សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ពាណិជ្ជកម្មរបស់វៀតណាមត្រូវបានអ្នកជំនាញសេដ្ឋកិច្ចព្យាករណ៍ថា អាចនឹងកើនឡើងដល់ ៩២០ ពាន់លានដុល្លារ និងអាចជាប់ចំណាត់ថ្នាក់នៅក្នុងចំណោមកំពូលប្រទេសពាណិជ្ជកម្មទាំង ១៥ របស់ពិភពលោក នេះបើយោងតាមសេចក្ដីរាយការណ៍ពី Vietnam Net ។
នៅក្នុងសន្និសីទបូកសរុបប្រចាំឆ្នាំរបស់ក្រសួងឧស្សាហកម្ម និងពាណិជ្ជកម្ម កាលពីថ្ងៃសុក្រ សប្ដាហ៍មុននេះ អនុរដ្ឋមន្ត្រី លោកស្រី Phan Thi Thang បានឱ្យដឹងថា ឆ្នាំ២០២៥ គឺជាឆ្នាំដ៏លំបាកសម្រាប់សេដ្ឋកិច្ច និងវិស័យពាណិជ្ជកម្មរបស់វៀតណាម ដោយសារការប្រែប្រួលជាសកល។ លើសពីនេះ ភាពតានតឹងពាណិជ្ជកម្ម និងការកើនឡើងនៃលទ្ធិគាំពារនិយមបានធ្វើឱ្យស្ថានការណ៍កាន់តែអាក្រក់ឡើង ខណៈពេលដែលខ្សែសង្វាក់ផ្គត់ផ្គង់សកលនៅតែបន្តមានភាពងាយរងគ្រោះដោយសារអស្ថិរភាពភូមិសាស្ត្រនយោបាយ និងការប្រែប្រួលអាកាសធាតុ។ អាម៉េរិកដែលជាទិសដៅនាំចេញដ៏ធំបំផុតរបស់វៀតណាម បានប្រកាសដាក់ពន្ធឆ្លើយតបឲ្យមានភាពស្មើគ្នាក្នុងអត្រាខ្ពស់ ដែលបង្កជាឧបសគ្គយ៉ាងច្រើនសម្រាប់សេដ្ឋកិច្ច និងពាណិជ្ជកម្ម។
យ៉ាងណាក៏ដោយ ថ្វីត្បិតតែមានភាពតានតឹងពីខាងក្រៅ ប៉ុន្តែសកម្មភាពនាំចូល-នាំចេញរបស់វៀតណាមក្នុងឆ្នាំនេះបានបង្ហាញលទ្ធផលវិជ្ជមានដដែល ខណៈដែលមានការព្យាករណ៍ថា ការនាំចេញនឹងឈានដល់ ៤៧០ ពាន់លានដុល្លារអាម៉េរិក ដែលកើនឡើង ១៦% ពីឆ្នាំ២០២៤ ហើយការនាំចូលមានតម្លៃ ៤៥០ ពាន់លានដុល្លារ។ អតិរេកពាណិជ្ជកម្ម (ការនំាចេញច្រើនជាងការនាំចូល) មានចំនួនប្រហែល ២២ ពាន់លានដុល្លារ ដែលរួមចំណែកដល់ការពង្រឹងទុនបម្រុងបរទេស។ ចំណូលពាណិជ្ជកម្មសរុបត្រូវបានប៉ាន់ប្រមាណថា អាចឈានដល់ ៩២០ ពាន់លានដុល្លារ កើនឡើងពី ៧៨៦,៩ ពាន់លានដុល្លារក្នុងឆ្នាំ២០២៤ ដែលជាកំណត់ត្រាជាតិថ្មីមួយ និងរុញឱ្យប្រទេសវៀតណាមចូលទៅក្នុងចំណាត់ថ្នាក់នៃកំពូលពាណិជ្ជកម្មធំបំផុតទាំង ១៥ របស់ពិភពលោក។
