កម្មវិធី «វិថីហិរញ្ញវត្ថុ រដូវកាលទី២» ត្រូវបានបើកសម្ពោធដាក់ដំណើរការជាផ្លូវការហើយ

ភ្នំពេញ​ ៖ ដូចទៅនឹងការគ្រោងទុក នៅព្រឹកថ្ងៃទី២០ ខែមិថុនា ឆ្នាំ២០២៤នេះ កម្មវិធី «វិថីហិរញ្ញវត្ថុ រដូវកាលទី២» ដែលរៀបចំឡើងដោយក្រុមហ៊ុន Apsara Media Services (AMS) សមាគមមីក្រូហិរញ្ញវត្ថុកម្ពុជា (CMA) សមាគមធនាគារនៅកម្ពុជា (ABC) និងក្រុមហ៊ុន ក្រេឌីត ប្យួរ៉ូ (ខេមបូឌា) ខូអិលធីឌី (​CBC) ក្រោមកិច្ចគាំទ្រពីធនាគារជាតិនៃកម្ពុជា (NBC) ត្រូវបានបើកសម្ពោធដាក់ដំណើរការជាផ្លូវការក្រោមការចូលរួមគាំទ្រ អបអរសាទរពីសំណាក់មន្ត្រីជាន់ខ្ពស់នៃធនាគារជាតិកម្ពុជា, សមាគមធនាគារនៅកម្ពុជា, សមាគមមីក្រូហិរញ្ញវត្ថុកម្ពុជា ព្រមទាំងបណ្តាម្ចាស់អាជីវកម្ម និងសិស្ស-និស្សិតសរុបប្រមាណ ៣០០នាក់។

នៅក្នុងឱកាសនៃពិធីបើកសម្ពោធដាក់ដំណើរការជាផ្លូវការនូវកម្មវិធីដ៏មានសារសំខាន់ខាងលើនេះ លោកស្រី នុត រត្ថា នាយិកាប្រតិបត្តិក្រុមហ៊ុន អប្សរា មេឌា សឺវីស (AMS) បានលើកឡើងថា AMS ជាស្ថាប័នផ្សព្វផ្សាយដែលមានទស្សនវិស័យវែងឆ្ងាយដើម្បីអភិវឌ្ឍខ្លួនឱ្យក្លាយជាបណ្តាញផ្សព្វផ្សាយ​ព័ត៌មាន​ដ៏មានសក្តានុពលក្នុងការបង្កើត និងផ្សព្វផ្សាយនូវមាតិកាព័ត៌មានធំទូលាយ សំបូរបែប និងមាន​ប្រយោជន៍​​​ព្រមទាំងផ្សារភ្ជាប់ជាមួយប្រជាជន​គ្រប់លំដាប់ថ្នាក់ ទាំងក្នុងប្រទេស និងលើពិភពលោក។ ចក្ខុវិស័យ​សំខាន់របស់ AMS គឺផ្តល់នូវព័ត៌មានដែលមានគុណភាពខ្ពស់ដល់ទស្សនិកជនគោលដៅ និង​សាធារណជន​ទូទៅ​ទាំងក្នុងប្រទេស និងក្នុងតំបន់តាមរយៈប្រព័ន្ធផ្សព្វផ្សាយនវានុវត្ត និងការប្រើប្រាស់ធនធានស្ថាប័ន​ប្រកប​ដោយប្រសិទ្ធភាព និងប្រសិទ្ធផល ធ្វើឱ្យអតិថិជនមានការរីកចម្រើន តាមរយៈការប្រើប្រាស់​សេវា​ផ្សព្វផ្សាយ និងទីផ្សាររបស់ក្រុមហ៊ុន ក្រោមមូលបទស្នូល គុណភាព ភាពស្មោះត្រង់-ទុកចិត្តបាន ក្រមសីលធម៌​វិជ្ជាជីវៈ ប្តេជ្ញាចិត្ត ច្នៃប្រតិដ្ឋ និងសហការដើម្បីឧត្តមប្រយោជន៍រួម។

