តិសុខ​ព្រំដែន​របស់​ខ្លួន​ដើម្បី​ការពារ​ការ​មក​ដល់​បន្ថែម​ទៀតនៃចំនួនជនអន្តោប្រវេសន៍ជិតមួយទសវត្សរ៍មកហើយដែលប្រធានាធិបតីតួគី លោក Recep Tayyip Erdogan បានប្រើប្រាស់តួនាទីរបស់ប្រទេសក្នុងការគ្រប់គ្រងវិបត្តិដើម្បីទាញយកសាច់ប្រាក់ និងថវិកាសម្បទានយ៉ាងច្រើន។

សម្រាប់តួគី កិច្ចការងារទទួលយកជនភៀសខ្លួនបានក្លាយទៅជាកូនអុករបស់ខ្លួនក្នុងការទាក់ទាញយកបានលុយជំនួយនានា។

កាសែត The Politico និងកាសែតជាច្រើនទៀតបានសរសេរថា ក្នុងពេលដែលកំពុង​ពង្រឹង​សន្តិសុខ​ព្រំដែន​របស់​ខ្លួន​ដើម្បី​ការពារ​ការ​មក​ដល់​បន្ថែម​ទៀតនោះ អស់រយៈពេលជិតមួយទសវត្សរ៍មកហើយ ដែលប្រធានាធិបតីតួគី លោក Recep Tayyip Erdogan បានប្រើប្រាស់តួនាទីរបស់តួគីក្នុងការគ្រប់គ្រងវិបត្តិជនភៀសខ្លួនដើម្បីទាញយកសាច់ប្រាក់ និងសម្បទានពីសហភាពអឺរ៉ុប EU ដោយក្នុងនោះថែមទាំងមានម្តងម្កាល តួគី បានធ្វើជាបញ្ចេញជនចំណាកស្រុកមួយចំនួនធំទៅកាន់ប្លុកនេះដែលជាយុទ្ធសាស្ត្រចរចាកិច្ចព្រមព្រៀងទទួលយកថវិកាជំនួយជាដើមផងដែរ។

ដោយឡែក សម្រាប់ជំនួយរបស់អឺរ៉ុបមួយចំនួនធំបែរជាត្រូវបានប្រើប្រាស់ក្នុងគោលដៅគួរឲ្យសោកសៅទៅវិញ។ លុយរាប់ពាន់លានដុល្លារត្រូវបានបង្វែរទៅប្រើប្រាស់ដោយរដ្ឋាភិបាលតួគីក្នុងការរៀបចំដំណើរការនៃការបណ្តេញ និងនិរទេសជនភៀសខ្លួនទាំងនោះទៅស្រុកកំណើតវិញ ប៉ុន្តែក្នុងលក្ខខណ្ឌបង្ខិតបង្ខំ។

មជ្ឈមណ្ឌលដែលធ្លាប់បម្រើការងារជាអ្នករៀបចំឯកសារទទួលយកជនភៀសខ្លួនចំនួន៦កន្លែងរបស់អឺរ៉ុបត្រូវបានក្រុមអ្នកស្រាវជ្រាវព័ត៌មានរកឃើញថាបានប្តូរសេវាកម្មរបស់ខ្លួនទៅជាទីតាំងសម្រាប់លុបបំបាត់ជនភៀសខ្លួនទៅវិញ (Removal Centers)។

Politico ជឿជាក់ថា ជនភៀសខ្លួនដល់ទៅរាប់ពាន់នាក់ត្រូវបានអឺរ៉ុប និងតួគី បង្ខំឲ្យទទួលយកជម្រើសក្នុងវិលត្រឡប់ទាំងដែលពួកគេមិនចង់ ពីព្រោះក្រុមការងារបានរកឃើញថា អតីតអ្នកជាប់ឃុំជាច្រើននាក់ដែលឃុំខ្លួននៅក្នុងកន្លែងផ្តល់មូលនិធិដោយសហភាពអឺរ៉ុបចំនួន២២កន្លែងបានទទួលរងនូវការគាបសង្កត់តាមរយៈលក្ខខណ្ឌរស់នៅក្នុងមជ្ឈមណ្ឌលដែលវាត្រូវបានចាត់ទុកថាជារឿងដ៏អាក្រក់បំផុត។

អត្ថបទដែលត្រូវបានចេញផ្សាយដោយកាសែតដដែលបានអះអាងថា ជនចំណាកស្រុកត្រូវបានបដិសេធមិនផ្តល់អាហារ និងការព្យាបាលដោយវេជ្ជសាស្រ្ត ហើយមានពេលខ្លះ ពួកគេថែមទាំងទទួលរងការធ្វើទារុណកម្ម និងវាយដំរហូតដល់ពួកគេចុះហត្ថលេខាលើឯកសារស្នើសុំការនិរទេសដោយស្ម័គ្រចិត្តទៀតផង ។

យ់ាងណាក្តី រដ្ឋាភិបាល​តួ​​គី​បាន​បដិសេធ​រាល់​ការ​ប្រព្រឹត្ត​ខុស​ច្បាប់ ឬ​ការ​បង្ខិតបង្ខំ​ជន​ចំណាក​ស្រុកដោយគិតត្រឹមខែកញ្ញា ប្រជាជនស៊ីរីជាង ៧១៥ ០០០ នាក់បានត្រឡប់ទៅប្រទេសកំណើតវិញក្រោមគោលការណ៍ស្ម័គ្រចិត្ត សុវត្ថិភាព និងដោយសេចក្តីថ្លៃថ្នូរ។ នេះបើយោងតាមអគ្គនាយកដ្ឋានគ្រប់គ្រងចំណាកស្រុកនៅទីក្រុងអង់ការ៉ា៕