សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងរយៈពេល១១ខែ ឆ្នាំ២០២៥នេះ ប្រភពទុនវិនិយោគរបស់វិនិយោគិនក្នុងស្រុកដែលបានស្នើសុំវិនិយោគនៅកម្ពុជាតាមរយៈក្រុមប្រឹក្សាអភិវឌ្ឍន៍កម្ពុជាមានប្រមាណជាង ៣ពាន់លានដុល្លារអាម៉េរិក ឬស្មើនឹងប្រមាណ ៣២,៤៩ភាគរយ។ នេះបើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា ។
យោងតាមក្រុមប្រឹក្សាអភិវឌ្ឍន៍កម្ពុជាបានបង្ហាញថា ក្នុងរយៈពេល១១ខែ ឆ្នាំ២០២៥នេះ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគសរុបចំនួន ៦០៩គម្រោង ដែលមានទឹកប្រាក់សរុបប្រមាណ ៩,៥ពាន់លានដុល្លារអាម៉េរិក ក្នុងនោះប្រភពទុនវិនិយោគមកពីប្រទេសចិនមានចំនួនច្រើនជាងគេដែលមានរហូតដល់ជិត ៥ពាន់លានដុល្លារអាម៉េរិក ឬស្មើនឹងប្រមាណ ៥២,៦២ភាគរយ ចំណែកប្រភពទុនវិនិយោគរបស់ធុរជនក្នុងស្រុកមានចំនួនជាង ៣ពាន់លានដុល្លារអាម៉េរិក ស្មើនឹង ៣២,៤៩ភាគរយ ។
បើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា រាជធានី ខេត្ត ដែលមានសក្ដានុពលសំខាន់ៗចំនួន៤ ទាក់ទាញបានគម្រោងវិនិយោគច្រើនជាងគេ ក្នុងនោះខេត្តកំពង់ស្ពឺជាប់លេខ១ដែលមានគម្រោងវិនិយោគចំនួន ១៣៦គម្រោង ខេត្តស្វាយរៀង មានចំនួន១៣៥គម្រោង រាជធានីភ្នំពេញ ទទួលបានចំនួន៧៥គម្រោង និងខេត្តតាកែវ ទទួលបានគម្រោងវិនិយោគចំនួន៦០គម្រោង ។ សម្រាប់វិស័យដែលមានការដាក់ទុនវិនិយោគច្រើនជាងគេក្នុងប្រទេសកម្ពុជា រយៈពេលជិត១ឆ្នាំនេះ មានវិស័យឧស្សាហកម្ម វិស័យកសិកម្ម និងកសិ-ឧស្សាហកម្ម ទេសចរណ៍ និងហេដ្ឋារចនាសម្ព័ន្ធជាដើម ។
គួរកត់សម្គាល់ថា ចាប់តាំងពីមានការឈ្លានពានពីសំណាក់ប្រទេសថៃលើដែនដីរបស់កម្ពុជា ឃើញថាអ្នកជំនួញដែលធ្លាប់ទិញ និងនាំចូលទំនិញពីប្រទេសថៃមកចែកចាយក្នុងប្រទេសកម្ពុជាបានចាប់ផ្ដើមបង្វែរទីតាំងផលិតរបស់ខ្លួនពីប្រទេសថៃ ដោយមួយចំនួនបានបញ្ចេញទុនវិនិយោគលើរោងចក្រផលិតនៅក្នុងស្រុក និងខ្លះទៀតបានបង្វែរការទិញទំនិញពីប្រទេសថៃទៅទិញពីប្រទេសផ្សេងៗមកជំនួស ។
លោក ប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានមានប្រសាសន៍ថា ក្នុងរយៈពេលប៉ុន្មានឆ្នាំចុងក្រោយនេះ ឃើញថាការវិនិយោគពីអ្នកវិនិយោគក្នុងស្រុកមានសន្ទុះកំណើនជាបន្តបន្ទាប់បើប្រៀបធៀបនឹងពេល១០ ២០ឆ្នាំមុន ប៉ុន្តែយើងចង់ឱ្យសន្ទុះនិងទំហំទឹកប្រាក់វិនិយោគពីអ្នកក្នុងស្រុកមានទំហំច្រើនទៀត ដើម្បីផ្ដល់ជាប្រយោជន៍ដល់សេដ្ឋកិច្ច ។
លោកបន្តថា អ្នកវិនិយោគក្នុងស្រុក ភាគច្រើនផ្ដោតលើវិស័យកសិកម្ម កសិ-ឧស្សាហកម្ម ថាមពល និងហិរញ្ញវត្ថុ ហើយការវិនិយោគរបស់ពួកគាត់នេះដែរនឹងផ្ដល់នូវប្រាក់ចំណេញសម្រាប់ក្នុងស្រុក ខុសពីការវិនិយោគរបស់បរទេសដែលមកវិនិយោគពេលបានចំណេញហើយនឹងនាំប្រាក់ចំណេញត្រលប់ទៅក្រៅវិញ ។
លោកបន្ថែមថា បច្ចុប្បន្ននេះ កម្ពុជាមានសមាគមឧកញ៉ាកម្ពុជា ដែលសុទ្ធសឹងតែអ្នកជំនួញ អាជីវករ ពាណិជ្ជករ និងវិនិយោគិន ដូច្នេះ ពួកគាត់អាចរួមគ្នាបង្កើតគម្រោងធំៗដើម្បីធ្វើឱ្យសេដ្ឋកិច្ចកម្ពុជាកាន់តែរីកចម្រើន និងរឹងមាំ ។ ទន្ទឹមនឹងការជំរុញឱ្យមានការវិនិយោគពីសំណាក់អ្នកវិនិយោគក្នុងស្រុកនេះដែរ កម្ពុជាក៏ត្រូវការអ្នកវិនិយោគពីខាងក្រៅប្រទេស ដែលអាចផ្ដល់ការងារដល់ប្រជាពលរដ្ឋ និងប្រាក់ចំណូលរដ្ឋ៕
Account
Security
Favourite Content