អ្នកស្រីបានបន្តថា ៖

បន្ទាប់ពីបានផលិត និងផ្សព្វផ្សាយកម្មវិធី “វិថីហិរញ្ញវត្ថុ” នៅរដូវកាលទី១ យើងទទួលបានផ្លែផ្កាជាវិជ្ជមាន​តាមការរំពឹងទុក។ វីដេអូទាំង២០ភាគ ផ្តោតសំខាន់លើ​ករណីសិក្សាជាក់ស្តែងរបស់អតិថិជនចំនួន ៣០% ចំណេះដឹងស្តីពីឥណទានចំនួន ៣០% ចំណេះដឹងទូទៅស្តីពីសារៈសំខាន់របស់គ្រឹះស្ថានធនាគារហិរញ្ញវត្ថុ ២០% និង​២០% ទៀតផ្តោតទៅ​លើ​ហានិភ័យ​នានាផ្នែកបច្ចេកវិទ្យាចំពោះហិរញ្ញវត្ថុ​ បានចែករំលែក​ទៅ​ដល់​ទស្សនិកជន​ជាង៣លាននាក់ និងទទួលបានការទស្សនាប្រមាណ៤០លានដង។ បន្ថែម​ពីលើការ​គាំទ្រ​របស់​ទស្សនិកជន​ទូទាំងប្រទេស កម្មវិធីអប់រំ​ផ្នែក​ហិរញ្ញវត្ថុនេះ ក៏ជា​សក្ខីភាពបង្ហាញ​ពីសាមគ្គីភាព​របស់​ស្ថាប័ន​ហិរញ្ញវត្ថុ​លើផ្នែកអប់រំ និងផ្សព្វផ្សាយផងដែរ។ ជាក់ស្តែង សមាជិកសមាគមធនាគារនៅកម្ពុជា (ABC) និង​សមាជិកសមាគមហិរញ្ញវត្ថុកម្ពុជា (CMA) ប្រមាណជាង​៥០ស្ថាប័នបានចូលរួមផ្សព្វផ្សាយយ៉ាង​ទូលំទូលាយ​ទៅកាន់​​បណ្តាញផ្សព្វផ្សាយ​របស់ខ្លួន​យ៉ាង​ផុសផុល។ កិច្ចសហការ​នេះបូករួមជាមួយ​បណ្តាញផ្សព្វផ្សាយ​របស់ AMS គ្រប់ផ្នែក ទាំងវិទ្យុ ទូរទស្សន៍ និងបណ្តាញឌីជីថល បានជ្រួតជ្រាបទៅកាន់ប្រជាជន​គ្រប់ទីកន្លែង​រាប់លាន​នាក់។

លទ្ធផលជាវិជ្ជមានទាំងអស់នេះអាចកើតឡើងទៅបានដោយសារការចូលរួមពីគ្រប់ភាគី។ ឆ្លៀតក្នុង​ឱកាស​​​នេះ​​នាងខ្ញុំសូមថ្លែងអំណរគុណយ៉ាងជ្រាលជ្រៅចំពោះដៃគូសហការទាំងអស់ រួមទាំង​សមាជិក​ដែល​ចូលរួម​យ៉ាង​សកម្មកន្លងមក និងស្នើសុំកិច្ចសហការ​បន្តទៀត​សម្រាប់​រដូវកាលទី២​ដែលនឹងឈានមកដល់​នាពេលខាង​មុខនេះ។

លោក តូច ចៅចេក សមាជិកក្រុមប្រឹក្សាភិបាលនៃសមាគមធនាគារនៅកម្ពុជា (ABC) បានមានប្រសាសន៍ថា តាងនាមឱ្យសមាគមធនាគារនៅកម្ពុជា លោកពិតជាមានសេចក្តីសោមនស្សរីករាយជាអនេក ដែលបានចូលរួមជាមួយថ្នាក់ដឹកនាំស្ថាប័នធនាគារ និងហិរញ្ញវត្ថុនានានៅក្នុងពិធីសម្ពោធ វិថី ហិរញ្ញវត្ថុ (Financial Street) រដូវកាលទី២ នាពេលនេះ។

