ភ្នំពេញ៖ ក្នុងគោលបំណងសម្រេចឱ្យបាននូវគោលដៅទឹកស្អាតឆ្នាំ២០៣០ ក៏ដូចជាគោលដៅអភិវឌ្ឍន៍សហវត្សរ៍ទី៦ (SDG6), ក្រសួងបានផ្តោតលើការពង្រឹងតួនាទីជាយុទ្ធសាស្ត្ររបស់រដ្ឋក្នុងការគ្រប់គ្រងវិស័យនេះ និងប្រមែប្រមូលធនធានបន្ថែមគ្រប់ទម្រង់នៃការវិនិយោគទាំងសាធារណៈ និងឯកជនដើម្បីធានាបាននូវការផ្គត់ផ្គង់ទឹកស្អាត ដែលមិនត្រឹមតែសម្រាប់ការប្រើប្រាស់ប្រចាំជីវភាពប៉ុណ្ណោះទេ ប៉ុន្តែជាកាតាលីករជំរុញបរិវត្តកម្មសេដ្ឋកិច្ចនៅ​គ្រប់មូលដ្ឋាន។

នេះជាប្រសាសន៍លើកឡើងរបស់ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ក្នុងពិធីបិទសន្និបាតបូកសរុបលទ្ធផលការងារឆ្នាំ២០២៤និងលើកទិសដៅការងារឆ្នាំ២០២៥របស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យានិងនវានុវត្តន៍ នាព្រឹកថ្ងៃទី២៦ ខែកុម្ភៈ ឆ្នាំ២០២៥នៅសណ្ឋាគារសុខា រាជធានីភ្នំពេញ។

ឯកឧត្តមរដ្ឋមន្រ្តីបានមានប្រសាសន៍ថា៖ក្នុងវិស័យទឹកស្អាត ក្រសួងបានដឹកនាំឱ្យប្រតិបត្តិករផ្តល់សេវា, ពង្រឹងនិងពង្រីកសេវារបស់ខ្លួន ដោយពង្រីកបណ្តាញបំពង់ចែកចាយបាន ៦.០៧២ គ.ម. (កើន២០​%)ហើយផ្លាស់ប្តូរវិធីសាស្ត្រនៃការពង្រីកការតភ្ជាប់បណ្តាញពីការតម្រូវឱ្យបង់ថ្លៃសេវាភ្ជាប់មកជាការបង់បណ្តាក់ឬវិធីសាស្ត្រស្រង់ថ្លៃដើមផ្សេងៗ ដែលបានជួយសម្រួលនិងសម្រេចបានកំណើនតភ្ជាប់ថ្មីចំនួន ១៣៣.១០៣ តំណ។

ក្រសួងក៏បានបញ្ជូនសញ្ញាច្បាស់លាស់និងផ្តល់ពេលវេលា ក៏ដូចជាការគាំទ្រជាក់លាក់ ដើម្បីឱ្យប្រតិបត្តិករទាំងរដ្ឋនិងឯកជនពង្រឹងសមត្ថភាព សំដៅអនុលោមឱ្យបានតាមច្បាប់ស្តីពីការគ្រប់គ្រងទឹកស្អាត ជាពិសេសការបំពេញបាននូវលក្ខខណ្ឌនៃអាជ្ញាបណ្ណ។ ក្រសួងបានលើកទឹកចិត្តឱ្យមានការច្របាច់ដែនអាជ្ញាបណ្ណ និងអាជីវកម្មដែលខ្វះចីរភាពបញ្ចូលគ្នា ក៏ដូចជាការដកខ្លួននិងប្រគល់អាជ្ញាបណ្ណ មកក្រសួងវិញចំពោះប្រតិបត្តិការដែលមិនបានដំណើរការ និងខ្វះសមត្ថភាពទាំងបច្ចេកទេស និងធនធានហិរញ្ញវត្ថុ។

