សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពង់ធំ ៖ ប្រជាសហគមន៍អេកូទេសចរណ៍ផាត់សណ្តាយ កំពុងត្រូវបានគេផ្តោតការយកចិត្តទុកដាក់ ដោយនឹងទទួលបានការគាំទ្រហិរញ្ញវត្ថុ ដើម្បីជំរុញ និងសម្រាប់រៀបចំកសាងហេដ្ឋារចនាសម្ព័ន្ធឱ្យក្លាយជាតំបន់អេកូទេសចរណ៍បែបធម្មជាតិក្នុងគោលបំណងទាក់ទាញភ្ញៀវទេសចរជាតិ និងអន្តរជាតិបន្ថែមទៀត។
ក្នុងគោលបំណងដើម្បីជួយជំរុញ និងរៀបចំតំបន់អេកូទេសចរណ៍បែបធម្មជាតិមួយនេះឱ្យកាន់តែមានភាពទាក់ទាញសម្រាប់ភ្ញៀវទេសចរជាតិ និងអន្តរជាតិបន្ថែមទៀត ស្ថានទូតឥណ្ឌាប្រចាំកម្ពុជា ក៏បានផ្តល់ជូននូវគម្រោងដែលមានឥទ្ធិពលលឿន (Quick Impact Project-QIP) ចំនួន៣ដល់ក្រសួងទេសចរណ៍ ក្នុងនោះពាក់ព័ន្ធសហគមន៍អេកូទេសចរណ៍ ផាត់សណ្តាយ ស្ថានទូតនឹងផ្តល់ការគាំទ្រហិរញ្ញវត្ថុប្រមាណ ៥០ ០០០ ដុល្លារ សម្រាប់ការកសាងហេដ្ឋារចនាសម្ព័ន្ធ និងការទាក់ទាញភ្ញៀវទេសចរ។
ការគាំទ្រហិរញ្ញវត្ថុ និងជំរុញ ការរៀបចំកសាងហេដ្ឋារចនាសម្ព័ន្ធឱ្យក្លាយជាតំបន់អេកូទេសចរណ៍បែបធម្មជាតិនេះធ្វើឡើងដោយឯកឧត្ដម ថោង ខុន រដ្ឋមន្រ្តីក្រសួងទេសចរណ៍ និងជាប្រធានគណៈកម្មាធិការជាតិគ្រប់គ្រង និងអភិវឌ្ឍសហគមន៍ទេសចរណ៍ និងអេកូទេសចរណ៍ បានដឹកនាំក្រុមការងារ តំណាងស្ថានទូតឥណ្ឌាប្រចាំកម្ពុជា រួមទាំងមន្ត្រីជំនាញរបស់ក្រសួងទេសចរណ៍ និងវិស័យឯកជនចុះជួបសំណេះសំណាលជាមួយប្រជាសហគមន៍អេកូទេសចរណ៍ផាត់សណ្តាយ ក្នុងភូមិសាស្រ្តឃុំផាត់សណ្តាយ ស្រុកកំពង់ស្វាយ ខេត្តកំពង់ធំ កាលពីថ្ងៃថ្ងៃទី១៩ ខែកុម្ភៈ ឆ្នាំ២០២៣កន្លងទៅនេះ ។ សហគមន៍អេកូទេសចរណ៍ផាត់សណ្ដាយ ជាសហគមន៍នៅលើផ្ទៃទឹកនៃបឹងទន្លេសាប ដែលស្ថិតក្នុងឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ។ ឃុំផាត់សណ្តាយ មានភូមិចំនួន ៥ មានប្រជាពលរដ្ឋរស់នៅចំនួនជាង ១ពាន់គ្រួសារ ហើយប្រជាពលរដ្ឋប្រមាណ ៩០% ជាអ្នកប្រកបរបរនេសាទត្រី។
នៅដើមឆ្នាំ២០១៩ ក្រោមជំនួយពីអង្គការសម្ព័ន្ធភាពដើម្បីអភិរក្សធនធានជលផល (FACT) បានអនុវត្តគម្រោងមួយនៅក្នុងឃុំផាត់សណ្តាយនេះ ដែលមានឈ្មោះថា «ការបង្កើនជីវភាពរស់នៅរបស់ប្រជានេសាទ តាមរយៈការការពារនិងគ្រប់គ្រងធនធានធម្មជាតិនៅតំបន់ដីសើមក្នុងបឹងទន្លេសាប ប្រទេសកម្ពុជា» រយៈពេល៣ឆ្នាំ ចាប់ពីឆ្នាំ២០១៩-២០២១។
