ភ្នំពេញ៖ តំបន់សេដ្ឋកិច្ចពិសេសក្រុងព្រះសីហនុ (SSEZ)បានទាក់ទាញក្រុមហ៊ុនចំនួន ២០២ មកពីជាង ១០ ប្រទេស និងបានបង្កើតឱកាសការងារជាង ៣២ ០០០នាក់ សម្រាប់ប្រទេសកម្ពុជា ដែលការនេះបានបង្ហាញពីការលើកកម្ពស់ជីវភាពរបស់ប្រជាជនកម្ពុជានៅតាមមូលដ្ឋានក្នុងខេត្តព្រះសីហនុ ក៏ដូចជាមកពីបណ្តាខេត្តដែលស្ថិតនៅក្បែរគ្នា។

ថ្លែងក្នុងកិច្ចសម្ភាសជាមួយប្រព័ន្ធផ្សព្វផ្សាយរួមគ្នាជាមួយអ្នកកាសែត People’s Daily និងអ្នកកាសែតកម្ពុជា កាលពីថ្ងៃទី៤ ខែមេសា ឆ្នាំ២០២៥ នៅតំបន់សេដ្ឋកិច្ចពិសេសក្រុងព្រះសីហនុ លោក លីវ លានឈី( Liu Lianchi )នាយករងគ្រប់គ្រងតំបន់សេដ្ឋកិច្ចពិសេសបានសង្កត់ធ្ងន់លើសារៈសំខាន់នៃតំបន់នេះលើផ្នែកការងារ និងការអភិវឌ្ឍ។

លោក Liu បាននិយាយថា ៖

«យើងបានបង្កើតការងារជាង ៣២ ០០០នាក់ នៅក្នុងតំបន់របស់យើង ។ ឱកាសការងារ​បាន​ធ្វើ​ឲ្យ​ប្រាក់​ចំណូល​របស់​កម្មករ​ក្នុង​ស្រុក​ប្រសើរ​ឡើង​យ៉ាង​ខ្លាំង និង​លើក​កម្ពស់​ជីវភាព​រស់​នៅ​របស់​ពួក​គាត់»។

លោក លីវ បានបន្តថា ៖ តំបន់សេដ្ឋកិច្ចពិសេសក្រុងព្រះសីហនុ(SSEZ)ត្រូវបានបង្កើតរួមគ្នាដោយក្រុមហ៊ុនប្រទេសចិន និងកម្ពុជា ។ ដោយមានទំហំផ្ទៃដីអភិវឌ្ឍន៍សរុប ១១,១៣ គីឡូម៉ែត្រក្រឡា SSEZ គឺជាវេទិកាវិនិយោគឆ្លងដែនមួយសម្រាប់ក្រុមហ៊ុនដែលមកពីបណ្តាប្រទេសនៅទូទាំងពិភពលោក។ តំបន់សេដ្ឋកិច្ចពិសេសនេះមានចម្ងាយ ប្រហែល ១៧ គីឡូម៉ែត្រពីក្រុងព្រះសីហនុ ១២ គីឡូម៉ែត្រពីកំពង់ផែស្វយ័តក្រុងព្រះសីហនុ ចម្ងាយត្រឹមតែ៣ គីឡូម៉ែត្រពីអាកាសយានដ្ឋានអន្តរជាតិក្រុងព្រះសីហនុ និងមានចម្ងាយ ៤ គីឡូម៉ែត្រពីច្រកចេញ-ចូលផ្លូវល្បឿនលឿនភ្នំពេញ-ព្រះសីហនុ ។

