សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ អភិបាលខេត្តទាំង៤ ក្នុងតំបន់ភូមិភាគឦសានដែលរួមមានខេត្តក្រចេះ ស្ទឹងត្រែង មណ្ឌលគិរី និងរតនគិរី បានប្ដេជ្ញាក្នុងការចូលរួមសហការជាមួយក្រសួង ស្ថាប័នពាក់ព័ន្ធ ជាពិសេស ជាមួយក្រុមការងារជំរុញការវិនិយោគក្នុងភូមិភាគឦសានដើម្បីទាក់ទាញការវិនិយោគឱ្យកាន់តែលេចធ្លោរ និងទទួលបានផ្លែផ្កា ។ ការប្ដេជ្ញារបស់អភិបាលខេត្តទាំង៤នេះ បានធ្វើឡើងក្នុងជំនួបជាមួយឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារជំរុញការវិនិយោគភូមិភាគឦសាន្តកាលពីចុងសប្ដាហ៍កន្លងទៅនេះ ។
នៅក្នុងឱកាសដែរ ឯកឧត្តមបណ្ឌិត ហ៊ាន សាហ៊ីប បានចែករំលែកពីភាពជោគជ័យ ដែលបានអនុវត្តន៍កន្លងមកនៅខេត្តព្រះសីហនុ ដោយបាននាំមកនូវសមិទ្ធផលសំខាន់ៗជាច្រើន ជូនសង្គម-សេដ្ឋកិច្ចជាតិ ក៏ដូចជាសង្គម និងសេដ្ឋកិច្ចក្នុងមូលដ្ឋាន ផងដែរ។
ឯកឧត្តមបណ្ឌិតសភារ្យបានមានប្រសាសន៍ថា ការអនុវត្តកម្មវិធីពិសេសជំរុញការវិនិយោគក្នុងខេត្តទាំង៤ នៅភូមិភាគឦសាននៃព្រះរាជាណាចក្រកម្ពុជា ឆ្នាំ២០២៥-២០២៨ ផ្តោតសំខាន់ចំនួន៣ រួមមាន ១. វិស័យកសិកកម្ម ដែលរួមបញ្ចូលទាំងការជំរុញការប្រើប្រាស់ដីធ្លីឱ្យអស់សក្តានុពល ២. វិស័យកសិ-ឧស្សាហកម្ម ដែលផ្តោតលើការលើកកម្ពស់ការកែច្នៃកសិផលក្នុងស្រុកឱ្យមានតម្លៃបន្ថែមខ្ពស់ និង ៣. វិស័យទេសចរណ៍ ដើម្បីជំរុញការអភិវឌ្ឍផលិតផលទេសចរណ៍ទាក់ទាញតាមសក្តានុពលក្នុងតំបន់ ។
ឯកឧត្តមបន្ថែមថា ការណ៍នេះ ទាមទារឱ្យមានការជ្រោមជ្រែង និងភាពបុរេសកម្មរបស់អាជ្ញាធរខេត្តនីមួយៗ ក្នុងការចូលរួមទាក់ទាញការវិនិយោគ ប្រកួតប្រជែងនឹងប្រទេសជិតខាង និងខេត្តនានានៃព្រះរាជាណាចក្រកម្ពុជា ព្រមទាំងក្នុងចំណោមខេត្តទាំង៤ នៅក្នុងភូមិភាគឦសានផងដែរ ។ ទន្ទឹមនេះ រដ្ឋបាលខេត្តនីមួយៗ ត្រូវត្រៀមខ្លួនទទួលបន្តការរៀបចំ ការគ្រប់គ្រង និងការថែទាំគម្រោងវិនិយោគទាំងឡាយប្រកបដោយស្មារតីបុរេសកម្ម និងទំនួលខុសត្រូវខ្ពស់បន្ទាប់ពីកម្មវិធីពិសេសត្រូវបានបញ្ចប់នៅចុងឆ្នាំ២០២៨ ។