ឯកឧត្ដម ថោង ខុន ក៏ដូចជាអង្គការ FACT ក៏បានសន្យាជាមួយពលរដ្ឋនៅផាត់សណ្តាយដែរថា នឹងខិតខំជួយជម្រុញឱ្យមន្ត្រីជំនាញ និងអង្គភាពពាក់ព័ន្ធជួយបង្កើនសេវាអ៊ីនធឺណិត ដល់សហគមន៍ ជំរុញឱ្យរដ្ឋបាលព្រៃឈើ ជួយផ្តល់ឈើដែលទទួលបានពីបទល្មើសជាក់ស្តែង និងបានស្នើឱ្យឥណ្ឌា តាមរយៈស្ថានទូតឥណ្ឌាប្រចាំកម្ពុជា ជួយសាងសង់កំពុងផែមួយនៅឃុំឆ្នុកទ្រូ ដើម្បីផ្តល់ជូនប្រជាសហគមន៍ផងដែរ។
ក្នុងការទាក់ទាញ អ្នកទេសចរទាំងជាតិ និងអន្តរជាតិមកទស្សនាកម្សាន្ត ឯកឧត្ដមរដ្ឋមន្ត្រី បានជំរុញឱ្យសហគមន៍ផាត់សណ្តាយ ក្រៅពីការប្រកបរបរនេសាទ ដោយស្របច្បាប់ហើយ ត្រូវខិតខំរៀបចំទីតាំងរបស់ខ្លួនឱ្យបានស្អាត និងទាក់ទាញ ដើម្បីបានផ្តល់ឱកាសឱ្យភ្ញៀវទេសចរ បានមកទស្សនាកម្សាន្ត ដែលជាផ្នែកមួយ ក្នុងការជួយបង្កើនជីវភាពបានមួយផ្នែកទៀតផងដែរ។
អ្វីដែលសំខាន់នោះ ដើម្បីឱ្យសហគមន៍របស់ខ្លួន គួរជាទីទាក់ទាញដល់ភ្ញៀវទេសចរ ឯកឧត្ដមរដ្ឋមន្ត្រី ថោង ខុន ក៏បានជំរុញឱ្យប្រជាសហគមន៍ ត្រូវខិតខំធានា ឱ្យបាននូវការអភិរក្សធានជីវៈចម្រុះ និងធនធានធម្មជាតិក្នុងមូលដ្ឋានរបស់ខ្លួនឱ្យបានគង់វង្ស ដោយមិនត្រូវប្រកបរបរនេសាទត្រីដោយខុសច្បាស់ដែលអាចនាំឱ្យបាត់បង់ពូជត្រី ឫកាប់ព្រៃលិចទឹក ជាដែនជម្រករបស់មច្ឆជាតិនោះឡើយ។
នាយកប្រតិបត្តិអង្គការសម្ព័ន្ធភាពដើម្បីអភិរក្សធនធានជលផល ( FACT) លោក យុក សេងឡុង បានឱ្យដឹងដែរថា ថ្មីនេះអង្គការ FACT បានទទួលគម្រោងពីក្រសួងបរិស្ថានរបស់អាល្លឺម៉ង ក្នុងការជួយដល់សហគមអេកូទេសចរណ៍ផាត់សណ្តាយ ដែលមានរយៈពេល៥ឆ្នាំបន្តទៀត ដែលគិតចាប់ពីថ្ងៃទី០៥ ខែសីហា ឆ្នាំ២០២០ រហូតដល់ខែកញ្ញា ឆ្នាំ២០២៧ ហើយនឹងមានគម្រោងក្នុងការជួយសាងសង់ ផ្សារអេកូទេសចរណ៍បណ្តែតទឹក ដែលតាមផែនការគ្រោងធ្វើឡើងពីអគារចំនួន៣ ជាអក្សU មាន២ជាន់។
ទន្ទឹមនឹងនេះ អង្គការ FACT ក៏បានផ្តល់ជូននូវគម្រោងជាច្រើន សម្រាប់សហគមន៍ផាត់សណ្តាយនេះ ដូចជាទឹកស្អាត ការគ្រប់គ្រងសំរាម ការបង្កើនជីវភាពប្រជាសហគមន៍តាមរយៈការបញ្ចូលសកម្មភាពអេកូទេសចរណ៍ និងការបង្កើតបណ្តាញអេកូទេសចរណ៍បឹងទន្លេសាបជាដើម៕
Account
Security
Favourite Content