សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងព្រែកជីកហ្វូណនតេជោដែលបានរៀបចំពិធីបើកការដ្ឋានតាំងពីអំឡុងឆ្នាំ ២០២៤ បាននិងកំពុងបន្តនីតិវិធីទៅជាជាបន្តបន្ទាប់ ដូចជាដោះស្រាយផលប៉ះពាល់ ហើយគម្រោងគម្រោងនឹងបញ្ចប់ទាំងស្រុងនៅឆ្នាំ ២០២៨ ។ នេះបើតាមការបញ្ជាក់ពីឯកឧត្តម មាស សុខសេនសាន្ត រដ្ឋលេខាធិការ និងជាអ្នកនាំពាក្យក្រសួងសេដ្ឋកិច្ចនិងហិរញ្ញវត្ថុថ្លែងក្នុងវេទិកាសាធារណៈមួយកាលពីពេលថ្មីៗនេះ ។
ឯកឧត្តមមានប្រសាសន៍ថា គិតត្រឹមឆ្នាំ២០២៦នេះ វឌ្ឍនភាពនៃគម្រោងព្រែកជីកហ្វូណនតេជោ បានបញ្ចប់ការដោះស្រាយផលប៉ះពាល់កាលពីចុងឆ្នាំ២០២៥កន្លងទៅនេះ លើតម្រាយផ្លូវនៃគម្រោងព្រែកជីកហើយនៅឆ្នាំ២០២៦នេះ នឹងបន្តដោះស្រាយលើដីដែលត្រូវចាប់ផ្ដើមជីកបន្តទៀត ។
ឯកឧត្តមបន្តថា តាមផែនការ គម្រោងនេះ នឹងត្រូវបញ្ចប់ជីកឱ្យរួចរាល់នៅក្នុងអំឡុងឆ្នាំ២០២៨ ដូច្នេះយើងនៅមានពេលវេលាប្រមាណ២ទៅ៣ឆ្នាំ ដើម្បីសម្រេចឱ្យបាននូវផែនការ ។ បើតាមក្រុមហ៊ុនសាងសងបានបញ្ជាក់ថា ពួកគេចង់ឱ្យដោះស្រាយឱ្យចប់ ឬបានវែង ដើម្បីងាយស្រួលក្នុងការជីក ដោយមិនចង់ជីកបណ្ដើរដោះស្រាយបណ្ដើរផ្អាកបណ្ដើរនោះទេ គឺនៅពេលជីកត្រូវជីករហូតតែម្ដង ។
ឯកឧត្តមផន រឹម អ្នកនាំពាក្យសាធារណការនិងដឹកជញ្ជូនក៏បានថ្លែងប្រាប់នៅថ្ងៃទី ០៤ កុម្ភៈ ២០២៦នេះឱ្យដឹងថា គម្រោងព្រែកជីកហ្វូណនតេជោ មិនមានការប្រែប្រួលទេ គឺនៅតែបន្តទៅមុខ ដោយបច្ចុប្បន្ននេះកំពុងបន្តដោះស្រាយផលប៉ះពាល់ ដែលការដោះស្រាយនេះធ្វើឡើងតាមយន្តការដោះស្រាយរបស់រាជរដ្ឋាភិបាលដែលមានក្រសួងសេដ្ឋកិច្ចនិងហិរញ្ញវត្ថុជាអ្នកដឹកនាំ ។
ឯកឧត្តមបន្តថា ក្រុមហ៊ុនសាងសង់ និងក្រុមការងាររបស់រាជរដ្ឋាភិបាលក៏បានជួបប្រជុំគ្នាជាបន្តបន្ទាប់ដើម្បីជជែកពីពេលវេលាជាក់លាក់ក្នុងការចាប់ផ្ដើមជីកព្រែកនេះ ។ ដូច្នេះដំណើរការ មិនមានការប្រែប្រួលទេ ដោយនីតិវិធីកំពុងតែមានវឌ្ឍនភាពទៅមុខជាបន្តបន្ទាប់ផងដែរ ។
គួររម្លឹកថា គម្រោងព្រែកជីកហ្វូណនតេជោ ត្រូវបានចុះបញ្ជីនៅក្រុមប្រឹក្សាអភិវឌ្ឍន៍ក្នុងឆ្នាំ២០២៥ ដែលមានដើមទុនចុះបញ្ជីចំនួន១,២ពាន់លានដុល្លារអាមេរិក ដោយបង្កើតការងារសរុបប្រមាណ៣២០០កន្លែង ។ គម្រោងនេះ ស្ថិតនៅក្នុងខេត្តចំនួន រួមមានខេត្តកណ្ដាល ខេត្តតាកែវ ខេត្តកំពត និងខេត្តកែប ។
បើតាមប្រសាសន៍សម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា គម្រោងព្រែកជីកហ្វូណនតេជោនេះ គឺជាគម្រោងប្រវត្តិសាស្ត្រនិងជាផ្លូវទឹកថ្មីមួយរបស់កម្ពុជា ដែលនឹងធ្វើឱ្យថ្លៃដឹកជញ្ជូនកាន់តែតិចជាងមុន និងលែងពឹងពាក់បរទេសទៀត ។ ផ្លូវទឹកថ្មីៗនេះ មិនត្រឹមតែសម្រាប់ដឹកជញ្ជូនទំនិញទេ តែវាក៏សម្រាប់ដឹកភ្ញៀវទេសចរតាមផ្លូវទឹកពីភ្នំពេញ ( ផ្លូវទឹកសាបទៅ ខេត្តកែប ( ផ្លូវសមុទ្រ) និងបន្តទៅកាន់ខេត្តកំពតនិងខេត្តព្រះសីហនុបន្តទៀត ។
ទន្ទឹមនឹងគម្រោងព្រែកជីកហ្វូណនតេជោ កំពុងដំណើរការនីតិវិធីនេះដែរ ក្រុមហ៊ុនOCIC ដែលជាក្រុមហ៊ុនអភិវឌ្ឍន៍អាកាសយានដ្ឋានអន្តរជាតិតេជោ ក៏បានបង្ហើបគម្រោងសាងសង់ផ្លូវទឹកមួយខ្សែទៀតតភ្ជាប់ពីអាកាសយានដ្ឋានអន្តរជាតិតេជោទៅកាន់ទន្លេបាសាក់ និងបន្តចូលផ្លូវព្រែកជីកហ្វូណនតេជោ ដោយគម្រោងនេះគ្រោងចាយទុនរហូតដល់១០០លានដុល្លារអាម៉េរិក ៕
Account
Security
Favourite Content