សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី CNBC បានរាយការណ៌ពីការព្យាករណ៍របស់ធនាគារពិភពលោកថា សេដ្ឋកិច្ចពិភពលោកកំពុងឈានទៅរកកំណត់ត្រានៃកំណើនពាក់កណ្តាលទសវត្សរ៍ដ៏អាក្រក់បំផុតរបស់ខ្លួនក្នុងរយៈពេល ៣០ឆ្នាំចុងក្រោយនេះ។
កាលពីថ្ងៃអង្គារសប្ដាហ៍នេះ ធនាគារពិភពលោក World Bank បានចេញផ្សាយរបាយការណ៍ “ទស្សនវិស័យសេដ្ឋកិច្ចសកល” ចុងក្រោយរបស់ខ្លួនថា កំណើនសេដ្ឋកិច្ចសកលត្រូវបានព្យាករណ៍ថានឹងថយចុះក្នុងឆ្នាំនេះ ដោយធ្លាក់ចុះពី ២,៦ ភាគរយក្នុងឆ្នាំ ២០២៣ ដល់ ២,៤ ភាគរយនៅឆ្នាំ ២០២៤។ យ៉ាងណាមិញ គេរំពឹងថា កំណើននឹងកើនឡើងតិចតួចវិញ ២,៧ ភាគរយក្នុងឆ្នាំ ២០២៥ ហើយបើទោះបីជាសេដ្ឋកិច្ចពិភពលោកបង្ហាញភាពធន់ក្នុងការប្រឈមមុខនឹងហានិភ័យនៃវិបត្តិសេដ្ឋកិច្ចនៅឆ្នាំ២០២៣ ក៏ដោយ ប៉ុន្តែការកើនឡើងនៃភាពតានតឹងភូមិសាស្ត្រនយោបាយនឹងបង្ហាញពីបញ្ហាប្រឈមថ្មីក្នុងរយៈពេលខ្លី។
លោក Ayhan Kose អនុប្រធានសេដ្ឋវិទូរបស់ធនាគារពិភពលោកបានលើកឡើងថា ពិភពលោកកំពុងមានសង្រ្គាមនៅអឺរ៉ុបខាងកើត គឺការឈ្លានពានរបស់រុស្ស៊ីលើអ៊ុយក្រែន និងជម្លោះធ្ងន់ធ្ងរនៅមជ្ឈិមបូព៌ា។ ការកើនឡើងនៃជម្លោះទាំងនេះអាចមានផលប៉ះពាល់យ៉ាងខ្លាំងចំពោះតម្លៃថាមពលដែលអាចជះឥទ្ធិពលលើអតិផរណា ក៏ដូចជាកំណើនសេដ្ឋកិច្ច។ បន្ថែមពីនេះ ធនាគារពិភពលោកព្រមានថា ប្រសិនបើគ្មានការផ្លាស់ប្តូរទិសដៅធំមួយកើតឡើងនោះទេ នោះទស្សវត្សឆ្នាំ ២០២០ នឹងក្លាយជាទសវត្សរ៍ដែលខ្ជះខ្ជាយឱកាស។
យ៉ាងណាមិញ គេរំពឹងថា សេដ្ឋកិច្ចកំពុងអភិវឌ្ឍន៍នឹងកើនឡើងត្រឹមតែ ៣,៩ ភាគរយក្នុងឆ្នាំ២០២៤។ លើសពីនេះ ធនាគារពិភពលោកបាននិយាយថា នៅចុងឆ្នាំនេះ ប្រជាជននៅបណ្តាប្រទេសកំពុងអភិវឌ្ឍន៍ប្រហែល ១ ក្នុងចំណោម ៤ និងប្រហែល ៤០ ភាគរយនៃបណ្តាប្រទេសដែលមានចំណូលទាបនឹងប្រឈមភាពក្រីក្រជាងមុនពេលមានការរាតត្បាតកូវីដ-១៩ ក្នុងឆ្នាំ២០១៩ ទៅទៀត។ មិនត្រឹមតែប៉ុណ្ណោះ ទិន្នន័យបានបង្ហាញថា ពិភពលោកកំពុងបរាជ័យក្នុងការសម្រេចគោលដៅរបស់ខ្លួនក្នុងការធ្វើឱ្យទសវត្សរ៍ឆ្នាំ ២០២០ ទៅជា “ទសវត្សរ៍ផ្លាស់ប្តូរ” ក្នុងការដោះស្រាយភាពក្រីក្រខ្លាំង មានជំងឺឆ្លង និងការប្រែប្រួលអាកាសធាតុ។ យ៉ាងណាមិញ វានៅតែមានឱកាសមួយដើម្បីផ្លាស់ប្តូរ ប្រសិនបើរដ្ឋាភិបាលធ្វើសកម្មភាពយ៉ាងឆាប់រហ័សដើម្បីបង្កើនការវិនិយោគ និងពង្រឹងក្របខ័ណ្ឌគោលនយោបាយសារពើពន្ធ។
បន្ថែមពីនេះ លោក Kose បាននិយាយថា ការរីកចំរើននៃការវិនិយោគមានសក្តានុពលក្នុងការផ្លាស់ប្តូរសេដ្ឋកិច្ចកំពុងអភិវឌ្ឍន៍ និងជួយពួកគេបង្កើនល្បឿនការផ្លាស់ប្តូរថាមពល និងសម្រេចបាននូវគោលដៅអភិវឌ្ឍន៍ជាច្រើន។ ជាមួយគ្នានេះ ដើម្បីជំរុញឱ្យមានការរីកចម្រើនបែបនេះ ប្រទេសកំពុងអភិវឌ្ឍន៍ចាំបាច់ត្រូវអនុវត្តកញ្ចប់គោលនយោបាយដ៏ទូលំទូលាយ ដើម្បីកែលម្អក្របខ័ណ្ឌសារពើពន្ធ និងរូបិយវត្ថុ ពង្រីករំហូរពាណិជ្ជកម្មឆ្លងព្រំដែន និងហិរញ្ញវត្ថុ កែលម្អបរិយាកាសវិនិយោគ និងពង្រឹងគុណភាពនៃស្ថាប័ន។ វាគឺជាការងារដ៏លំបាក ប៉ុន្តែប្រទេសកំពុងអភិវឌ្ឍន៍ជាច្រើនធ្លាប់សម្រេចបានកាលពីមុនមក ហើយការធ្វើវាម្តងទៀតនឹងជួយទប់ទល់ការធ្លាក់ចុះដែលបានព្យាករណ៍៕
Account
Security
Favourite Content