នៅក្នុងកិច្ចប្រជុំនោះដែរ ឯកឧត្តម វ៉ា ថន អភិបាលខេត្តក្រចេះបានបញ្ជាក់ពីការប្ដេជ្ញាចិត្តថា រដ្ឋបាលខេត្តនឹងសហការជាមួយវិនិយោគិន និងក្រុមការងារជំរុញការវិនិយោគខេត្តទាំង៤ ក្នុងភូមិភាគឦសាន ដើម្បីជំរុញឱ្យមានការវិនិយោគបន្ថែមទៀតក្នុងខេត្តក្រចេះ ។
លោក សាមុត លីម៉ា នាយកទីចាត់ការផែនការវិនិយោគនៃរដ្ឋបាលខេត្តក្រចេះ បានថ្លែងប្រាប់ AMS Economy នៅរសៀលថ្ងៃទី២៤ ខែវិច្ឆិកា ឆ្នាំ២០២៥ បានឱ្យដឹងថា ខេត្តក្រចេះមានសក្ដានុពលខ្ពស់លើវិស័យកសិកម្ម និងកសិ-ឧស្សាហកម ដូច្នេះ ក្នុងរយៈពេលប៉ុន្មានឆ្នាំនេះ ជាពិសេសចាប់តាំងពីរាជរដ្ឋាភិបាលប្រកាសអនុវត្តន៍កម្មវិធីពិសេសជំរុញការវិនិយោគខេត្តទាំង៤ ក្នុងភូមិភាគឦសាន ឃើញថាវិស័យទាំងពីរនេះទទួលបានការទាក់ទាញ និងវិនិយោគច្រើន ។
លោកបន្តថា ដើម្បីទាក់ទាញ និងជំរុញការវិនិយោគនៅក្នុងខេត្តក្រចេះឱ្យបានកាន់តែច្រើនទៀត រដ្ឋបាលខេត្តនឹងសម្របសម្រួលជូនវិនិយោគទាំងអស់ដែលមកកាន់មូលដ្ឋានខេត្តក្រចេះ កាន់តែងាយស្រួលក្នុងដំណើរការវិនិយោគ ដោយមិនឱ្យមានភាពស្មុគ្រស្មាញ ដែលអនុវត្តទៅតាមគោលបំណងរបស់រាជរដ្ឋាភិបាល ។
គួររម្លឹកថា ដើម្បីផ្ដល់នូវទំនុកចិត្តដល់វិនិយោគិនដែលបានវិនិយោគក្នុងខេត្តទាំង៤នៅភូមិភាគឦសាន ក្រុមការងារជំរុញការវិនិយោគក្នុងភូមិភាគឦសាន តែងតែចុះពិនិត្យស្ថានភាពវិនិយោគរបស់វិនិយោគិនជាបន្តបន្ទាប់ ជាក់ស្ដែងកាលពីចុងសប្ដាហ៍កន្លងទៅនេះដែរ ឯកឧត្តមបណ្ឌិសភាចារ្យ ហ៊ាន សាហ៊ីប បានចុះទៅដល់ក្រុមហ៊ុន ថាកូ អាហ្គ្រី (Thaco Agri Kratie) មានទីតាំងស្ថិតនៅស្រុកស្នួល ខេត្តក្រចេះ ដែលកំពុងវិនិយោគលើការអភិវឌ្ឍវិស័យកសិកម្មបែបទំនើប ដោយពិនិត្យលើប្រសិទ្ធភាពនៃខ្សែច្រវ៉ាក់ផលិតកម្ម ការអភិវឌ្ឍហេដ្ឋារចនាសម្ព័ន្ធ និង ស្ថានភាពប្រើប្រាស់កម្លាំងពលកម្មក្នុងស្រុកឱ្យបានជាអតិបរិមា ដើម្បីផ្ទេរចំណេះដឹង និងជំនាញ ស្របតាមច្បាប់ស្តីពីការវិនិយោគនៃព្រះរាជាណាចក្រកម្ពុជា ជំរុញការប្រើប្រាស់វត្ថុធាតុដើមក្នុងស្រុក ពិសេស គឺក្នុងពេលដែលប្រជាជនកម្ពុជាកំពុងមានចលនាប្រើប្រាស់ផលិតផលក្នុងស្រុក សំដៅឈានទៅម្ចាស់ការដោយកម្ពុជាខ្លួនឯង បង្កើនទាំងបរិមាណ ទាំងគុណភាព និងប្រភេទមុខទំនិញ ៕
Account
Security
Favourite Content