ទន្ទឹមនេះ ក្រសួងក៏កំពុងជំរុញគោលនយោបាយសន្សំសំចៃការប្រើប្រាស់ទឹកដែលកំពុង ក្លាយជាធនធានកម្រដែលអាចជួយសម្រាលបន្ទុកនៃការបន្ថែមវិនិយោគលើការពង្រីកការផ្គត់ផ្គង់ដែលកាន់តែមានតម្លៃខ្ពស់​។ ក្រសួង បានចាត់វិធានការបុរេសកម្មមួយចំនួន ដើម្បីធានាថាការរៀបចំផែនការផ្គត់ផ្គង់ទឹកស្អាត ពុំមែនត្រូវបានធ្វើក្រោយគម្រោងអភិវឌ្ឍន៍នានាទេ ប៉ុន្តែត្រូវដើរមុនគេឬទន្ទឹមគ្នាយ៉ាងហោចណាស់។ ជាមួយគ្នានេះ ក្រសួងក៏កំពុងរៀបចំឱ្យមានការធានាឱ្យបាននូវនិរន្តរភាពប្រភពទឹកសម្រាប់ការផលិតទឹកស្អាត តាមរយៈការវិនិយោគបន្ថែម ការស្នើសុំគ្រប់គ្រង ស្តារ និងពង្រីកប្រភពទឹកសក្តានុពល ក៏ដូចជាការប្រទាក់ក្រឡាគ្នាជាមួយគម្រោងធារាសាស្ត្រនានា និងការជំរុញម៉ូដែលថ្មីនៃការផ្គត់ផ្គង់ដុំទឹកស្អាត ដើម្បីដោះស្រាយបញ្ហារ៉ាំរ៉ៃរបស់ប្រតិបត្តិករឯកជនតូចតាច(បច្ចុប្បន្នយើងមាន ៤៤០)។

ឯកឧត្តម ហែម វណ្ឌី បានបញ្ជាក់ថា៖

«ក្រសួងក៏បានពង្រឹងការផ្តល់អាជ្ញាបណ្ណថ្មីនិងកំពុងសិក្សាសមិទ្ធិលទ្ធភាពនៃការរៀបចំយន្តការនិយតកម្មវិស័យទឹកស្អាតដើម្បីធានាការបំពេញបាននូវលក្ខខណ្ឌទាំងបួននៃការផ្តល់សេវា គុណភាព សុវត្ថិភាព និរន្តរភាព និងថ្លៃសមរម្យ»។

ឯកឧត្តម វង្សី វិស្សុត ឧបនាយករដ្ឋមន្ដ្រីប្រចាំការ បានជំរុញឱ្យក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្តន៍ បន្តពង្រីកការផ្គត់ផ្គង់ទឹកស្អាតទូទាំងប្រទេស ដោយត្រូវរៀបចំ និងអនុវត្តផែនការមេអភិវឌ្ឍន៍ វិស័យទឹកស្អាតតាមបណ្តារាជធានីខេត្តនិងពន្លឿនការអនុវត្តគម្រោងនានា,អភិវឌ្ឍបច្ចេកវិទ្យាដើម្បីគ្រប់គ្រង ការផ្គត់ផ្គង់ទឹកស្អាតប្រើទិន្នន័យនិងប្រព័ន្ធឆ្លាតវៃ ដើម្បីបំពេញតម្រូវការរបស់ប្រជាពលរដ្ឋនិងតំបន់ ឧស្សា​ហកម្ម ឆ្ពោះទៅការសម្រេចគោលដៅអភិវឌ្ឍន៍ប្រកបដោយចីរភាពឆ្នាំ២០៣០ដែលនាំឱ្យការផ្គត់ផ្គង់ទឹកស្អាតសម្រេចបានលក្ខខណ្ឌគោលទាំង៤ គឺទឹកស្អាតដែលមាន៖ គុណភាព, សុវត្ថិភាព, និរន្តរភាព និង ថ្លៃសមរម្យ។

ជាមួយគ្នានេះ ឯកឧត្តមឧបនាយករដ្ឋមន្ដ្រីក៏បានស្នើឱ្យពន្លឿនការសិក្សាសមិទ្ធិលទ្ធភាពនៃការពង្រឹងរបបនិយ័តកម្មវិស័យទឹកស្អាត និងការផ្តល់អាជ្ញាបណ្ណ, ពន្លឿនការរៀបចំអនុក្រឹត្យស្តីពីការរៀបចំ និងការប្រព្រឹត្តទៅរបស់ មូលនិធិអភិវឌ្ឍន៍វិស័យទឹកស្អាត។

សូមបញ្ជាក់ថា បច្ចុប្បន្នភាពនៃផែនការមេវិស័យទឹកស្អាតដំណាក់កាលទី៣ ឆ្នាំ២០២១-២០៣០ បានព្យាករណ៍ថា តម្រូវការទឹកស្អាតនឹងកើនឡើងដល់ប្រមាណជាង១,៨លានម៉ែត្រគូប ក្នុងមួយថ្ងៃ នៅត្រឹមដំណាច់ឆ្នាំ២០៣០៕