លោក Liu បានលើកឡើងថា៖

«SSEZ ជានិមិត្តរូបនៃមិត្តភាពកម្ពុជា-ចិនដ៏រឹងមាំនៅក្នុងខេត្តព្រះសីហនុ។ វាត្រូវបានផ្សាភ្ជាប់យ៉ាងជិតស្និទ្ធជាមួយវិទ្យាស្ថានពាណិជ្ជកម្ម និងបច្ចេកវិទ្យាខេត្តព្រះសីហនុ (SIBT) ដែលដើរតួនាទីក្នុងការផ្គត់ផ្គងកម្លាំងពលកម្មនិងមូលធនជំនាញក្នុងតបន់។សហគ្រាសចំនួន ២០២ មកពីប្រទេសចិន អឺរ៉ុប សហរដ្ឋអាមេរិក អាស៊ាន និងតំបន់ផ្សេងទៀតបានបង្កើតប្រតិបត្តិការនៅក្នុងតំបន់នេះ។ ទាំងនេះមានប្រហែល ៧០% នៃរោងចក្រខេត្តទាំងអស់ ដែលបញ្ជាក់បន្ថែមអំពីតួនាទីសំខាន់របស់ SSEZ ក្នុងការជំរុញឧស្សាហូបនីយកម្មក្នុងតំបន់»។

លោក Liu បានបញ្ជាក់ថា ៖ បង្កើតឡើងក្នុងឆ្នាំ២០០៨  តំបន់តំបន់សេដ្ឋកិច្ចពិសេសក្រុងព្រះសីហនុ ជារឿយៗត្រូវបានគេហៅថាជា “ម៉ាស៊ីននៃការអភិវឌ្ឍសេដ្ឋកិច្ចក្នុងស្រុក” និង “ចានមាស” សម្រាប់ប្រជាជន»។

ទាក់ទងនឹងការអភិវឌ្ឍ លោក លីវ លានាឈី បានឱ្យដឹងថា៖ ការអនុវត្តដំបូងសម្រេចបានក្នុងផ្ទៃដី៦ គីឡូម៉ែត្រការ៉េ មានប្រព័ន្ធផ្លូវ ប្រព័ន្ធអគ្គិសនី ប្រព័ន្ធទឹកស្អាត ប្រព័ន្ធទូរគមនាគមន៍ ប្រពន្ធបង្ហូរទឹកកខ្វក់ និងបាន​ឈូសឆាយដីឱ្យរាបស្មើផងដែរ ហើយក៏បានសាងសង់អាងប្រព្រឹត្តិកម្ម រោងចក្រចំហាយផ្តុំជាមួយអគ្គិសនី និងអនុស្ថានីយអគ្គិសនីតង់ស្យុងខ្ពស់ជាតិកម្ពុជា ព្រមទាំងសាងសង់អគារមជ្ឈមណ្ឌលពុហសេវាកម្ម អគា​អា​ផាតមិនបុគ្គលិក អន្តេវាសិកដ្ឋានសម្រាប់កម្មករនិយោជិត មជ្ឈមណ្ឌលនេស៊ីហ្វូដ និងមណ្ឌលសុខភាពជាដើម។ ក្នុងតំបន់សេដ្ឋកិច្ចពិសេសបានដាក់ចេញនូវ “ច្រកចេញចូលតែមួយ” ដែលបណ្តុំដោយក្រុមប្រឹក្សាអភិ​វ​ឌ្ឍ​ន៍កម្ពុជា អគ្គនាយកដ្ឋានគយនិងរដ្ឋាករ ក្រសួងពាណិជ្ជកម្ម ក្រសួងការងារ និងបណ្តុះបណ្តាលវិជ្ជាជីវៈ រដ្ឋបាលខេត្តព្រះសីហនុ មជ្ឈ​មណ្ឌល សេវាកម្មច្បាប់ និងបានសាងសង់វិទ្យាស្ថានចំនួនទាំងពីរ គឺវិទ្យាស្ថានពហុបច្ចេកទេសច្ចេកទេសមិត្តភាពកម្ពុជា ចិន ខេត្តព្រះសីហនុ និងវិទ្យាស្ថានធុរកិច្ចនិងបច្ចេកវិទ្យាក្រុងព្រះសីហនុ។

