ភ្នំពេញ ៖ អស់រយៈពេលជិត៤ឆ្នាំ ការអនុវត្តគម្រោង «បង្កើតការងារជាសេដ្ឋកិច្ចវិលជុំរបស់សហគមន៍នេសាទនៅបឹងទន្លេសាបខាងលិចក្នុងតំបន់១»  ដែលផ្តល់មូលនិធិដោយសហភាពអឺរ៉ុប បានឈានដល់ទីបញ្ចប់ ដោយបាននាំមកនូវការផ្លាស់ប្តូរវិជ្ជមានសម្រាប់សហគមន៍នេសាទនៅជុំវិញតំបន់ឋបនីយជីវមណ្ឌលបឹងទន្លេសាប ។

អ្នកចូលរួមក្នុងកម្មវិធីនេះមានប្រមាណជិត ១០០នាក់ ដែលនៅក្នុងនោះរួមមានតំណាងមកពីរដ្ឋបាលជលផល ក្រសួងកសិកម្ម រុក្ខាប្រមាញ់ និងនេសាទ ក្រសួងអភិវឌ្ឍន៍ជនបទ ក្រសួងអប់រំ យុវជន និងកីឡា សហភាពអឺរ៉ុប ដៃគូអនុវត្តគម្រោង អង្គការសង្គមស៊ីវិល អាជ្ញាធរថ្នាក់មូលដ្ឋាន និងសហគមន៍។ កម្មវិធីនេះបានបង្ហាញពីលទ្ធផលរបស់គម្រោងដែលសម្រេចបានតាមរយៈការរួមបញ្ចូលគ្នានូវការអភិវឌ្ឍប្រកបដោយចីរភាព ការការពារបរិស្ថាន និងនវានុវត្តន៍។

តាមរយៈការចូលរួមយ៉ាងសស្រាក់សស្រាំរបស់សហគមន៍ និងកិច្ចសហការអន្តរក្រសួង គម្រោងនេះបានបង្កើនលទ្ធភាពក្នុងការទទួលបានទឹកស្អាត អនាម័យ ការអប់រំ និងជម្រើសសម្រាប់ការចិញ្ចឹមជីវិតរបស់ សហគមន៍។

គម្រោងនេះ បានសម្រេចលទ្ធផលគួរជាទីមោទនៈ ដែលក្នុងនោះវិស័យទឹកស្អាត៖ ពលរដ្ឋចំនួន ២ ០០០នាក់ និងសិស្សចំនួន ៣ ២០០នាក់ បានទទួលទឹកស្អាតប្រើប្រាស់ ចំណែកអនាម័យ រៀបចំឱ្យមានភាពប្រសើរឡើងនូវអនាម័យដល់សិស្សចំនួន ២០ ០០០ នាក់ រីឯគំនិតផ្តួចផ្តើមឥដ្ឋអេកូ កែឆ្នៃប្លាស្ទិកទម្ងន់ ៤០០០គីឡូក្រាម បង្កើតប្រាក់ចំណូលសម្រាប់សហគមន៍នេសាទ សម្រាប់ជំនួយផ្នែកអប់រំ សិស្សិចំនួន ១០ ០០០នាក់ ទទួលបានអត្ថប្រយោជន៍ពីអាហារូបករណ៍ និងសម្ភារៈសិក្សាក្នុងថ្នាក់ ហើយពាក់ព័ន្ធនឹងកំណើនសេដ្ឋកិច្ចគឺជួយជំរុញការផលិតទឹកឃ្មុំ ទេសចរណ៍ធម្មជាតិ ថាមពលក្រៅបណ្តាញ និងការទទួលបានទីផ្សារសម្រាប់ក្រុមដែលដឹកនាំដោយស្ត្រី។

