បរទេស ៖ យោងតាមប្រភពព័ត៌មានពី BBC បានរាយការណ៍ថា សហរដ្ឋអាម៉េរិក និងចិន បានព្រមព្រៀងគ្នាលើក្របខណ្ឌមួយសម្រាប់ការបន្ថយភាពតានតឹងពាណិជ្ជកម្មរវាងមហាអំណាចទាំងពីរ។ កិច្ចព្រមព្រៀងនេះ​បាន​កើតឡើងបន្ទាប់​ពីមាន​ការ​ចរចារយៈពេល​២ថ្ងៃ​ក្នុង​ទីក្រុង​ឡុងដ៍រវាង​មន្ត្រី​កំពូល​មក​ពី​ទីក្រុង​ប៉េកាំង​ និង​ទីក្រុង​វ៉ាស៊ីនតោន លើការដាក់សន្ធិសញ្ញាពាណិជ្ជកម្មរបស់ពួកគេឡើងវិញ និងដោះស្រាយការរឹតបន្តឹងលើការនាំចេញរបស់ចិន ខណៈការនាំចេញរ៉ែកម្ររបស់ចិន គឺជាចំណុចសំខាន់នៅក្នុងរបៀបវារៈនៃកិច្ចប្រជុំ។ ទន្ទឹមនឹងនេះ ភាគីទាំងពីរនឹងយកកិច្ចព្រមព្រៀងនេះទៅកាន់មេដឹកនាំទាំងពីរ Donald Trump និង Xi Jinping ដើម្បីធ្វើការអនុម័ត។

រដ្ឋមន្ត្រីក្រសួងពាណិជ្ជកម្មអាម៉េរិក លោក Howard Lutnick បានលើកឡើង លទ្ធផលនៃកិច្ចព្រមព្រៀងគួរតែឈានទៅរកការបន្ធូរបន្ថយនៃការរឹតបន្តឹងលើរ៉ែកម្រ និងមេដែក។

លោកបញ្ជាក់ថា ៖

«យើងបានឈានដល់ក្របខ័ណ្ឌមួយដើម្បីអនុវត្តកិច្ចព្រមព្រៀងទីក្រុងហ្សឺណែវ។​ នៅ​ពេល​ដែល​ប្រធានាធិបតី​អនុម័ត​វា​ហើយ យើង​នឹង​ព្យាយាម​អនុវត្ត​វា​​»។

អនុរដ្ឋមន្ត្រីក្រសួងពាណិជ្ជកម្មចិន លោក Li Chenggang បានលើកឡើងថា “ភាគីទាំងពីរបានឈានដល់ក្របខ័ណ្ឌសម្រាប់អនុវត្តការព្រមព្រៀងគ្នា ដែលមេដឹកនាំទាំងពីរសម្រេចបានក្នុងអំឡុងការសន្ទនាតាមទូរស័ព្ទកាលពីថ្ងៃទី៥ ខែមិថុនា និងការព្រមព្រៀងគ្នាកាលពីនៅក្នុងកិច្ចប្រជុំនៅទីក្រុងហ្សឺណែវ។

សូមរំលឹកថាថា ការចរចាថ្មីនេះបានធ្វើឡើងបន្ទាប់ពីមានការសន្ទនាតាមទូរស័ព្ទរវាងលោក Donald Trump និងមេដឹកនាំចិន Xi Jinping កាលពីសប្តាហ៍មុន។ កាលពីថ្ងៃសុក្រ Trump បាននិយាយថា មេដឹកនាំចិន Xi បានយល់ព្រមចាប់ផ្តើមពាណិជ្ជកម្មឡើងវិញលើការនាំចេញសារធាតុរ៉ែកម្រ ខណៈដែលកាលពីថ្ងៃសៅរ៍ ក្រសួងពាណិជ្ជកម្មចិនបាននិយាយថា ខ្លួនបានយល់ព្រមលើការសុំអាជ្ញាប័ណ្ណនាំចេញសារធាតុរ៉ែកម្រ បើទោះបីជាវាមិនបានផ្តល់ព័ត៌មានលម្អិតអំពីប្រទេសណាដែលពាក់ព័ន្ធក៏ដោយ។

គួរឲ្យបញ្ជាក់ដែរថា នៅឯកិច្ចប្រជុំមួយក្នុងទីក្រុងហ្សឺណែវ កាលពីខែឧសភា មហាអំណាចទាំងពីរបានព្រមព្រៀងគ្នាបន្ថយសម្ពាធពាណិជ្ជកម្មសម្រាប់រយៈពេលខ្លី ៩០ ថ្ងៃ ដោយអាម៉េរិកបានទម្លាក់ពន្ធលើទំនិញពីប្រទេសចិនពី ១៤៥% មកត្រឹម ៣០% ខណៈដែលចិនបន្ទាបពន្ធលើទំនិញនាំចូលពីអាម៉េរិក​ពី ១២៥% មកត្រឹម ១០%។ យ៉ាងណាក្ដី ទោះបីជាការព្រមព្រៀងគ្នាកាត់បន្ថយសម្ពាធពាណិជ្ជកម្មរយៈពេលខ្លីក៏ដោយ ប៉ុន្តែអាម៉េរិកបានចោទប្រកាន់ថា ចិនមិនបានដកការរឹតបន្តឹងលើការនាំចេញសារធាតុរ៉ែកម្រ ដែលជាផ្នែកសំខាន់ក្នុងការផលិតចាប់តាំងពីគ្រឿងអេឡិចត្រូនិក ទូរស័ព្ទ និងរថយន្តអគ្គិសនី រហូតដល់សព្វាវុធធំៗ ដូចជា យន្តហោះចម្បាំង F-35 និងប្រព័ន្ធមីស៊ីលជាដើម។ ជាការឆ្លើយតប ទីក្រុងប៉េកាំងបានចោទប្រកាន់វិញថា អាម៉េរិកបានរំលោភលើកិច្ចព្រមព្រៀងរួមមានការបញ្ឈប់ការលក់កម្មវិធីរចនាបន្ទះឈីបទៅឱ្យក្រុមហ៊ុនចិន, ការព្រមានប្រឆាំងមិនឲ្យប្រើប្រាស់បន្ទះឈីបដែលផលិតដោយក្រុមហ៊ុនបច្ចេកវិទ្យាចិន Huawei, និងការលុបចោលទិដ្ឋាការសម្រាប់និស្សិតចិន៕