លោកបានបន្តថា ៖ «តាមរយៈកិច្ចសហប្រតិបត្តិការរវាងក្រុមហ៊ុន អប្សរា មេឌា សឺវីស (AMS ) សមាគមមីក្រូហិរញ្ញវត្ថុកម្ពុជា និងការិយាល័យឥណទានកម្ពុជា និងក្រោមការគាំទ្រពីធនាគារជាតិនៃកម្ពុជា វិថីហិរញ្ញវត្ថុ (Financial Street) រដូវកាលទី១ បានបញ្ចប់ទៅប្រកបដោយផ្លែផ្កា និងមានការគាំទ្រចូលរួមយ៉ាងសកម្មពីភាគីពាក់ព័ន្ធ។ មាតិកាអប់រំផ្នែកហិរញ្ញវត្ថុដែលបានផលិតឡើងក្នុងរដូវកាលទី១ manប្រមាណជា ២០វីដេអូ ដែលទាក់ទងគ្រប់ទិដ្ឋភាពនៃសង្គម និងសេដ្ឋកិច្ច បានផ្សព្វផ្សាយយ៉ាងទូលំទូលាយជូនដល់បងប្អូនប្រជាពលរដ្ឋកម្ពុជា មិនថាតែនៅទីប្រជុំជន ទីក្រុងប៉ុណ្ណោះទេ ប៉ុន្តែវីដេអូអប់រំក៏បានចែករំលែក និងផ្សព្វផ្សាយដល់បណ្តាខេត្តមួយចំនួនទៀតផងដែរ។ ឆ្លៀតក្នុងឱកាសនេះ លោកក៏សូមថ្លែងអំណរគុណដល់សមាជិកនៃសមាគមដែលបានចូលរួមយ៉ាងសកម្មក្នុងការផ្សព្វផ្សាយបន្តចំពោះមាតិកាអប់រំផ្នែកហិរញ្ញវត្ថុនៅលើបណ្តាញសង្គមរបស់ខ្លួន និងការចូលរួមផ្តល់ធាតុចូលដល់មាតិកា ក៏ដូចជាចូលរួមជាវាគ្មិនដល់កម្មវិធី»។

លោកបានសង្កត់ធ្ងន់ថា ៖ «ការអប់រំអតិថិជនអំពីចំណេះដឹងហិរញ្ញវត្ថុ គឺជាតួនាទីដ៏សំខាន់របស់គ្រឹះស្ថានធនាគារ និងហិរញ្ញវត្ថុ។ ការបញ្ជ្រាបការយល់ដឹង និងចំណេះដឹងហិរញ្ញវត្ថុដល់អតិថិជនកាន់តែច្រើន និងកាន់តែប្រសើរឡើងពីគ្រឹះស្ថានធនាគារ និងហិរញ្ញវត្ថុ នឹងជួយឱ្យស្ថាប័នហិរញ្ញវត្ថុ និងវិស័យធនាគារកាន់តែរឹងមាំ ស្ថិរភាព និងភាពធន់ ។ ការណ៍នេះមានភាពចាំបាច់ និងទាមទារឱ្យមានការចូលរួមពីគ្រប់ភាគីពាក់ព័ន្ធ និងឲ្យមានការដាក់ចេញកម្មវិធីអប់រំ ការបង្កើតមាតិកាអប់រំផ្នែកហិរញ្ញវត្ថុជាបន្តបន្ទាប់។ ជាក់ស្តែងការបន្តកិច្ចសហប្រតិបត្តិការជាមួយក្រុមហ៊ុន អប្សរា មេឌា សឺវីសនេះ ជាជំហានដ៏ល្អមួយ ។ សមាគមធនាគារនៅកម្ពុជា នឹងបន្តដាក់ចេញនូវគំនិតផ្តួចផ្តើមផ្សេងៗទៀតបន្ថែមទៀត ដើម្បីគាំទ្រដល់ការអប់រំចំណេះដឹងហិរញ្ញវត្ថុដល់សាធារណជន។ បន្ថែមលើនេះ យើងក៏សូមលើកទឹកចិត្តដល់គ្រឹះស្ថានធនាគារ និងហិរញ្ញវត្ថុ ចូលរួមចែករំលែក និងផ្សព្វផ្សាយកម្មវិធីអប់រំផ្នែកហិរញ្ញវត្ថុផងដែរ ដើម្បីពាំនាំនូវចំណេះដឹងហិរញ្ញវត្ថុថ្មីៗជូនដល់ប្រជាពលរដ្ឋកម្ពុជា។ ចំណេះដឹងផ្នែកហិរញ្ញវត្ថុមានសារៈសំខាន់បំផុតសម្រាប់ជំរុញកំណើនសេដ្ឋកិច្ច និងកាត់បន្ថយភាពក្រីក្រតាមរយៈការពង្រីកលទ្ធភាពទទួលបាន សេវាហិរញ្ញវត្ថុផ្លូវការ ការលើកកម្ពស់ឥរិយាបថហិរញ្ញវត្ថុប្រកបដោយការទទួលខុសត្រូវ»។

