បរទេស ៖ យោងតាមប្រភពព័ត៌មានពី Financial Times បានរាយការណ៍ថា ដាណឺម៉ាក កំពុងពិចារណាលើការត្រួតពិនិត្យ និងហាមឃាត់នាវាដឹកប្រេងរបស់រុស្ស៊ី ដែលដឹកប្រេងឆៅឆ្លងកាត់ដែនទឹករបស់ខ្លួន ដើម្បីអនុវត្តការកំណត់តម្លៃលើការនាំចេញប្រេងពីរុស្ស៊ី។

កាលពី​ពេល​ថ្មី​ៗ​នេះ តម្លៃ​ប្រេង​បាន​ធ្លាក់​ចុះ​ដែល​ភាគច្រើន​ស្ថិត​នៅ​ពីក្រោយ​​ទីផ្សារ​ប្រេង​ធំ​ជាងគេ​ចំនួន២ ​គឺ​សហរដ្ឋអាមេរិក និង​ចិន ។ ទន្ទឹមនឹងនេះ ប្រេងឆៅម៉ាក Brent មានតម្លៃ ៨១,៨៩ ដុល្លារក្នុងមួយបារ៉ែល ចំណែកឯប្រេងឆៅ WTI មានតម្លៃ ៧៧.៦០ ដុល្លារក្នុងមួយបារ៉ែល។

ក្នុងសប្តាហ៍នេះផងដែរ ទីប្រឹក្សាសន្តិសុខថាមពលរបស់សេតវិមាន លោក Amos Hochstein បាននិយាយថា រដ្ឋាភិបាលសហរដ្ឋអាមេរិកនឹងរឹតបន្តឹងការដាក់ទណ្ឌកម្មជុំវិញប្រទេសអ៊ីរ៉ង់ជាមួយនឹងគោលបំណងបន្ថយការនាំចេញប្រេងរបស់អ៊ីរ៉ង់ប្រហែល ១ លានបារ៉ែលក្នុងមួយថ្ងៃដោយមិនមានការប៉ះពាល់ដល់តម្លៃនោះទេ។

ទន្ទឹមនឹងនេះ សហភាពអឺរ៉ុបនិយាយថា នាវាដឹកប្រេងរបស់រុស្ស៊ីនឹងមិនជាគោលដៅនៅក្នុងផែនការរបស់តំបន់សម្រាប់ការអនុវត្តក្នុងការកំណត់តម្លៃប្រេង ៦០ ដុល្លារ នោះទេ ប៉ុន្តែជាការពិតការកំណត់តម្លៃប្រេងគឺងាយស្រួលនៅពេលដែលតម្លៃប្រេងទាំងអស់ធ្លាក់ចុះ ឬ ឡើងថ្លៃ ។ ជាមួយគ្នានេះ ស្របពេលដែលសហភាពអឺរ៉ុបកំពុងពិភាក្សាអំពីការឆ្ពោះរកទៅការអនុវត្តដ៏តឹងតែងនេះ សហរដ្ឋអាមេរិកក៏បានធ្វើសកម្មភាពផងដែរ ដោយរតនាគារអាមេរិកបានដាក់ទណ្ឌកម្មលើនាវារបស់ក្រុមហ៊ុនដឹកជញ្ជូន Emirati ចំនួនបី ដែលបានដឹកជញ្ជូនប្រេងរបស់រុស្ស៊ីលក់ក្នុងតម្លៃលើសពី ៦០ ដុល្លារក្នុងមួយបារ៉ែលនាសប្តាហ៍នេះ។

លោក Wally Adeyemo អនុរដ្ឋលេខាធិការរតនាគារជាតិបាននិយាយថា ក្រុមហ៊ុនដឹកជញ្ជូន និងនាវាដែលចូលរួមក្នុងការជួញដូរប្រេងរបស់រុស្ស៊ី ខណៈពេលដែលកំពុងប្រើប្រាស់អ្នកផ្តល់សេវាចម្រុះគួរយល់ច្បាស់ថា អាមេរិកនឹងអនុលោមតាមច្បាប់។

ការអនុវត្តទណ្ឌកម្ម​កាន់តែ​តឹងរ៉ឹង​អាច​មានន័យថា លំហូរ​ប្រេង​របស់​រុស្ស៊ី​នៅ​ក្រៅប្រទេស​ធ្លាក់ចុះ​ ខណៈពេលដែលគេរំពឹងថា ប្រាក់ចំណូលនឹងធ្លាក់ចុះពីការនាំចេញ និងការផ្គត់ផ្គង់ប្រេងក៏អាចនឹងត្រូវបានកាត់បន្ថយផងដែរ។ ទន្ទឹមនឹងនេះ សហរដ្ឋអាមេរិកក៏កំពុងតាមដានមើលវិស័យប្រេងរបស់អ៊ីរ៉ង់ ដើម្បីឆ្លើយតបទៅនឹងការគាំទ្ររបស់ប្រទេសនេះចំពោះក្រុមហាម៉ាស។

ទោះជាយ៉ាងណាក្តី របាយការណ៍ប្រចាំសប្តាហ៍ចុងក្រោយបង្អស់របស់ EIA បង្ហាញថា ឱកាសនៃការរឹតបន្តឹងការផ្គត់ផ្គង់ប្រេងអាចមានរយៈពេលយូរក្នុងការអនុវត្ត ដោយសារប្រសិនបើការអនុវត្ត​ទណ្ឌកម្ម​ប្រឆាំង​ទាំង​រុស្ស៊ី និង​អ៊ីរ៉ង់​នឹង​មានប្រសិទ្ធភាព នោះ​ការផ្គត់ផ្គង់ប្រេងនឹងត្រូវបានកាត់បន្ថយផងដែរ។ ស្របពេលនេះដែរ សហភាពអឺរ៉ុបកំពុងប្រឈមនឹងការឡើងថ្លៃថាមពលរួចទៅហើយ ហើយសហរដ្ឋអាមេរិកកំពុងព្យាយាមទិញប្រេងមួយចំនួនសម្រាប់ស្តុកទុកក្នុងប្រេងបម្រុង បន្ទាប់ពីត្រូវបានបង្ហូរចេញយ៉ាងច្រើនកាលពីឆ្នាំមុន៕