ភ្នំពេញ៖ ការិយាល័យកយកា (KOICA) ប្រចាំកម្ពុជា បានបង្ហាញពីកិច្ចគាំទ្រយ៉ាងពេញទំហឹងទៅលើការធ្វើពិពិធកម្មលើវិស័យកសិកម្មកម្ពុជាឱ្យកាន់តែល្អប្រសើរ ជាមួយនឹងការផ្តល់នូវជំនួយឥតសំណងប្រមាណ ១២ លានដុល្លារអាមេរិក ដែលគ្រោងអនុវត្តពីឆ្នាំ ២០២៥ ដល់ឆ្នាំ ២០៣០ ខាងមុខនេះ។

លោកស្រី Choi Moonjung នាយិកាប្រចាំប្រទេសនៃការិយាល័យកយកា (KOICA) ប្រចាំកម្ពុជា នៅថ្ងៃទី២៣ ខែធ្នូ ឆ្នាំ២០២៤ បានជួបពិភាក្សាការងារជាមួយ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ពិភាក្សាផ្តោតលើការគាំទ្រចំពោះជំនួយក្នុងការលើកកម្ពស់សមត្ថភាព និងគុណភាពនៃសេវាផ្សព្វផ្សាយកសិកម្មនៅកម្ពុជា។ ការប្តេជ្ញាចិត្តនេះត្រូវបានបញ្ជាក់តាមរយៈការសិក្សាគ្រប់ជ្រុងជ្រោយនៃគម្រោង “Building of Integrated Agriculture Extension-Education-Research Nexus of Climate Change Ada​pta​ti​on​​ in Cambodia ” ដែលត្រូវបានសិក្សាចាប់ពីថ្ងៃទី១៦ ខែធ្នូ ឆ្នាំ២០២៤ ហើយត្រូវបានបញ្ចប់តាមរយៈកិច្ចប្រជុំបូកសរុបការងារកាលពី ថ្ងៃទី២៣ ខែធ្នូ ឆ្នាំ ២០២៤ រវាងជំនួបពិភាក្សារវាងថ្នាក់ដឹកនាំរបស់ទីភ្នាក់ងារកយកា និងក្រសួងកសិកម្មរុក្ខាប្រមាញ់ និងនេសាទ។

តាមរយៈជំនួបពិភាក្សានេះ ទីភ្នាក់ងារកយកា (KOICA) បានគូសបញ្ជាក់ពីការគាំទ្ររបស់ខ្លួននូវជំនួយឥតសំណងប្រមាណ ១២ លានដុល្លារអាមេរិក ដែលគ្រោងអនុវត្តពីឆ្នាំ ២០២៥ ដល់ឆ្នាំ ២០៣០។ មហាវិទ្យាល័យអប់រំ និងសារគមនាគមន៍កសិកម្ម នឹងត្រូវបានធ្វើឧ្យប្រសើរឡើង ដែលរួមបញ្ចូលទាំងការសាងសង់អគារដែលមានអន្តេវាសិកដ្ឋាន និងឧបករណ៍សម្រាប់ការអនុវត្តក្នុងប្រព័ន្ធផ្សព្វផ្សាយ និងទំនាក់ទំនង ព្រមទាំងការបង្កើតកម្មវិធីសិក្សា និងសម្ភារៈបណ្តុះបណ្តាលចាំបាច់នានា ដើម្បីផ្តល់ការអប់រំកម្រិតឧត្តមសិក្សាសម្រាប់ សិស្សានុសិស្សទូទៅ។ លើសពីនេះ សមត្ថភាពមន្ត្រីរដ្ឋាភិបាលដែលទទួលបន្ទុកក្នុងសេវាកម្មផ្សព្វផ្សាយកសិកម្ម ដែលភាគច្រើនជាមន្រ្តីផ្សព្វផ្សាយកសិកម្មឃុំទូទាំងប្រទេស នឹងត្រូវបានពង្រឹងសមត្តិភាព។ កម្មវិធីពង្រឹងសមត្ថភាពនេះនឹងផ្តោតមិនត្រឹមតែលើជំនាញបច្ចេកទេស និងការសម្របសម្រួលកសិកម្មប៉ុណ្ណោះទេ ថែមទាំងលើការផលិតសម្ភារៈផ្សព្វផ្សាយផងដែរ។ កម្មវិធីនេះមានគោលបំណងពង្រឹងសេវាផ្សព្វផ្សាយកសិកម្មនៅថ្នាក់មូលដ្ឋាន ដើម្បីលើកកំពស់ជីវភាពរបស់កសិករកម្ពុជា។

ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានសង្កត់ធ្ងន់លើសារៈសំខាន់នៃការវិនិយោគលើធនធានមនុស្សក្នុងវិស័យកសិកម្ម ជាពិសេសសេវ៉ាផ្សព្វផ្សាយកសិកម្ម។ ឯកឧត្តមបានបន្ថែមថា ការវិនិយោគលើសមត្ថភាពរបស់ មន្ត្រីកសិកម្មឃុំ គឺមានសារៈសំខាន់ណាស់សម្រាប់ធានាថាកសិករកម្ពុជាទទួលបានចំណេះដឹង និងបច្ចេកវិទ្យាចុងក្រោយបង្អស់របស់កសិកម្ម។ តាមរយៈការផ្តល់សិទ្ធិអំណាចដល់មន្រ្តីជួរមុខទាំងនេះ យើងអាចរួមចំណែកដល់ការបង្កើនផលិតភាពកសិកម្ម ការកែលម្អសន្តិសុខស្បៀង និងការអភិវឌ្ឍន៍ជនបទប្រកបដោយចីរភាព។

លោកស្រី Choi Moonjung នាយិកាប្រចាំប្រទេសនៃការិយាល័យកយកានៅប្រទេសកម្ពុជាបានមានប្រសាសន៍ថា ទីភ្នាក់ងារកយកា តែងតែរួមគ្នាជាមួយរដ្ឋាភិបាលកម្ពុជាសម្រាប់ការអភិវឌ្ឍន៍សេដ្ឋកិច្ច និងសង្គម។ ជាក់ស្តែង គម្រោងនេះចូលរួមចំនែកយ៉ាងខ្លាំងក្លា ដល់ការគាំទ្រដល់កម្មវិធីទីពីរនៃកម្មវិធីគោលនយោបាយអាទិភាពកម្ពុជាសម្រាប់វិស័យកសិកម្ម។ តាងនាមឱ្យរដ្ឋាភិបាលនៃសាធារណរដ្ឋកូរ៉េ ទីភ្នាក់ងារកយកា បានប្តេជ្ញាលើការបំពេញភារកិច្ចរបស់ខ្លួន ដើម្បីពង្រឹងភាពជាដៃគូរវាងប្រទេសទាំងពីរ និងធ្វើឱ្យប្រជាជនកាន់តែជិតស្និទ្ធជាមួយគ្នា។ ទីភ្នាក់ងារកយកា បានចូលរួមយ៉ាងសកម្មក្នុងការអភិវឌ្ឍជនបទក្នុងប្រទេសកម្ពុជា ដោយផ្តោតលើការលើកកម្ពស់ជីវភាព និងការបង្កើតប្រាក់ចំណូលកសិកម្ម។ ក្រៅពីគម្រោងដែលមានក្នុងផែនការនេះ បច្ចុប្បន្ន ទីភ្នាក់ងារកយកាបាននិងកំពុងអនុវត្តគម្រោងភូមិសន្តិភាពនៅក្នុងភូមិចំនួន ៣០ នៅភូមិភាគពាយ័ព្យ រួមមាន បាត់ដំបង បន្ទាយមានជ័យ និងប៉ៃលិន ក្នុងគោលបំណងជំរុញការអភិវឌ្ឍន៍ជនបទប្រកបដោយចីរភាព និងបរិយាប័ន៕