សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បន្ទាប់ពីទទួលបានជោគជ័យក្នុងការអនុវត្តកម្មវិធីពិសេសជំរុញការវិនិយោគខេត្តព្រះសីហនុ រាជរដ្ឋាភិបាលកម្ពុជាក៏បានដាក់ចេញនូវកម្មវិធីពិសេសជំរុញការវិនិយោគនៅភូមិភាគឦសាននៃប្រទេសកម្ពុជា ។ តាមរយៈកម្មវិធីពិសេសនេះ បាន និងកំពុងហុចផលដល់បណ្ដាខេត្តទាំង៤ ដែលស្ថិតនៅភូមិភាគឦសាន ដោយមានវិនិយោគិនជាតិ និងអន្តរជាតិជាច្រើនចាប់ផ្ដើមសម្លឹងស្វែងរកឱកាសវិនិយោគក្នុងគ្រាដែលមានការអនុគ្រោះពីរាជរដ្ឋាភិបាល ។
ទន្ទឹមនឹងការដាក់ចេញនូវកម្មវិធីពិសេសជំរុញការវិនិយោគនៅខេត្តភូមិភាគឦសាននេះដែរ លេខាធិការក្រុមការងារជំរុញការវិនិយោគភូមិភាគឦសា ក៏បានផ្សព្វផ្សាយពីសក្ដានុពល និងឱកាសវិនិយោគដល់បណ្ដាវិនិយោគិននានា ទាំងក្នុងស្រុក និងក្រៅប្រទេស ដើម្បីឱ្យពួកគេចាប់យកឱកាសវិនិយោគទាន់ពេលរាជរដ្ឋាភិបាលផ្ដល់ការអនុគ្រោះជូន ។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា ក្នុងរយៈពេល៧ខែ ឆ្នាំ២០២៥នេះ ខេត្តទាំង៤ នៅភូមិភាគឦសាន ទទួលបានគម្រោងវិនិយោគចំនួន៦គម្រោង ដោយក្នុងខេត្តមណ្ឌលគីរី មានចំនួន២គម្រោង ហើយគម្រោងដែលធំនោះ គឺគម្រោងវិនិយោគលើថាមពលអគ្គិសនីដើរដោយកម្លាំងខ្យល់ ។ ចំណែកខេត្តរតនគិរីក៏ទទួលបានគម្រោងវិនិយោគចំនួន ២ដូចគ្នា ដោយគម្រោងធំគឺគម្រោងពង្រីកផលិតកម្មកសិដ្ឋានដាំដំណាំហូបផ្លែ និងរោងចក្រកែច្នៃ មានទុនវិនិយោគរហូតដល់ ២២៦លានដុល្លារអាមេរិក អាចបង្កើតការងាររហូតដល់៣៧៣កន្លែង ។ ដោយឡែក ខេត្តចំនួនពីរផ្សេងទៀត រួមមាន ខេត្តក្រចេះ និងខេត្តស្ទឹងត្រែង ក៏បានទទួលបានគម្រោងវិនិយោគចំនួន២ ដោយខេត្តស្ទឹងត្រែងចំនួន១គម្រោង និងខេត្តក្រចេះ១គម្រោងដូចគ្នា ។ ក្រៅពីគម្រោងដែលបានអនុម័តរួចនេះហើយ ក៏មានវិនិយោគជាច្រើនទៀតកំពុងស្នើសុំឱកាសវិនិយោគនៅតាមបណ្តាខេត្តទាំង៤នេះ ជាពិសេសទៅលើវិស័យកសិកម្ម, ទេសចរណ៍ រ៉ែ និងថាមពល។
គួរកត់សម្គាល់ថា កាលពីដើមខែសីហា ឆ្នាំ២០២៥កន្លងទៅនេះ នៅក្នុងជំនួបជាមួយអគ្គរដ្ឋទូតវៀតណាមប្រចាំកម្ពុជា ឯកឧត្តម ញ៉ែម សំអឿន អភិបាលខេត្តរតនគិរី បានស្នើឱ្យវៀតណាមជួយជំរុញក្រុមហ៊ុនវៀតណាមមកបណ្ដាក់ទុនវិនិយោគនៅខេត្តរតនគិរីបន្ថែម ដោយឯកឧត្តមបានជម្រាបពីកម្មវិធីពិសេសជំរុញការវិនិយោគខេត្តទាំង៤នៃភូមិភាគឦសានយ៉ាងក្បោះក្បាយ។
ឯកឧត្តម ញ៉ែម សំអឿន បានបញ្ជាក់ថា រាជរដ្ឋាភិបាលបានដាក់ចេញនូវវិធានការគាំទ្រ និងជំរុញការវិនិយោគ៣ប្រភេទ រួមមាន ៖ ១. វិធានការផ្នែកពន្ធដារ និងពន្ធគយ ២. ការផ្ដល់ ហិរញ្ញប្បទានក្រោមអត្រាការប្រាក់សមរម្យ និង ៣. ការជួយកាត់បន្ថយថ្លៃដើមផលិតកម្ម ការសម្រួលនីតិវិធីនិងការគាំទ្រសកម្មភាពវិនិយោគឯកជន ។
ឯកឧត្តម ង្វៀន មិញ វ៉ូ ឯកអគ្គរដ្ឋទូតវៀតណាម ប្រចាំកម្ពុជា បានគូសបញ្ជាក់ថា តាមរយៈកិច្ចសហប្រតិបត្តិការដ៏ល្អរវាងប្រទេសទាំងពីរ បានពង្រីកទំហំពាណិជ្ជកម្ម ក៏ដូចជាបង្កើនការវិនិយោគជាបន្តបន្ទាប់នៅកម្ពុជា នៅក្នុងនោះក៏មានក្រុមហ៊ុនមួយចំនួនបានមកដាក់ទុនវិនិយោគនៅក្នុងខេត្តរតនគិរី លើវិស័យកសិឧស្សាហកម្ម និងការធ្វើពាណិជ្ជកម្មផ្សេងៗទៀតរួចរាល់។
ឯកឧត្តមក៏បានវាយតម្លៃខ្ពស់ចំពោះកិច្ចសហប្រតិបត្តិការកន្លងមក រវាងអាជ្ញាធរខេត្តរតនគិរី-ខេត្តកន្ទូម និងខេត្តយ៉ាឡាយ លើវិស័យសន្តិសុខសណ្តាប់ធ្នាប់នៅតាមព្រំដែន និងការប្រយុទ្ធប្រឆាំងបទល្មើសឆ្លងដែនខុសច្បាប់ជាដើម។ តាមរយៈសកម្មភាពទាំងនេះ បានសបញ្ជាក់ឱ្យឃើញថា តំបន់ភូមិភាគឦសានកាន់តែមានភាពទាក់ទាញ និងទទួលបានផលជាបន្តបន្ទាប់ពីការដាក់ចេញនូវកម្មវិធីពិសេសជំរុញការវិនិយោគរបស់រាជរដ្ឋាភិបាលកាលពីអំឡុងខែមេសា ឆ្នាំ២០២៥កន្លងទៅនេះ ៕
Account
Security
Favourite Content