លោកស្រី ភាណ សោភ័ណ នាយិកាអង្គការអុកស្វាម បានលើកឡើងថា ៖ «តាមរយៈគម្រោង EU-CAPFISH/FOSTER Lot 1 យើងបានមើលឃើញនូវភាពច្នៃប្រឌិត និងភាពធន់គួរឱ្យកត់សម្គាល់របស់សហគមន៍នេសាទក្នុងតំបន់ឋបនីយជីវមណ្ឌលបឹងទន្លេសាប។ ដោយមានការបញ្ចូលការអនុវត្តប្រកប​ដោយនិរន្តរភាព គម្រូសេដ្ឋកិច្ចវិលជុំ និងការអប់រំប្រកបដោយបរិយាបន្ន យើងមិនត្រឹមតែពង្រឹងជីវភាពរស់នៅរបស់សហគមន៍ប៉ុណ្ណោះទេ ប៉ុន្តែថែមទាំងបានលើកកម្ពស់និរន្តរភាពបរិស្ថានទៀតផង។ ខណៈពេលដែលយើងកំពុងសាទរនូវសមិទ្ធផលនេះ អង្គការអុកស្វាមក៏សូមអំពាវនាវដល់អង្គការដៃគូ អ្នកបង្កើតគោលនយោបាយ និងសហគមន៍បន្តវិនិយោគលើរាល់ដំណោះស្រាយទាំងឡាយណាដែលគាំទ្រសហគមន៍ និងការពារធនធានធម្មជាតិរួមរបស់យើងទាំងអស់គ្នា»។

លោក Koen EVERAERT អនុប្រធានកិច្ចសហប្រតិបត្តិការនៅសហភាពអឺរ៉ុបប្រចាំកម្ពុជាបានមានប្រសា​ស​ន៍បន្ថែមថា៖

«គម្រោងនេះឆ្លុះបញ្ចាំងពីការប្តេជ្ញាចិត្តរបស់សហភាពអឺរ៉ុបឆ្ពោះទៅរកការអភិវឌ្ឍប្រកប​ដោយ​ចីរភាព។ តាម​រយៈ​ការពង្រឹងនូវសេវាកម្មដែលចាំបាច់ និងការបង្កើតឱ្យចរន្តសេដ្ឋកិច្ចនៅក្នុងសហគមន៍ គម្រោង CAPFISH/​​FOSTER ដែលគាំទ្រដោយសហភាពអឺរ៉ុប បានដាក់ចេញជាមូលដ្ឋានគ្រឹះដ៏រឹងមាំសម្រាប់​សហគមន៍នេសាទឲ្យមានភាពធន់ និងភាពជាម្ចាស់ការ។ គម្រោងនេះក៏បង្ហាញពីកិច្ចសហប្រតិ​បត្តិការដ៏រឹងមាំរបស់សហភាពអឺរ៉ុបជាមួយនឹងរាជរដ្ឋាភិបាលកម្ពុជាដែលជាផ្នែកមួយនៃកិច្ចខំប្រឹងតាមរយៈ Global Gatewayក្នុងការគាំទ្រដល់ការប្រកបជីវិតដែលមានភាពធន់ និងជួយគាំទ្រកម្ពុជាក្នុងដំណើរឆ្ពោះទៅកាន់ការចាកចេញពីប្រទេសអភិវឌ្ឍន៍តិចតួច(LDC)»។

ឯកឧត្តម ស្រ៊ុន លឹមសុង អគ្គនាយករងនៃរដ្ឋបាលជលផល និងជានាយករងនៃកម្មវិធី EU-CAPFISH-Capture នៃក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា៖

«គម្រោង EU-CAPFISH​/FOSTER គឺជាសក្ខីភាពដែលសម្រេចបានតាមរយៈភាពជាដៃគូដ៏រឹងមាំ និងចក្ខុវិស័យរួម។ រដ្ឋបាលជលផលមានមោទនភាពណាស់ក្នុងភាពជាដៃគូជាមួយសហភាពអឺរ៉ុប និងដៃគូរបស់យើងក្នុងការលើកកម្ពស់សហគមន៍ និងការគ្រប់គ្រងជលផលប្រកបដោយនិរន្តរភាព»។

គម្រោង EU-CAPFISH/FOSTER Lot 1 បានអនុវត្តក្នុងភាពជាដៃគូជាមួយដៃគូអភិវឌ្ឍន៍ចំនួន ១៣ រួមមាន អង្គការអេដ អេ អាកស្យុង ក្រុមហ៊ុនសាជីវកម្មសហគមន៍កសិកម្មកម្ពុជា អង្គការជនពិការកម្ពុជា អង្គការសមាគមថែរក្សាបរិស្ថាន និងវប្បធម៌ អង្គការសម្ព័ន្ធភាពដើម្បីអភិរក្សធនធានជលផល អង្គការសកម្ម​ភាពសម្រាប់ការអប់រំនៅកម្ពុជា ក្រុមហ៊ុន OKRA សូឡា អង្គការប្រតិបត្តិការកុមារកម្ពុជា PAVILION អង្គការសន្សំម្លប់ព្រៃ អង្គការទឹកស្អាត១០០១ វេទលែនវើក និងអង្គការសមាគមអភិរក្សសត្វព្រៃ៕