បរទេស ៖ មួយរយៈចុងក្រោយនេះ ពិភពលោកបានទទួលការភ្ញាក់ផ្អើលយ៉ាងខ្លាំងនៅពេលដែលស្ថាបនិកក្រុមហ៊ុន Telegram លោក Pavel Durov ត្រូវបានចាប់ឃាត់ខ្លួននៅបារាំងក្រោមបទចោទប្រកាន់មួយចំនួនពាក់ព័ន្ធទៅនឹងឧក្រិដ្ឋកម្មអនឡាញ និងការបំពានផ្លុវភេទលើកុមារផងដែរ ប៉ុន្តែអ្នកវិភាគជាច្រើនបានមើលឃើញថាបញ្ហានេះបានជាប់ពាក់ព័ន្ធទៅនឹងនយោបាយច្រើនជាងគោលការណ៍ធ្វើអាជីវកម្មរបស់ Telegram ។

ទោះបីជាយ៉ាងណាក្តី មកទល់បច្ចុប្បន្ននេះ លោកត្រូវបានដោះលែងឱ្យនៅក្រៅឃុំជាមួយនឹងការបង់ប្រាក់មួយចំនួនដើម្បីធានា ប៉ុន្តែលោកមិនអាចធ្វើដំណើរចេញពីប្រទេសបារាំងបានឡើយរហូតដល់មានការកាត់ទោសសាជាថ្មីម្តងទៀត។

តើបុរសជនជាតិរុស្ស៊ីកាន់លិខិតឆ្លងដែនដល់ទៅ២រូបនេះជាអ្នកណា? ហើយលោកធ្លាប់មានប្រវត្តិយ៉ាងណាខ្លះពេលរស់នៅក្នុងប្រទេសរុស្ស៊ី និងការចាប់ផ្តើំមអាជីវកម្ម?

បច្ចុប្បន្ន បណ្តាញសង្គម Telegram កំ​ពុងក្លាយកម្មវិធីទំនាក់ទំនងដ៏ពេញនិយមជាប់ចំណាត់ថ្នាក់លេខ៨ ដែលមានអ្នកប្រើប្រាស់ប្រមាណជាង ៩៥​០លាន​នាក់ជារៀងរាល់ខែ​ទូទាំ​ង​​ស​កលលោក។ លោក Pavel Valerievich Durov ជនជាតិរុស្ស៊ីជាស្ថាបនិកនៃបណ្តាញសង្គមល្បីឈ្មោះមួយនេះ ត្រូវ​បាន​សា​ធា​រ​ណជន​ចាត់ទុកជាមហាសេដ្ឋី​មានទ្រព្យសម្បត្ដិសរុបរហូតទៅដល់ ១៥.៥ពាន់លានដុល្លារ។

លោក Pavel Valerievich Durov កើតនៅថ្ងៃទី១០ ខែតុលា ឆ្នាំ១៩៨៤ នៅក្នុងទីក្រុង St.Petersburg និងបានទៅរស់នៅក្នុងទីក្រុង Turin ប្រទេសអ៊ីតាលី ជាកទីន្លែងដែលឪពុករបស់លោកធ្វើការ និងបានវិលត្រឡប់ទៅប្រទេសរុស្ស៊ីវិញនៅអាយុ ១៧ឆ្នាំ។ លោកបានរៀនសរសេរកូ​ដ​តាំង​ពីក្មេងមកម្ល៉េះ​ដោយមា​ន​​បងប្រុសឈ្មោះ​ Nikolai Durov ជាអ្នកបង្រៀន។ ឪពុករបស់លោក Pavel Durov ជាបណ្ឌិតផ្នែកភាសាបុរាណ (Philology) ធ្វើការនៅប្រទេសអ៊ីតាលី។

នៅពេលមានអាយុ ១១ឆ្នាំ កុមារ Pavel Durov បានបង្កើតហ្គេមវីដេអូមួយដោយប្រើយុទ្ធសាស្ត្រមានឈ្មោះថា Lao Unit។ ក្រោយមកបងប្អូនទាំងពីរបានបង្កើត VKontakte ឬហៅកាត់ខ្លីថា VK ដែលជាបណ្តាញសង្គមពេញនិយមនៅក្នុងប្រទេសរុស្ស៊ី។ បណ្តាញសង្គមមួយនេះ​ទទួលបានជោគជ័យ និង​ទាក់ទាញអ្នកប្រើប្រាស់​រាប់​លាន​នាក់យ៉ាងឆាប់រហ័ស ហើយក្លាយជាបណ្តាញសង្គមធំជាងគេនៅក្នុងប្រទេសរុស្ស៊ី។ ក៏ប៉ុន្តែ VK ចាប់ផ្តើមមានបញ្ហាជាមួយរដ្ឋាភិបាលរុស្ស៊ីចាប់ពីឆ្នាំ២០១១ ព្រោះវាបានក្លាយជាទីកន្លែងសម្រាប់អ្នកប្រើប្រាស់រិះគន់រដ្ឋាភិបាល។

