បរទេស៖ យោងតាមប្រភពព័ត៌មានពីរ៉យទ័របានរាយការណ៍ថា ក្រុមប្រទេស G7 និងសហភាពអឺរ៉ុបកំពុងរៀបចំវិធានការដាក់ទណ្ឌកម្មលើធនាគារ ដែលជួយរុស្ស៊ីឱ្យជៀសផុតពីការរឹតបន្តឹងបច្ចុប្បន្ន ជាពិសេសវិធានការនេះនឹងផ្តោតលើស្ថាប័នហិរញ្ញវត្ថុរបស់ប្រទេសទី ៣ ដែលប្រើប្រាស់ប្រព័ន្ធផ្ញើសារអន្តរធនាគាររបស់ធនាគាររុស្ស៊ីគឺ SPFS ។

ប្រព័ន្ធផ្ញើសារអន្តរធនាគារ SPFS របស់រុស្ស៊ីត្រូវបានបង្កើតឡើងក្នុងឆ្នាំ២០១៤ និងមានមុខងារដូចប្រព័ន្ធ SWIFT ដោយវាធានានូវការផ្ទេរសារហិរញ្ញវត្ថុប្រកបដោយសុវត្ថិភាពរវាងធនាគារទាំងក្នុង និងក្រៅប្រទេស។ វាត្រូវបានប្រើជំនួស SWIFT នៅក្នុងប្រទេសរុស្ស៊ី នៅពេលដែលធនាគារសំខាន់ៗរបស់ប្រទេសនេះត្រូវបានផ្តាច់ចេញពីប្រព័ន្ធ SWIFT ដោយសារតែទណ្ឌកម្ម។ យ៉ាងណាមិញ ដៃគូពាណិជ្ជកម្មជាច្រើនរបស់រុស្ស៊ីបានចូលរួមប្រើប្រាស់ SPFS ជាបន្តបន្ទាប់ដើម្បីបន្តប្រតិបត្តិការជាមួយរុស្ស៊ី និងជាផ្នែកមួយនៃការកាត់បន្ថយការប្រើប្រាស់ប្រព័ន្ធហិរញ្ញវត្ថុលោកខាងលិច។ គិតត្រឹមខែមករាឆ្នាំ ២០២៤ ធនាគារ និងក្រុមហ៊ុនជាង ៥៥០ មកពី ២០ ប្រទេសត្រូវបានភ្ជាប់ជាមួយនឹងប្រព័ន្ធ SPFS នេះ។

បច្ចុប្បន្ននេះ ទីក្រុងមូស្គូ និងទីក្រុងប៉េកាំងកំពុងពន្លឿនកិច្ចខិតខំប្រឹងប្រែងដើម្បីផ្លាស់ទីឆ្ងាយពី SWIFT ដើម្បីធ្វើពាណិជ្ជកម្មដោយប្រើរូបិយប័ណ្ណជាតិរៀងៗខ្លួន។ លោក Boris Titov ស្នងការខាងធុរកិច្ចរបស់រុស្ស៊ី លើកឡើងថា ធនាគារក្នុងតំបន់ជាច្រើនកំពុងជំនួស SWIFT ជាមួយនឹង analogue CIPS របស់ចិនរួចហើយ ហើយការប្រើប្រាស់ប្រព័ន្ធរបស់ចិនសម្រាប់ការទូទាត់ជាប្រាក់យ័នកំពុងបន្តពង្រីក។ មិនត្រឹមតែប៉ុណ្ណោះ ការសម្រេចចិត្តប្តូរទៅជាប្រាក់រូប៊ល និងប្រាក់យ័នក្នុងប្រតិបត្តិការបាននាំឱ្យមានការជំរុញយ៉ាងខ្លាំងនៅក្នុងពាណិជ្ជកម្មរុស្ស៊ី-ចិន។ លើសពីនេះ ទំហំពាណិជ្ជកម្មទ្វេភាគីក្នុងឆ្នាំ ២០២៣ ឈានដល់ ២៤០ ពាន់លានដុល្លារ ដោយការនាំចូលរបស់រុស្ស៊ីមកពីចិនកើនឡើងជិត ៤៧ ភាគរយ ឬ ១១១ ពាន់លានដុល្លារ។