លោកស្រីអនុរដ្ឋមន្ត្រី Thang បានគូសបញ្ជាក់ថា បើគិតចាប់ពីឆ្នាំ២០២១ ដល់ឆ្នាំ២០២៥ ទំហំនៃការនាំចេញបានកើនឡើងជាមធ្យម ១០,៨% ក្នុងមួយឆ្នាំ ដែលលើសពីគោលដៅដំបូង ៥%។ ការកើនឡើងនេះត្រូវបានគាំទ្រដោយការផ្លាស់ប្តូររចនាសម្ព័ន្ធឆ្ពោះទៅរកពាណិជ្ជកម្មទំនើប និងនិរន្តរភាព ធ្វើឲ្យផលិតផលនាំចេញកាន់តែមានភាពចម្រុះ។ ជាលទ្ធផល សមតុល្យពាណិជ្ជកម្មរបស់វៀតណាមនៅតែមានភាពវិជ្ជមានជាប់លាប់ក្នុងរយៈពេល៥ឆ្នាំ។ វៀតណាមមានអតិរេកពាណិជ្ជកម្មចំនួន ៣,១៩ ពាន់លានដុល្លារក្នុងឆ្នាំ២០២១ ហើយបានកើនឡើងដល់ ២២ ពាន់លានដុល្លារក្នុងឆ្នាំ២០២៥ ដែលរួមចំណែកយ៉ាងសំខាន់ដល់កំណើនផលិតផលក្នុងស្រុកសរុប ស្ថិរភាពម៉ាក្រូសេដ្ឋកិច្ច ការគ្រប់គ្រងអតិផរណា និងសមតុល្យនៃការទូទាត់ ខណៈដែលបច្ចុប្បន្ននេះ អតិរេកពាណិជ្ជកម្មទាំងមូលត្រូវបានជំរុញដោយក្រុមហ៊ុនវិនិយោគបរទេស (FDI) មិនមែនក្រុមហ៊ុនក្នុងស្រុកទេ។
អ្វីដែលសំខាន់ លោកស្រី Thang បានចង្អុលបង្ហាញពីភាពងាយរងគ្រោះជាច្រើននៅក្នុងរចនាសម្ព័ន្ធនៃការនាំចេញរបស់វៀតណាម។ ការនាំចេញមានកំណើនរហ័សក៏ពិតមែន ប៉ុន្តែនៅតែមិនមាននិរន្តរភាព ដោយសាររងឥទ្ធិពលយ៉ាងខ្លាំងពីកត្តាខាងក្រៅ។ សហគ្រាសវិនិយោគបរទេស (FDI) មានចំណែកដ៏ធំនៅក្នុងរចនាសម្ព័ន្ពនៃការនាំចេញ ប៉ុន្តែការរួមបញ្ចូលរបស់ពួកគេជាមួយនឹងខ្សែសង្វាក់ផ្គត់ផ្គង់ក្នុងស្រុកនៅមានកម្រិត ដែលផ្តល់ផលប្រយោជន៍តិចតួចបំផុតដល់ក្រុមហ៊ុនវៀតណាម។ លើសពីនេះ ការនាំចេញនៅតែពឹងផ្អែកខ្លាំងលើទីផ្សារសំខាន់ៗមួយចំនួន ខណៈដែលការងើបឡើងវិញនៃសេដ្ឋកិច្ចសកលស្ថិតក្នុងល្បឿនយឺត។ ការនាំចេញសំខាន់ៗទៅកាន់ទីផ្សារសហភាពអឺរ៉ុប និងអាម៉េរិក កំពុងប្រឈមមុខនឹងសម្ពាធកាន់តែខ្លាំងឡើងពីការស៊ើបអង្កេតផ្នែកកិច្ចការពារពាណិជ្ជកម្ម ការត្រួតពិនិត្យលើការក្លែងបន្លំប្រភពដើម និងរបាំងបច្ចេកទេសទាក់ទងនឹងស្តង់ដារបរិស្ថាន និរន្តរភាព និងការផ្លាស់ប្តូរបៃតងជាដើ់ម។ ដោយឡែក នៅផ្នែកនាំចូលវិញ រចនាសម្ព័ន្ធទីផ្សារមានភាពយឺតយ៉ាវក្នុងការផ្លាស់ប្តូរឆ្ពោះទៅរកប្រទេសដែលផលិតបែបបច្ចេកវិទ្យា។ ទន្ទឹមនឹងនេះ វៀតណាមនៅតែមានឱនភាពពាណិជ្ជកម្មជាមួយបណ្តាប្រទេសអាស៊ីជាច្រើន ដោយនាំចូលទំនិញជាជាងបច្ចេកវិទ្យា៕
Account
Security
Favourite Content