បរទេស៖ យោងតាមប្រភពព័ត៌មានពី The Guardian បានរាយការណ៍ថា ធនាគារពិភពលោកបានដំឡើងការព្យាករណ៍របស់ខ្លួនសម្រាប់កំណើនសេដ្ឋកិច្ចរបស់ចិន ប៉ុន្តែបានអំពាវនាវឱ្យមានកំណែទម្រង់ស៊ីជម្រៅជាងនេះ និងព្រមានថាប្រទេសនេះអាចនឹងបន្តប្រឈមមុខនឹងបញ្ហាដែលបណ្តាលមកពីការធ្លាក់ចុះនៃវិស័យអចលនទ្រព្យ។

ធនាគារពិភពលោក (World Bank) បានព្យាករណ៍ថា ផលិតផលក្នុងស្រុកសរុបរបស់ចិននឹងកើនឡើង ៤,៩ ភាគរយឆ្នាំ២០២៤ ដែលជាលទ្ធផលនៃការបន្ធូរបន្ថយគោលនយោបាយថ្មីៗ និងជំរុញការនាំចេញ។ តួរលេខនេះកើនឡើងពីការព្យាករណ៍កាលពីខែមិថុនា ៤,៨ ភាគរយ ខណៈដែលចិនកំណត់គោលដៅកំណើនខ្លួនឯង ៥ ភាគរយ។ ស្របពេលធនាគារពិភពលោកដំឡើងការព្យាករណ៍កំណើនសេដ្ឋកិច្ចចិនដល់ ៤,៩ ភាគរយសម្រាប់ ២០២៤ ប៉ុន្តែក៏បានព្យាករណ៍ថា កំណើននឹងថយចុះមកត្រឹម ៤,៥ ភាគរយសម្រាប់ឆ្នាំ ២០២៥។ យ៉ាងណាមិញ តួរលេខនេះខ្ពស់ជាងពីការព្យាករណ៍លើកមុន ៤,១ ភាគរយ។

នៅឆ្នាំ២០២៤ នេះ ចិនដែលជាសេដ្ឋកិច្ចធំទី២ របស់ពិភពលោកបានជួបការលំបាក ដោយសារផលប៉ះពាល់នៃវិបត្តិអចលនទ្រព្យជាច្រើនឆ្នាំ និងតម្រូវការក្នុងស្រុកចុះខ្សោយ។ ទន្ទីមនឹងនេះ ទីក្រុងប៉េកាំងព្យាយាមបង្វែរប្រទេសទៅកាន់ឧស្សាហកម្មបច្ចេកវិទ្យាខ្ពស់បន្ថែមទៀត ដើម្បីជំរុញផលិតផលក្នុងស្រុកសរុប ប៉ុន្តែមានការភ័យខ្លាចកាន់តែខ្លាំងឡើងថា ការដំឡើងពន្ធរបស់ Donald Trump អាចនឹងរារាំងដល់កំណើនសេដ្ឋកិច្ចបន្ថែមទៀត។

ធនាគារពិភពលោកបាននិយាយថា ការធ្លាក់ចុះនៃទំនុកចិត្តរបស់ពលរដ្ឋ និងអាជីវកម្មនឹងបន្តមានឥទ្ធិពលលើកំណើនរបស់ចិននៅឆ្នាំ ២០២៥។ វាគឺជាបញ្ហារចនាសម្ព័ន្ធរួមមាន កំណើនប្រជាជនវ័យចំណាស់ ការប្រើប្រាស់ទាប និងកម្រិតបំណុលខ្ពស់ក្នុងចំណោមអ្នកអភិវឌ្ឍន៍អចលនទ្រព្យ និងរដ្ឋាភិបាលមូលដ្ឋាន។ យ៉ាងណាមិញ គេមិនរំពឹងថា ទីផ្សារអចលនទ្រព្យចិននឹងធូរស្រាលនោះទេរហូតដល់ចុងឆ្នាំ ២០២៥។