នៅក្នុងឱកាសនេះផងដែរ លោកជំទាវ ឌិត នីតា ប្រធានក្រុមប្រឹក្សាភិបាលនៃសមាគមមីក្រូហិរញ្ញវត្ថុកម្ពុជា (CMA) បានមានប្រសាសន៍ថា ចំណេះដឹងហិរញ្ញវត្ថុ រួមមាន ការចេះរៀបចំទុកដាក់លុយកាក់ ចាត់ចែងចំណូលចំណាយ ការរក្សាទុកប្រាក់សន្សំ ការវិនិយោគ ការចេះគ្រប់គ្រង និងប្រើប្រាស់ប្រាក់កម្ចីឱ្យបានត្រឹមត្រូវដើម្បីភាពរីកចម្រើនជាដើម។​ ចំណេះដឹងផ្នែកហិរញ្ញវត្ថុគឺជាបំណិនជីវិតដ៏មានសារៈសំខាន់មិនអាចកាត់ផ្តាច់បាននៅក្នុងជីវភាពរស់នៅប្រចាំថ្ងៃ ដែលជួយឱ្យយើងគ្រប់គ្រងចាត់ចែងហិរញ្ញវត្ថុបានត្រឹមត្រូវ​ប្រកបដោយប្រសិទ្ធភាព ជាពិសេសអាចជៀសវាងការ​ជាប់បំណុលច្រើនលើសលប់។

លោកជំទាវបានបន្តថា ៖ «ការលើកកម្ពស់ចំណេះដឹងរបស់ប្រជាពលរដ្ឋនិងសាធារណជនអំពីហិរញ្ញវត្ថុនេះ គឺជាការងារដ៍ធំមួយដែលសមាគមតែងតែអនុវត្តយ៉ាងយកចិត្តទុកដាក់ និងមានចក្ខុវិស័យច្បាស់លាស់ ហើយកិច្ចការនេះមិនមែនជាកិច្ចការដែល​សមាគមអាចសម្រេចទៅបានតែម្នាក់ឯងនោះទេ​​ គឺយើងខ្ញុំត្រូវការការចូលរួមពីគ្រប់ភាគីពាក់ព័ន្ធ ជាពិសេសសាធារណៈជនខ្លួនឯងផ្ទាល់ក៍ត្រូវខិតខំស្វះស្វែងក្នុងការស្វែងយល់អំពីចំណុចសំខាន់ៗដែលប៉ះពាល់ដល់ជីវភាពរស់នៅប្រចាំថ្ងៃរបស់ខ្លួន»។

លោក អឿ សុធារ័ត្ន ប្រធាននាយកប្រតិបត្តិនៃក្រុមហ៊ុន ក្រេឌីត ប៉្យួរ៉ូ (ខេមបូឌា) ខូអិលធីឌី (CBC) បានមានប្រសាសន៍ផងដែរថា ៖ កម្មវិធីវិធីហិរញ្ញវត្ថុ ត្រូវបានរួមគ្នាបង្កើតឡើងដោយផ្តោតសំខាន់ទៅដល់សាធារណជនទូទៅក្នុងគោលបំណងសំខាន់ៗមួយចំនួនដូចជា៖

ទី១ លើកកម្ពស់ និងផ្សព្វផ្សាយអំពីចំណេះដឹងហិរញ្ញវត្ថុ និងកិច្ចការពារអតិថិជនដល់សាធារណជនដោយផ្តោតលើប្រធានបទសំខាន់ៗទាក់ទងនឹងការប្រើប្រាស់លុយ សារៈសំខាន់របស់គ្រឹះស្ថានធនាគារ និងហិរញ្ញវត្ថុ ចំណេះដឹងអំពីប្រព័ន្ធចែករំលែកព័ត៌មានឥណទាន ចំណេះដឹងផ្នែកឥណទាន ការសន្សំ និងបច្ចេកវិទ្យាហិរញ្ញវត្ថុជាដើម។

ទី២ វេទិកាចែករំលែកពីចំណេះដឹង និងបទពិសោធន៍ល្អៗ តាមរយៈកម្មវិធីជជែកពិភាក្សាឌីជីថល ដោយរួមបញ្ចូលគ្នារវាងបទពិសោធន៍របស់អតិថិជន និងអ្នកជំនាញ ជាទស្សនទានសម្រាប់សាធារណជនអាចយកទៅអនុវត្តបានក្នុងជីវភាពប្រប្រចាំថ្ងៃ។