ក្នុងអំឡុងពេលបង្កើតតំបន់នេះឡើង ក្រុមហ៊ុនតំបន់សេដ្ឋកិច្ចពិសេសក្រុងព្រះសីហនុ តែងតែប្រកាន់ខ្ជាប់តាមគោលគំនិតអភិវឌ្ឍន៍ រួមគ្នាឈ្នះទាំងប្រាំបីភាគីជាមួយម្ចាស់ភាគហ៊ុន បុគ្គលិក អតិថិជន អ្នកផ្គត់ផ្គង់ ដៃគូរដ្ឋាភិបាល បរិស្ថាន សហគមន៍ ការអភិវឌ្ឈន៍ សេដ្ឋកិច្ចបណ្តើរនិងផ្តល់ផលប្រយោជន៍ការអភិវឌ្ឈដល់មូលដ្ឋានជុំវិញបណ្តើរ ។ម៉្យាងវិញទៀត ប្រកាន់ខ្ជាប់ខ្ជួនបំពេញទំនួលខុសត្រូវសង្គម រួមទាំងការបរិច្ចាគថវិកា សាងសង់សាលារៀន ឧបត្ថម្ភថវិកាជូនកាកបាទក្រហមកម្ពុជាជាច្រើនលើក បរិច្ចាគទឹកស្អាតនិងអង្ករដល់ជនរងគ្រោះក្នុងមូលដ្ឋាន និងបរិច្ចាគថវិកាជួយការអប់រំ និងបង្កើត សកម្មភាពជួយសិស្សក្រីក្រដែលមានការលំបាកតាមរយៈ“មួយជួយមួយ” បង្កើត “អង្គការ អ្នកស្ម័គ្រចិត្តសប្បុរសធម៌សាធារណៈ មិត្តភាពកម្ពុជា-ចិន” ដើម្បីអនុវត្តសកម្មភាពសប្បុរស ធម៌រយៈពេលវែង ឧបត្ថម្ភសម្ភារៈប្រឆាំងនឹងជំងឺកូវីដ-១៩យ៉ាងសកម្ម ក្រោយការរីករាលដាលនៃជំងឺកូវីដ-១៩។

លោកនាយករង បានឱ្យដឹងទៀតថា៖ រដ្ឋាភិបាលកម្ពុជាប្តេជ្ញាកសាងខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុ បំណង ក្នុងជំហានបន្ទាប់ ចំណែកក្រុមហ៊ុនតំបន់សេដ្ឋកិច្ចពិសេសក្រុងព្រះសីហនុនឹងដើរតួនាទីការដឹកនាំឧស្សាហកម្មខេត្តព្រះសីហនុ និងពន្លឿនការអភិវឌ្ឍន៍ប្រកបដោយគុណភាពខ្ពស់នៃតំបន់សេដ្ឋកិច្ចពិសេស ហើយនៅទីបញ្ចប់ សាងសង់ទៅជាឧទ្យានអន្តរជាតិឆ្លាតវៃមានមុខ ងារគាំទ្រពេញលេញ ប្រែក្លាយទៅជាតំបន់ឧស្សាហកម្មថ្មីដែលមានខ្សែសង្វាក់ឧស្សាហកម្ម ពេញលេញ និងប្រកបដោយភាពបៃតង បើកចំហ បរិយាបន្ន ដែលចុះសម្រុង ដើម្បីជំរុញការបង្កើតច្រករបៀងឧស្សាហកម្មនិងបច្ចេកវិទ្យារបស់កម្ពុជា។

ដោយឡែក រាជរដ្ឋាភិបាលកម្ពុជាបានកំណត់យកខេត្តព្រះសីហនុជាគោលដៅ និងជំរុញការវិនិយោគ ដើម្បីកែប្រែខេត្តមួយនេះឱ្យក្លាយជាមជ្ឈមណ្ឌលពាណិជ្ជកម្មឡូជីស្ទីក និងទេសចរណ៍ ដោយបានរៀបចំនូវគម្រោងប្លង់មេរួចរាល់ និងត្រៀមប្រកាសនៅឆ្នាំ២០២៥ខាងមុខនេះ ។ នៅក្នុងផែនការមេអភិវឌ្ឍន៍ខេត្តព្រះសីហនុ រយៈពេល១៥ឆ្នាំ រាជរដ្ឋាភិបាលរំពឹងថានឹងទទួលបានទុនវិនិយោគប្រមាណ២០ពាន់លានដុល្លារអាមេរិក ។