លើសពីនេះ ធនាគារពិភពលោកអំពាវនាវដល់ចិនឱ្យធ្វើកំណែទម្រង់សេដ្ឋកិច្ចឲ្យកាន់តែស៊ីជម្រៅដោយពន្យល់ថា វិធានការជំរុញធម្មតានឹងមិនគ្រប់គ្រាន់ក្នុងការជំរុញកំណើនឡើងវិញទេ។ Mara Warwick នាយកប្រចាំប្រទេសចិនរបស់ធនាគារពិភពលោក លើកឡើងថា វាមានសារៈសំខាន់ក្នុងការធ្វើឱ្យការគាំទ្ររយៈពេលខ្លីមានតុល្យភាពចំពោះកំណើនជាមួយនឹងកំណែទម្រង់រចនាសម្ព័ន្ធរយៈពេលវែង។ ការដោះស្រាយបញ្ហាប្រឈមក្នុងវិស័យអចលនទ្រព្យ ការពង្រឹងសំណាញ់សុវត្ថិភាពសង្គម និងការកែលម្អហិរញ្ញវត្ថុរបស់រដ្ឋាភិបាលក្នុងតំបន់មានសារៈសំខាន់ណាស់ក្នុងការដោះសោការស្តារឡើងវិញប្រកបដោយនិរន្តរភាព។ លើសពីនេះ របាយការណ៍ជំរុញឲ្យព្យាយាមលើកកម្ពស់ផលិតភាពរបស់កម្មករ ដោយអាជ្ញាធរចិនគួរតែផ្តោតលើការជំរុញលទ្ធភាពសម្រាប់ពលរដ្ឋទទួលបានការអប់រំប្រកបដោយគុណភាព ការថែទាំសុខភាព និងសុខុមាលភាពសង្គម។ វិធានការទាំងនេះអាចជួយបន្ធូរបន្ថយការតានតឹងផ្នែកសេដ្ឋកិច្ច ជាពិសេសអ្នកដែលមានចំណូលទាប និងវណ្ណៈកណ្តាលដែលងាយរងគ្រោះ។ សំណាញ់សុវត្ថិភាពកាន់តែរឹងមាំផ្តល់អត្ថប្រយោជន៍ដ៏មានប្រសិទ្ធភាពផងដែរ នៅពេលដែលមានហានិភ័យប៉ះពាល់ដល់ពលរដ្ឋ និងសហគ្រិនជាដើម។

ស្របពេលដែលវណ្ណៈកណ្តាលរបស់ចិនបានកើនឡើងខ្លាំងតាំងពីទសវត្សរ៍ឆ្នាំ២០១០ ហើយវាមានចំណែក ៣២ ភាគរយនៃចំនួនប្រជាជនសរុបក្នុងឆ្នាំ ២០២១។ ធនាគារពិភពលោកបានប៉ាន់ប្រមាណថាប្រហែល ៥៥ ភាគរយក្នុងតួរលេខនេះកំពុងមាននៅក្រោមគំនាបសេដ្ឋកិច្ច ដោយគូសបញ្ជាក់ពីតម្រូវការសម្រាប់ចិនក្នុងការបង្កើតឱកាសនៅទូទាំងប្រទេស។ Elitza Mileva សេដ្ឋវិទូប្រចាំប្រទេសចិនរបស់ធនាគារពិភពលោក លើកឡើងថា ការពង្រីកឱកាសសម្រាប់មនុស្សគ្រប់គ្នាក្នុងការឡើងជណ្តើរសេដ្ឋកិច្ចគឺមានសារៈសំខាន់ណាស់ ដើម្បីសម្រេចបាននូវគោលដៅនៃវិបុលភាពរួមរបស់ប្រទេសចិន។ ការទទួលបានឱកាសស្មើគ្នា និងការចល័តសង្គមកាន់តែច្រើននឹងគាំទ្រដល់កំណើនតាមរយៈធនធានមនុស្សកាន់តែខ្ពស់ និងភាពជាសហគ្រិនកាន់តែច្រើន៕