ភ្នំពេញ៖ របាយការណ៍របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងសន្និបាតប្រចាំឆ្នាំបានបង្ហាញថា​ លទ្ធផលការងារនៃតម្លៃផលិតផលឧស្សាហកម្មសរុបរបស់កម្ពុជាក្នុងឆ្នាំ២០២៤ មានលើសពី១៥ ពាន់លានដុល្លារអាមេរិក ដោយជិត៤ពាន់លានដុល្លារអាមេរិកត្រូវបានបែងចែកទៅទីផ្សារក្នុងស្រុក និងជាង១១ ពាន់លានដុល្លារអាមេរិកសម្រាប់ក្រៅស្រុក និងបានរំពឹងថារួមចំណែកប្រហែល ៨.៥ ភាគរយនៃកំណើន GDP ក្នុងឆ្នាំ២០២៤ និងប្រមាណ ៨.៦ ភាគរយនៅឆ្នាំ២០២៥។

នៅក្នុងវិស័យឧស្សាហកម្មកម្ពុជាឆ្នាំ២០២៤ មានរោងចក្រធំៗចំនួន ២.៤២៥ កំពុងដំណើរការ ក្នុងនោះមានរោងចក្រទើបបង្កើតថ្មីចំនួន ៣២៦ និងរោងចក្រចំនួន ២៦ ដែលបានបិទ។ ក្នុងនោះកម្លាំងពលកម្ម មានចំនួនសរុបជាង ១.១ លាននាក់ ដែលមាន ៨៥០,០០០ ជាស្ត្រី ស្មើនឹង៧៣ ភាគរយ កើនឡើង ១១,​០០០ បើធៀបនឹងឆ្នាំ២០២៣។

ឯកឧត្តម ហែម វណ្ឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានមានប្រសាសន៍ថា សមិទ្ធផល និងវឌ្ឍនភាពរបស់ក្រសួងក្នុងឆ្នាំ២០២៤ បានបង្ហាញថា វិស័យឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កំពុងអភិវឌ្ឍប្រកបដោយចីរភាព ធ្វើពិពិធកម្ម និងលើកកម្ពស់ស្តង់ដារទំនួលខុសត្រូវបរិស្ថាន និងសង្គមខ្ពស់។

ឯកឧត្តមបានបន្តថា ៖

«សេដ្ឋកិច្ចរបស់កម្ពុជាត្រូវបានព្យាករថានឹងបន្តកើនឡើងក្នុងរង្វង់ ៦ ភាគរយនៃផលិតផលក្នុងស្រុកសរុប (GDP) ក្នុងឆ្នាំ ២០២៤ និងប្រមាណ ៦,៣ ភាគរយក្នុងឆ្នាំ២០២៥ ដូចដែលបានគូសបញ្ជាក់នៅក្នុងក្របខ័ណ្ឌហិរញ្ញវត្ថុសាធារណៈរយៈពេលមធ្យម ដោយក្នុងនោះ វិស័យឧស្សាហកម្ម ត្រូវបានគេរំពឹងថានឹងរួមចំណែកប្រហែល ៨.៥ ភាគរយនៃកំណើន GDP ក្នុងឆ្នាំ២០​២៤ និងប្រមាណ ៨.៦ ភាគរយនៅឆ្នាំ២០២៥»។

ដោយឡែក របាយការណ៍ ក៏បានបង្ហាញថា តំបន់សេដ្ឋកិច្ចពិសេសក្នុងឆ្នាំ២០២៤ មានតំបន់ប្រតិបត្តិការសរុបចំនួន៣០ នៅទូទាំង១២រាជធានី និងខេត្ត កើនឡើងចំនួន៤ តំបន់ ឬច្រើនជាង១៥ ភាគរយ។ ក្នុងចំណោមនោះ សួនឧស្សាហកម្មមានតំបន់ប្រតិបត្តិការចំនួន២០ នៅក្នុងរាជធានី និងខេត្តចំនួន៥ កើនឡើងចំនួន៣ តំបន់ ឬ១៧ ភាគរយបើធៀបនឹងឆ្នាំ២០២៣។

ប្រភពវិនិយោគក្នុង និងក្រៅស្រុកក្នុងឆ្នាំ២០២៤ មានចំនួន៣២ប្រភព កើនឡើងចំនួន២ប្រភព ឬជាង៦ភាគរយ បើធៀបនឹងឆ្នាំ២០២៣ ។ ទាក់ទងនឹងទុនវិនិយោគ ការវិនិយោគសរុបក្នុងវិស័យឧស្សាហកម្មមានចំនួនជាង ២០ពាន់លានដុល្លារអាមេរិក កើនឡើងប្រមាណ១០ភាគរយ ធៀបនឹងឆ្នាំ២០២៣។ ទុនវិនិយោគក្នុងស្រុកមានចំនួនជិត៤ ពាន់លានដុល្លារអាមេរិក ស្មើនឹងប្រមាណ១៩ភាគរយនៃការវិនិយោគសរុប។

ឯកឧត្តម រដ្ឋមន្ត្រី បានបន្តទៀតថា ដើម្បីជំរុញវិស័យឧស្សាហកម្ម និងសេវាកម្ម ក្រសួងបានផ្តល់អាទិភាពដល់ការអភិវឌ្ឍន៍ឧស្សាហកម្ម 4.0 ស្របតាមនិន្នាការពិភពលោក ការរៀបចំសម្រាប់សេដ្ឋកិច្ចឌីជីថល ទាញយកឱកាសពង្រីកទីផ្សារអាជីវកម្មបច្ចេកវិទ្យា ជំរុញការស្រាវជ្រាវ និងនវានុវត្តន៍។ ក្រសួងក៏បានប្តេជ្ញាចិត្តក្នុងការជំរុញភាពជាសហគ្រិន និងគាំទ្រដល់ការរីកចម្រើននៃសហគ្រាសធុនតូច និងមធ្យម ដោយបន្តកិច្ចខិតខំប្រឹងប្រែង រួមមានការរៀបចំសេដ្ឋកិច្ចក្រៅប្រព័ន្ធដើម្បីបង្កើតការ​ងារថ្មី ក៏ដូចជាការអភិវឌ្ឍ និងកែសម្រួលក្របខ័ណ្ឌច្បាប់ និងបទប្បញ្ញត្តិផងដែរ ដែលគំនិតផ្តួចផ្តើមទាំងនេះមានគោលបំណង គាំទ្រដល់ការចាកចេញដោយជោគជ័យរបស់កម្ពុជា ពីក្រុមប្រទេសអភិ​   វឌ្ឍន៍តិចតួច (LDC) ត្រឹមឆ្នាំ២០២៩៕