ភ្នំពេញ៖ ក្នុងរយៈពេល ៥ឆ្នាំខាងមុខ ផ្នែកទាំង៣របស់ក្រុមធនាគារពិភពលោក រួមមានទីភ្នាក់ងារអភិវឌ្ឍន៍អន្តរជាតិ (IDA) សាជីវកម្មហិរញ្ញវត្ថុអន្តរជាតិ (IFC) និងទីភ្នាក់ងារពហុភាគីធានាការវិនិយោគ (MIGA) នឹងបន្តជំរុញដល់ការវិនិយោគនៅកម្ពុជា និងលើកកម្ពស់ភាពជាដៃគូសាធារណៈ និងឯកជន ជាពិសេសលើវិស័យហេដ្ឋារចនាសម្ព័ន្ធ។

លោកស្រី Kim-See Lim នាយក IFC ប្រចាំតំបន់អាស៊ីបូព៌ា និងប៉ាស៊ីហ្វិកបានមានប្រសាសន៍ថា៖

“IFC និងក្រុមធនាគារពិភពលោកកំពុងតែជំរុញឱ្យមានការចូលរួមរបស់វិស័យឯកជននៅកម្ពុជាឱ្យបានស្វាហាប់ និងប្រកបដោយការប្រកួតប្រជែង។ យើងនឹងបន្តការគាំទ្រដល់ការពង្រឹងកិច្ចការពារអ្នកប្រើប្រាស់ហិរញ្ញវត្ថុ និងការផ្តល់ប្រាក់កម្ចីប្រកបដោយទំនួលខុសត្រូវ,ជំរុញដល់ការរៀបចំបង្កើតទីផ្សារហិរញ្ញប្បទានបៃតង, និងជួយកម្ពុជាក្នុងការទាក់ទាញទុនឯកជនសម្រាប់វិស័យហេដ្ឋារចនាសម្ព័ន្ធ ដូចជា ថាមពល និងការដឹកជញ្ជូន ជាពិសេសតាមរយៈភាពជាដៃគូសាធារណៈ និងឯកជន”។

គួរជម្រាបថា៖ ក្រុមធនាគារពិភពលោកកាលពីពាក់កណ្តាលសប្តាហ៍នេះ បានពិភាក្សាស្តីពីក្របខ័ណ្ឌ​ភាព​ជា​ដៃគូថ្មី​ប្រចាំ​ប្រទេស (CPF) សម្រាប់កម្ពុជា ឆ្នាំ​២០២៥ – ២០២៩។

ក្របខ័ណ្ឌភាពជាដៃគូថ្មីនឹងចូលរួមដោះស្រាយគោលដៅប្រទាក់ក្រឡាគ្នា​ចំនួន៣ រួមមាន ការកែ​លម្អ​សុខភាព និងការអប់រំឱ្យ​ប្រសើរឡើង, ការលើកកម្ពស់ភាព​ប្រកួតប្រជែង និងការពង្រឹង​ភាព​​ធន់នៃក្រុម​គ្រួសារដែលងាយ​រងគ្រោះ។

ផែនការសកម្មភាពយេនឌ័រ ដែលបានធ្វើបច្ចុប្បន្នភាពនឹងផ្តល់ជាមូលដ្ឋានសម្រាប់ដោះស្រាយគម្លាតយេនឌ័រក្នុងការឈានទៅការអប់រំមធ្យមសិក្សា និងលើកកម្ពស់ទិន្នន័យយេនឌ័រឱ្យកាន់តែប្រសើរឡើង។ ក្របខ័ណ្ឌថ្មីនេះក៏នឹងផ្តោតដែរទៅលើ​ការ​កសាងគណ​នេយ្យភាពសម្រាប់​បណ្តា​គម្រោង​ផ្តល់សេវា​ ​ការ​ពង្រឹង​ស្តង់ដាធានាការទុកចិត្តលើវិស័យសាធារណៈ​ និង​ផ្តោតលើការបន្ត​ការ​ត្រួតពិនិត្យពីលើ និង​ផ្តល់​ប្រឹក្សា​អំពី​យន្តការសម្រាប់​​ដោះស្រាយ​បណ្តឹងតវ៉ា/បណ្តឹងសាទុក្ខនានា ដែលអាចកើតមាន។

យោងសេចក្តីប្រកាសពត៌មានរបស់ធនាគារពិភពលោក ឯកសារក្របខ័ណ្ឌភាពជាដៃគូប្រចាំប្រទេសនេះ ​បាន​គូសបញ្ជាក់​អំពី​បណ្តា​អាទិភាពសម្រាប់កម្មវិធីនានា​របស់ក្រុម​ធនាគារពិភពលោក សម្រាប់​​​ជួយ​ដល់កម្ពុជាក្នុងរយៈពេល ៥ឆ្នាំខាងមុខ។ ក្របខ័ណ្ឌនេះត្រូវ​បាន​រៀបចំឡើងដោយ​ផ្អែក​លើ​​ឯកសារវិភាគ​អំពីបញ្ហា​ប្រឈមនានា​នៅ​ក្នុង​កិច្ច​អភិវឌ្ឍន៍​របស់ប្រទេស, យុទ្ធសាស្ត្រអភិវឌ្ឍន៍របស់រាជ​រដ្ឋាភិបាល​កម្ពុជា និងកិច្ច​ពិគ្រោះ​យោបល់​​ជាមួយ​ភាគីពាក់ព័ន្ធជាច្រើន។

លោកស្រី ម៉ារីយ៉ាម ស្ហ៊ឺមែន (Mariam Sherman) នាយិកា​ធនាគារពិភពលោកប្រចាំកម្ពុជា ឡាវ និង​វៀតណាម បានមានប្រសា​សន៍​ថា ៖

“ការផ្តោតជាគន្លឹះសម្រាប់ការចូលរួមរបស់យើងគឺការលើកកម្ពស់មូលធនមនុស្ស ជាពិសេសគឺការអប់រំជាមូលដ្ឋាន និងមូលដ្ឋានគ្រឹះនៃជំនាញ”។

លោកស្រី​បានមាន​ប្រសាសន៍ទៀតថា៖ កម្មវិធីថ្មីនេះ​ក៏នឹងសង្កត់ធ្ងន់​លើការកាត់បន្ថយ​ភាពក្រីក្រ​តាម​រយៈ​ការ​ជំរុញ​​ការវិនិយោគលើវិស័យសុខាភិបាល និងការអប់រំ, ជួយបង្កើតការងារ និងការការពារជីវភាព​រស់នៅរបស់​ក្រុម​គ្រួសារ​ដែល​​ងាយរងគ្រោះ រួមទាំងការពង្រឹងភាពធន់ទៅនឹងបម្រែបម្រួលអាកាសធាតុ៕