ក្រោយមក ភាគហ៊ុនភាគច្រើនរបស់ VKontakte ត្រូវបានប្រមូលទិញយកដោយក្រុមហ៊ុនវិនិយោគិន Mail.ru ដែលជាក្រុមហ៊ុនមានទំនាក់ទំនងជិតស្និទ្ធជាមួយវិមានក្រឹមឡាំង ។ លោក Pavel Durov បានបាត់បង់សិទ្ធិ​អំណាចក្នុងការគ្រប់គ្រង VK បន្តិចម្ដងៗរហូតដល់គាត់ត្រូវលក់ភាគហ៊ុនគាត់ទាំងអស់ក្នុងតម្លៃប្រមាណ ៣០០លានដុល្លារ ហើយគេចខ្លួន​ចេញពីប្រទេសរុស្ស៊ីក្រោយមានទំនាស់កាន់តែខ្លាំងជាមួយរដ្ឋាភិបាលរុស្ស៊ី។

លោក Pavel Durov និងបងប្រុសរបស់លោក រួមជាមួយបុគ្គលិក VKontakte មួយចំនួនបានទៅរស់នៅទីក្រុង New York ដោយចាប់ផ្តើមបង្កើតកម្មវិធីផ្ញើសារ Telegram ចាប់តាំងពីចុងឆ្នាំ២០១២ និងចេញជារូបរាងនៅខែសីហា ឆ្នាំ២០១៣ ហើយបានក្លាយជាកម្មវិធីផ្ញើសារដ៏ល្បីមួយដែលមានអ្នកប្រើប្រាស់ជិត ១០០០លាននាក់ជុំវិញពិភពលោក។

រយៈពេល១២ឆ្នាំកន្លងមកនេះ បុរសវ័យ៣៩រូបនេះ ទទួលជោគ​ជ័យ​យ៉ាង​ខ្លាំង​​លើ​ការងារអភិវឌ្ឍន៍បច្ចេកវិទ្យា Telegram ។ លោក Pavel Durov បានវិនិយោគលុយរហូតដល់ទៅ ១.៧ពាន់លានដុល្លារដើម្បីបង្កើត Telegram Open Network ដែលជាមុខងារបន្ថែមពីលើ Telegram ដោយបញ្ចូលជាមួយនឹងមុខងារចាយលុយតាមរយៈអនឡាញផងដែរ។

មានការយល់ឃើញមួយចំនួនបានលើកឡើងថា ការចាប់ខ្លួនរបស់ Pavel ក៏មានពាក់ព័ន្ធទៅនឹងរដ្ឋាភិបាលក្រុងវ៉ាស៊ិនតោនផងដែរ ពីព្រោះថារាល់បណ្តាញសង្គមដែលមានចំនួនអ្នកប្រើប្រាស់រាប់រយលាននាក់បែបនេះ អាមេរិកតែងតែព្យាយាមយកមកគ្រប់គ្រង ឬធ្វើការជាមួយគ្នា ជាក់ស្តែង ដូចដែលធ្លាប់បានឃើញកន្លងមក ដូចជា Tiktok ជាដើម។

ស្របពេលជាមួយគ្នានេះដែរ រុស្ស៊ី បើទោះបីជាមិនសូវមានទំនាក់ទំនងល្អជាមួយនឹងលោក Pavel ប៉ុន្តែបច្ចុប្បន្នក្រុមពលរដ្ឋ និងមន្ត្រីយោធាភាគច្រើនបានធ្វើការងារនៅលើបណ្តាញទំនាក់ទំនងមួយនេះជាប្រចាំថ្ងៃរួចទៅហើយ ដូច្នេះ ប្រសិនបើលោកខាងលិច ឬអាមេរិកអាចបញ្ចុះបញ្ចូលយកបានទិន្នន័យទៅលើ Telegram នោះមានន័យថា វានឹងក្លាយទៅជាមហន្តរាយរបស់រុស្ស៊ីចំពោះប្រតិបត្តិការសង្គ្រាមនៅអ៊ុយក្រែនជាមិនខាន៕