បរទេស ៖ យោងទៅតាមប្រភពព័ត៌មានពី Aljazeera បានរាយការណ៍ថា សភាតំណាងរាស្រ្តសហរដ្ឋអាមេរិកបានបោះឆ្នោតកាលពីថ្ងៃសុក្រដើម្បីអនុម័តកញ្ចប់ថវិកាប្រមាណជា ១,៧ ទ្រីលានដុល្លារ ដើម្បីជៀសវាងពីការត្រៀមទុក និងបញ្ចប់ការងារភារកិច្ចរបស់មន្ត្រីរដ្ឋាភិបាលតាមផ្នែកមួយចំនួន។

កាលពីថ្ងៃព្រហស្បតិ៍កន្លងទៅនេះ ព្រឹទ្ធសភាអាមេរិកបានអនុម័តវិធានការលើកញ្ចប់ថវិកានេះម្តងរួចទៅហើយ តាមរយៈសភាទាំងពីរជួយទប់ស្កាត់លទ្ធភាពក្នុងការឈានទៅដល់ការបិទដែលនឹងធ្វើឱ្យបុគ្គលិករដ្ឋាភិបាលមួយចំនួនបាត់បង់ការងារ ខណៈដែលកាលពីប៉ុន្មានថ្ងៃមុននេះ ប្រធានាធិបតីអាមេរិក Joe Biden បាននិយាយនៅក្នុងសេចក្តីថ្លែងការណ៍ថា​ កញ្ចប់ថវិកាផ្តល់មូលនិធិនេះនឹងអាចជំរុញអាទិភាពសំខាន់ៗសម្រាប់ប្រទេស ហើយបានបិទវឌ្ឍនភាពទ្វេភាគីមួយឆ្នាំជាប្រវត្តិសាស្ត្រសម្រាប់ប្រជាជនអាមេរិក ហើយលោកនឹងចុះហត្ថលេខាលើវិធានការនេះឱ្យបានឆាប់នៅបំផុត។

កញ្ចប់ថវិកាខាងលើនេះរួមបញ្ចូលទាំងការកើនឡើង ១០ ភាគរយនៃការចំណាយលើផ្នែកយោធា ឬ ៨៥៨ ពាន់លានដុល្លារ រួមទាំង ៧៧២,៥ ពាន់លានដុល្លារសម្រាប់កម្មវិធីក្នុងស្រុកផ្សេងៗ និង ៤៥ ពាន់លានដុល្លារជាជំនួយបន្ថែមលើផ្នែកយោធា សេដ្ឋកិច្ច មនុស្សធម៌សម្រាប់អ៊ុយក្រែន និងសម្ព័ន្ធមិត្តណាតូផងដែរ ចំណែកឯទឹកប្រាក់ ៤០ ពាន់លានដុល្លារផ្សេងទៀតទុកសម្រាប់កម្មវិធីជំនួយសង្គ្រោះគ្រោះមហន្តរាយក្នុងប្រទេសដែលកំពុងតស៊ូពីគ្រោះរាំងស្ងួត ទឹកជំនន់ ភ្លើងឆេះព្រៃ និងព្រឹត្តិការណ៍ផ្សេងៗទៀត។ បើធៀបកាលពីឆ្នាំមុន ការចំណាយលើយោធាគឺ ៧៤០ ពាន់លានដុល្លារប៉ុណ្ណោះ ចំណែកឯការចំណាយលើកម្មវិធីក្នុងស្រុកក៏មានការកើនឡើងប្រហែល ៦ ភាគរយក្នុងឆ្នាំនេះផងដែរ។ កញ្ចប់ថវិកានេះត្រូវបានគេរំពឹងថាជាផ្នែកចុងក្រោយនៃច្បាប់ ដែលមានទឹកប្រាក់ទំហំធំបំផុតដែលត្រូវបានអនុម័តមុនពេលសភាថ្មីនឹងប្រជុំនៅខែមករា។

សមាជិកសភាមកពីគណបក្សសាធារណរដ្ឋសង្ឃឹមថា នឹងមានការពន្យារពេលការបោះឆ្នោតលើច្បាប់ចំណាយរហូតដល់ពួកគេគ្រប់គ្រងនៅឆ្នាំក្រោយ។ មុនការបោះឆ្នោតថ្ងៃសុក្រ អ្នកខ្លះនៅក្នុងបក្សបានបញ្ចេញមតិរិះគន់ថា ច្បាប់នេះនឹងបង្កើនបំណុលជាតិ និងធ្វើឱ្យអតិផរណាកាន់តែធ្ងន់ធ្ងរ ហើយសមាជិកមួយចំនួនទៀតក៏បានសម្តែងការខកចិត្តចំពោះតម្លៃ ៤៥ ពាន់លានដុល្លារសម្រាប់ជំនួយមួយផ្សេងទៀតដល់អ៊ុយក្រែន។

សមាជិកម្នាក់បាននិយាយថា ៖ ជាការពិតទៅនៅក្នុងសប្តាហ៍នេះ សមាជិកសភាជាច្រើនឡើងមានវត្តមានដើម្បីស្តាប់សុន្ទរកថារបស់ប្រធានាធិបតីនៃប្រទេសបរទេសជាជាងបោះឆ្នោតលើថវិកាប្រតិបត្តិការប្រចាំឆ្នាំសម្រាប់ជាតិរបស់យើងទាំងមូល។​ ឥឡូវនេះ ប្រទេសជាតិទាំងមូលកំពុងត្រជាក់ខ្លាំង ហើយយើងគួរតែ​ធ្វើ​ឲ្យ​បាន​ល្អ​ជាង​នេះ។

ទោះជាយ៉ាងណាក្តី សមាជិកសភាជាច្រើនមិនពេញចិត្តក្នុងការអនុម័តវិធានការនេះ រួមទាំងនៅក្នុងសភាទាំងពីរត្រូវបានបែកបាក់គ្នា ដោយសារតែសមាជិកអភិរក្សនិយមបានបញ្ឈប់គំនិតផ្តួចផ្តើមលើបញ្ហាដូចជាសិទ្ធិបោះឆ្នោត និងការប្រែប្រួលអាកាសធាតុ។ យ៉ាងណាមិញ វិធានការនេះបានអនុម័តដោយជោគជ័យនូវកញ្ចប់ថវិកាក្នុងទំហំទឹកប្រាក់ដ៏ធំទៅលើការវិនិយោគលើហេដ្ឋារចនាសម្ព័ន្ធ វិស័យបច្ចេកវិទ្យារបស់សហរដ្ឋអាមេរិក និងការប្រយុទ្ធប្រឆាំងនឹងការប្រែប្រួលអាកាសធាតុ៕