សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គិតចាប់ពីខែមករា ដល់ដំណាច់ខែឧសភា ឆ្នាំ២០២៥ កន្លងទៅនេះ កម្ពុជាបានអនុម័តគម្រោងវិនិយោគចំនួន ២៩០គម្រោង គិតជាទឹកប្រាក់មានចំនួន ៤,២ពាន់លានដុល្លារអាម៉េរិក ក្នុងនោះ ប្រភពទុនវិនិយោគពីប្រទេសចិន មានចំនួន ២,៦១ពាន់លានដុល្លារអាម៉េរិក ឬស្មើនឹងប្រមាណ ៦២,២៧ភាគរយនៃទុនវិនិយោគដែលបានចុះបញ្ជីសរុបក្នុងរយៈពេល៥ខែ ។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាចេញផ្សាយកាលពីពេលថ្មីៗនេះបានឱ្យដឹងថា ប្រភពទុនវិនិយោគពីប្រទេសចិន បានឈរនៅលំដាប់ទី១នៃប្រភពទុនវិនិយោគសរុបក្នុងប្រទេសកម្ពុជា ខណៈប្រភពទុនក្នុងស្រុកឈរនៅលំដាប់ទី២ ដែលមានចំណែកប្រមាណ ២៣,២៨ភាគរយ ឬស្មើនឹងចំនួនទឹកប្រាក់ ៩៧៧,៧៦លានដុល្លារអាម៉េរិក ហើយសិង្ហបុរីបានស្ថិតនៅលំដាប់ទី៣ ដែលមានប្រមាណ៩,៦៣ភាគរយ ។
បើតាមក្រុមប្រឹក្សាអភិវឌ្ឍន៍កម្ពុជា បានបង្ហាញផងដែរថា គម្រោងវិនិយោគក្នុងរយៈពេល៥ខែកន្លងមកនេះ វិស័យឧស្សាហកម្មទទួលបានការចុះបញ្ជីវិនិយោគច្រើនជាងគេ ដោយក្នុងវិស័យនេះ មានទឹកប្រាក់ចុះបញ្ជីរហូតដល់ ៣,៦ពាន់លានដុល្លារអាម៉េរិក ខណៈវិស័យហេដ្ឋារចនាសម្ព័ន្ធ និងផ្សេងទៀត ទទួលបានទឹកប្រាក់ចុះបញ្ជីវិនិយោគចំនួន៥៥៨លានដុល្លារអាម៉េរិក ។ ដោយឡែកវិស័យទេសចរណ៍វិញក៏ឃើញថាទទួលបានទឹកប្រាក់ចុះបញ្ជីវិនិយោគចំនួន ២០លានដុល្លារអាម៉េរិកផងដែរ ។
ក្នុងរបាយការណ៍ដដែលបានបង្ហាញដែរពីតំបន់ដែលទទួលបានការចាប់អារម្មណ៍ក្នុងការវិនិយោគ ដូចជា ខេត្តកំពង់ស្ពឺ ទទួលបានគម្រោងចុះបញ្ជីវិនិយោគច្រើនជាងគេរហូតដល់ ៧២គម្រោង បន្ទាប់មកខេត្តស្វាយរៀង មាន ៦៨គម្រោង រាជធានីភ្នំពេញមានចំនួន ៣៤គម្រោង ខេត្តកោះកុង ចំនួន ២៨គម្រោង ខេត្តតាកែវ ២៧គម្រោង ខេត្តព្រះសីហនុមានចំនួន ២៤គម្រោង និងខេត្តកណ្ដាលមានចំនួន២០គម្រោង ។ ដោយឡែក បណ្ដាខេត្តផ្សេងទៀត មាន១គម្រោង ២គម្រោង ប៉ុណ្ណោះ ដូចជា ស្ទឹងត្រែង មណ្ឌលគិរី បន្ទាយមានជ័យ ពោធិ៍សាត់ កំពង់ចាម ត្បូងឃ្មុំ និងកំពង់ឆ្នាំង ។
កាលពីខែឧសភា កន្លងទៅនេះ ប្រតិភូខេត្តស៊ូជាំង ប្រទេសចិន បានមកបំពេញទស្សនកិច្ចនៅក្នុងប្រទេសកម្ពុជា និងបានអញ្ជើញទៅកាន់ខេត្តព្រះសីហនុ ដើម្បីសិក្សាពីសក្ដានុពលវិនិយោគបន្ថែមសម្រាប់ការផ្សព្វផ្សាយបន្តដល់វិនិយោគិនចិនមកពីខេត្តជាំងស៊ូ ។
ក្នុងឱកាសនោះ លោក ស៊ូ គុនលីន អភិបាលខេត្តជាំងស៊ូ បានប្ដេជ្ញា និងសន្យាជំរុញវិនិយោគិនចិនមកពីខេត្តជាំងស៊ូ ឱ្យមកបណ្ដាក់ទុនវិនិយោគនៅកម្ពុជាបន្ថែម ជាពិសេសជំរុញក្រុមហ៊ុន សហគ្រាសចិនមកមកកាន់តំបន់សេដ្ឋកិច្ចពិសេសក្រុងព្រះសីហនុ ដែលបច្ចុប្បន្ននេះ មានក្រុមហ៊ុនចំនួនជាង២០០កំពុងដំណើរការខ្សែច្រវាក់ផលិតកម្មរបស់ខ្លួន ។
លោកក៏បានបង្ហើបឱ្យដឹងពីគម្រោងក្នុងការបង្កើតតំបន់សេដ្ឋកិច្ចពិសេសចិនចំនួនពីរនៅកម្ពុជានាពេលឆាប់ៗនេះ ដែលតំបន់សេដ្ឋកិច្ចពិសេសនេះ នឹងជួយទាក់ទាញការវិនិយោគពីប្រទេសចិនមកកាន់ប្រទេសកម្ពុជាបន្ថែមទៀត ៕
Account
Security
Favourite Content