សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ AEON Mall Cambodia ជាក្រុមហ៊ុនមានមូលដ្ឋានមកពីប្រទេសជប៉ុន ហើយក្រុមហ៊ុននេះចាប់ផ្ដើមដាក់ទុនវិនិយោគផ្សារទំនើបធំជាងគេ និងដំបូងបង្អស់នៅកម្ពុជា ហើយគិតពីឆ្នាំ២០១២ រហូតមកដល់បច្ចុប្បន្ននេះ ក្រុមហ៊ុនមួយនេះបានដាក់ទុនវិនិយោគលើគម្រោងផ្សារធំៗចំនួន៣ដែលមានទឹកប្រាក់ជាង៧០០លានដុល្លារអាមេរិក ។
យោងតាមសេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជាកាលពីចុងសប្ដាហ៍មុននេះបានបង្ហាញថា ក្រុមហ៊ុន AEON Mall Cambodia បានបណ្ដាក់ទុនវិនិយោគលើផ្សារទំនើបចំនួន៣ហើយ និងកំពុងសិក្សាគម្រោងវិនិយោគលើផ្សារទំនើបមួយទៀត ។
បើតាមសេចក្ដីប្រកាសដដែលបានបង្ហាញផងដែរថា គម្រោងផ្សារទំនើបអ៊ីអនភ្នំពេញ ឬអ៊ីអនម៉លទី១ មានទុនវិនិយោគប្រមាណ ២០០លានដុល្លារអាមេរិក ស្ថិតនៅតាមបណ្ដោយផ្លូវសុធារស សង្កាត់ទន្លេបាសាក់ ខណ្ឌចំការ ផ្សារទំនើបអ៊ីអនម៉លសែនសុខ ឬផ្សារទំនើបអ៊ីអនទី២ មានទុនវិនិយោគប្រមាណ១២០លានដុល្លារអាមេរិក មានទីតាំងស្ថិតនៅខណ្ឌសែនសុខ រាជធានីភ្នំពេញ និងគម្រោងផ្សារទំនើបអ៊ីអនម៉លទី៣ ឬផ្សារទំនើបអ៊ីអនមានជ័យ ចំណាយទុនវិនិយោគជិត៣០០លានដុល្លារអាមេរិក ។ ក្រៅពីនេះមានផ្សារទំនើបតូចៗជាច្រើនទៀតក្រោមការវិនិយោគរបស់ក្រុមហ៊ុន AEON Mall Cambodia ។
ក្នុងជំនួបជាមួយឯកឧត្តមស៊ុន ចាន់ថុល ឧបនាយករដ្ឋមន្ត្រីនិងជាអនុប្រធានទី១នៃក្រុមប្រឹក្សាអភិវឌ្ឍន៍កម្ពុជា លោក TSUBOYA MASAYUKI នាយកគ្រប់គ្រងផ្សារទំនើបអ៊ីអនម៉លបានឱ្យដឹងថា ក្រុមហ៊ុន AEON Mall (Cambodia) Co., Ltd. បានបណ្ដាក់ទុនវិនិយោគប្រមាណ ៧០៦លានដុល្លាអាមេរិក បង្កើតផ្សារទំនើបជាច្រើននៅក្នុងប្រទេសកម្ពុជា ក្នុងនោះមានផ្សារទំនើបធំៗចំនួន ៣ទីតាំង រួមមាន គម្រោងវិនិយោគផ្សារទំនើបអ៊ីអនម៉ល ទី១, គម្រោងវិនិយោគផ្សារទំនើបអ៊ីអនម៉ល ទី២ និងគម្រោងវិនិយោគផ្សារទំនើបអ៊ីអនម៉ល ទី៣។
លោកបន្តថា ក្រុមហ៊ុននេះជាបុត្រសម្ព័ន្ធរបស់ក្រុមហ៊ុន AEON Mall Co., Ltd. ដែលត្រូវបានបង្កើតឡើងកាលពីឆ្នាំ១៩១១ ក្នុងទីក្រុង Chiba ប្រទេសជប៉ុន និងមានផ្សារទំនើបសរុបប្រមាណ ២០៣ផ្សារ ពី១៤ប្រទេសផ្សេងៗគ្នាទូទាំងពិភពលោក ។
ផ្សារទំនើបអ៊ីអនម៉ល កំពុងទទួលបានការគាំទ្រយ៉ាងខ្លាំងពីសំណាក់ប្រជាពលរដ្ឋក្នុងប្រទេសកម្ពុជា ទោះបីជាស្ថិតនៅក្នុងវិបត្តិយ៉ាងណាក្ដី ផ្សារទំនើបធំៗទាំង៣ របស់អ៊ីអនម៉ល នៅតែមានភ្ញៀវចេញចូលជាហូរហែររៀងរាល់ថ្ងៃ ។ មិនតែប៉ុណ្ណោះ ផ្សារទំនើបធំៗទាំង៣របស់ក្រុមហ៊ុន AEON Mall ក៏បានផ្ដល់ឱកាសការងារដល់ប្រជាពលរដ្ឋរាប់ពាន់នាក់ផងដែរ ។
បើតាមអ្នកស្រី អាន សុធីតា នាយិកាប្រតិបត្តិ ក្រុមហ៊ុន PropNex Cambodia បានលើកឡើងថា ក្រុមហ៊ុនអភិវឌ្ឍន៍ផ្សារទំនើបអ៊ីអនម៉លជាក្រុមហ៊ុនដែលមានបទពិសោធន៍ក្នុងការអភិវឌ្ឍ និងគ្រប់គ្រងច្បាស់លាស់ ដូច្នេះហើយទើបក្រុមហ៊ុនមួយនេះអភិវឌ្ឍន៍ផ្សារនៅកម្ពុជាទទួលបានជោគជ័យ និងមានការគាំទ្រច្រើនពីសំណាក់ប្រជាពលរដ្ឋកម្ពុជា៕
Account
Security
Favourite Content