បើតាមឯកឧត្តម ជា កុកហុង  ប្រធានលេខាធិការដ្ឋានផែនការមេអភិវឌ្ឍខេត្តព្រះសីហនុជាតំបន់សេដ្ឋកិច្ចពិសេសគំរូពហុបំណង និងអភិវឌ្ឍបណ្តាខេត្តជាប់ឆ្នេរសមុទ្រកម្ពុជា ជារបៀងសេដ្ឋកិច្ចពហុបំណង និងប្រទាក់ក្រឡា ធ្លាប់បានមានប្រសាសន៍ថា៖ ផែនការមេអភិវឌ្ឍន៍ខេត្តព្រះសីហនុជាតំបន់សេដ្ឋកិច្ចពិសេសគំរូពហុបំណងនេះ ជាគម្រោងវិនិយោគដ៏ធំរបស់រាជរដ្ឋាភិបាល ដែលបានគិតគូគ្រប់ជ្រុងជ្រោយក្នុងការអភិវឌ្ឍខេត្តព្រះសីហនុទៅជាមជ្ឈមណ្ឌលពាណិជ្ជកម្មឡូជីស្ទីក និងជាតំបន់ទេសចរណ៍ដ៏ល្បីល្បាញនៅក្នុងតំបន់អាស៊ានក្នុងរយៈពេល១៥ឆ្នាំ ។ គម្រោងនេះ នឹងអាចទាក់ទាញវិនិយោគិនពីវិស័យឯកជន និងដៃគូអភិវឌ្ឍន៍បានជាង២០ពាន់លានដុល្លារអាមេរិក ហើយនឹងធ្វើឱ្យចំណូលផលិតផលក្នុងស្រុកសរុបក្នុងខេត្តព្រះសីហនុ ដែលសំដៅលើចំណូលជាមធ្យមរបស់ពលរដ្ឋក្នុងខេត្តនេះកើនឡើងបន្ថែមទៀត តាមរយៈការទទួលបានឱកាសការងារធ្វើ ជាមួយនឹងប្រាក់កម្រៃខ្ពស់ជាងមុន និងទទួលបានជំនាញបន្ថែមពីការវិនិយោគទាំងនោះ ។

ឯកឧត្តមបន្តថា នៅក្នុងផែនការមេអភិវឌ្ឍន៍ខេត្តព្រះសីហនុនេះ នឹងរៀបចំបែងចែកតំបន់ទៅតាមសក្ដានុពលភាពសេដ្ឋកិច្ចដែលមាននៅក្នុងខេត្ត ដូចជាតំបន់ឡូជីស្ទីក ឧស្សាហកម្ម ពាណិជ្ជកម្ម តំបន់ទេសចរណ៍ពិសិដ្ឋ និងតំបន់ហិរញ្ញវត្ថុជាដើម ។ ការបែងចែកតំបន់នេះ មានសារសំខាន់ណាស់ ដើម្បីទាក់ទាញនិងសម្រួលដល់ការវិនិយោគ ជាក់ស្ដែងតាមបទពិសោធន៍នៅទីក្រុងធំៗលើពិភពលោកនេះ ក៏មានការបែងចែកតំបន់ដូចគ្នានេះដែរ ។ នៅក្នុងការបែងចែកតំបន់ក្នុងខេត្តព្រះសីហនុ នឹងរៀបចំហេដ្ឋារចនាសម្ព័ន្ធឆ្អឹងខ្នង បន្ទាប់មកនឹងរៀបចំឱ្យមានគោលនយោបាយពិសេសទៅតាមតំបន់នីមួយៗ ដូចជាការលើកទឹកចិត្តពន្ធ ការលើកទឹកចិត្តជាការសម្របសម្រួលអនុលោមភាព ការផ្ដល់សេវាច្រកចេញចូលតែមួយរហ័សទាន់ចិត្ត និងការសម្រួលពាណិជ្ជកម្មជាដើម ៕