ទន្ទឹមនឹងនេះ បណ្តាប្រទេសលោកខាងលិចចង់បញ្ឈប់ទីក្រុងម៉ូស្គូពីលទ្ធភាពទទួលបានបច្ចេកវិទ្យាដែលប្រើប្រាស់ក្នុងការផលិតអាវុធ ដោយកំណត់គោលដៅលើអ្នកផ្តល់ប្រាក់កម្ចីដែលប្រើ SPFS ដែលសង្ស័យថាបានជួយសម្រួលដល់ប្រតិបត្តិការជាមួយរុស្ស៊ី។ លើសពីនេះ ចិនត្រូវបានចោទប្រកាន់ដោយទីក្រុងវ៉ាស៊ីនតោន និងដៃគូអង្គការណាតូ អំពីការជួយដល់យោធារបស់រុស្ស៊ីតាមរយៈការសម្របសម្រួលការលក់ផលិតផលប្រើប្រាស់មានមុខងារពីរទៅឱ្យរុស្ស៊ី។ កាលពីដើមសប្តាហ៍នេះ អនុរដ្ឋមន្ត្រីរតនាគារសហរដ្ឋអាមេរិក Wally Adeyemo បានអះអាងសារថា ទីក្រុងវ៉ាស៊ីនតោន និងសម្ព័ន្ធមិត្តបើកចំហចំពោះការដាក់ទណ្ឌកម្មលើអង្គភាពណាមួយដែលជួយរុស្ស៊ីទទួលបានសមាសធាតុដែលអាចប្រើសម្រាប់ផលិតអាវុធ។ យ៉ាងណមិញ ទាំងភាគី​ចិន និង​រុស្ស៊ី​បាន​បដិសេធ​ម្តង​ហើយ​ម្តង​ទៀត​ចំពោះ​ការ​ចោទ​ប្រកាន់​របស់​លោកខាងលិច។

ការពិភាក្សាទាក់ទងនឹង SPFS នឹងកើតឡើងនៅមុនកិច្ចប្រជុំកំពូល G7 នៅប្រទេសអ៊ីតាលី ដែលគ្រោងនប្រព្រឹត្តនៅពាក់កណ្តាលខែមិថុនា ដែលក្រុមនេះអាចថានឹងបង្កើតវិធានការថ្មីក្នុងគោលបំណងពង្រឹងការអនុវត្តទណ្ឌកម្មដែលមានស្រាប់លើប្រទេសរុស្ស៊ីកាន់តែប្រសើរឡើង។ មិនត្រឹមតែប៉ុណ្ណោះ សហភាពអឺរ៉ុបអាចយល់ព្រមលើការរឹតបន្តឹងរបស់ខ្លួនលឿនជាងមុន។ ទោះបីជាយ៉ាងណាក្តី ប្រទេសជាសមាជិកមួយចំនួនមានការស្ទាក់ស្ទើរក្នុងការគាំទ្រលើការហាមឃាត់ប្រព័ន្ធ SPFS ដោយសារតែមានការព្រួយបារម្ភថាប្រតិបត្តិការស្របច្បាប់អាចនឹងត្រូវបានប៉ះពាល់ ជាពិសេសទំនាក់ទំនងហិរញ្ញវត្ថុផ្ទាល់របស់ប្លុកជាមួយប្រទេសដែលធនាគារនឹងត្រូវកំណត់គោលដៅ។

ឥឡូវនេះ ទីក្រុងវ៉ាស៊ីនតោន និងសម្ព័ន្ធមិត្តរបស់ខ្លួនកំពុងស្វែងរកមធ្យោបាយដើម្បីប្រើប្រាស់ទ្រព្យសម្បត្តិរបស់ធនាគារកណ្តាលរុស្ស៊ីទំហំប្រហែល ៣០០ ពាន់លានដុល្លារដែលត្រូវបានបង្កក។ ទោះបីជាទីក្រុងវ៉ាស៊ីនតោនចង់រឹបអូសយកមូលនិធិទាំងស្រុងនោះ ប៉ុន្តែសមាជិក G7 ផ្សេងទៀតបានផ្តោតលើមធ្យោបាយដើម្បីទាញយកប្រាក់ចំណេញដែលបង្កើតពីទ្រព្យសម្បត្តិបង្កកតែប៉ុណ្ណោះ។ យ៉ាងណាមិញ វិធានការនេះមិនទាន់មានការឯកភាពគ្នា ដោយសារវាពាក់ព័ន្ធនឹងបញ្ហាបច្ចេកទេស និងច្បាប់សំខាន់ៗ៕