ទី៣ ជាកិច្ចសហប្រតិបត្តិការ និងការខិតខំប្រឹងប្រែងរួមគ្នារវាងស្ថាប័នក្នុងវិស័យហិរញ្ញវត្ថុ និងប្រព័ន្ធផ្សព្វផ្សាយ ជាពិសេស មានការទទួលស្គាល់ដោយធនាគារជាតិនៃកម្ពុជា។ កិច្ចខិតខំប្រឹងប្រែងរួមគ្នានេះសរបញ្ជាក់ពីស្មារតីនៃការចូលរួម និងសាមគ្គីភាពរបស់ភាគីពាក់ព័ន្ធក្នុងការជំរុញយុទ្ធសាស្ត្រជាតិស្តីពីបរិយាបន្នហិរញ្ញវត្ថុឆ្នាំ ២០១៥-២០២៥ ដើម្បីបង្កើនលទ្ធភាពទទួលបាន និងប្រើប្រាស់សេវាកម្មហិរញ្ញវត្ថុផ្លូវការដែលមានគុណភាព និងការទទួលខុសត្រូវ។

លោក អឿ សុធារ័ត្ន បានមានប្រសាសន៍បន្តថា ៖ «កាលពីឆ្នាំមុន កម្មវិធី វិថីហិរញ្ញវត្ថុរដូវកាលទី១ មានវីដេអូចំនួន ២០ លើប្រធានបទ ស្តីពីឥណទាន ចំណេះដឹងទូទៅអំពីសារៈសំខាន់របស់គ្រឹះស្ថានធនាគារ និងហិរញ្ញវត្ថុ និងហានិភ័យនានា ដែលគួរប្រុងប្រយ័ត្នផ្នែកបច្ចេកវិទ្យាចំពោះហិរញ្ញវត្ថុជាដើម។ ជាលទ្ធផល ខ្ញុំសូមធ្វើការវាយតម្លៃខ្ពស់ចំពោះកម្មវិធីហិរញ្ញវត្ថុ រដូវកាលទី ១នេះ ដោយខ្ញុំបានសង្កេតឃើញថា សឹងតែគ្រប់គ្រឹះស្ថានធនាគារ និងហិរញ្ញវត្ថុទាំងអស់បានធ្វើការផ្សព្វផ្សាយលើបណ្តេញទំនាក់ទំនងទៅតាមពេលវេលារួមមួយដែលបានកំណត់»។

លោកបានបញ្ជាក់ថា ៖ ដោយមើលឃើញពីផលប៉ះពាល់ជាវិជ្ជមានដែលកម្មវិធីនេះបានបង្កើតឡើង ក្រុមហ៊ុន ស៊ីប៊ីស៊ី ក៏នៅតែបន្តគាំទ្រដល់កម្មវិធីនេះបន្តទៀត។ ក្នុងរដូវកាលទី២ នៃកម្មវិធី វិថីហិរញ្ញវត្ថុនេះ នឹងនៅតែបន្តផលិត ២០វីដេអូ ដោយផ្តោតលើមាតិកា ០៤ សំខាន់ ដូចជា ឥណទាន សន្តិសុខសាយប័រ គោលការណ៍ការពារអ្នកប្រើប្រាស់ និងការសន្សំ។ តាមរយៈកម្មវិធីដែលមានលក្ខណៈសាមញ្ញ និងស្របតាមការវិវឌ្ឍរបស់សង្គមមួយនេះ លោកជឿជាក់ថា វានឹងជួយឱ្យប្រជាជនកម្ពុជាយល់ដឹងពីចំណេះដឹងហិរញ្ញវត្ថុបានកាន់តែច្រើន ដែលការណ៍នេះជាបច្ច័យវិជ្ជមាននៃការរួមចំណែកដល់បរិយាបន្នហិរញ្ញវត្ថុ។

លោកស្រី ម៉ក់ រស្ម៊ី ប្រធាននាយកដ្ឋានគោលនយោបាយបទប្បញ្ញត្តិ និងវាយតម្លៃហានិភ័យនៃអគ្គនាយកដ្ឋានត្រួតពិនិត្យនៃធនាគារជាតិកម្ពុជា តំណាងដ៏ខ្ពង់ខ្ពស់របស់លោកជំទាវ ជា សេរី ទេសាភិបាលធនាគារជាតិនៃកម្ពុជា បានថ្លែងថា ៖ ដោយសារបរិយាបន្នហិរញ្ញវត្ថុ ចំណេះដឹងផ្នែកហិរញ្ញវត្ថុ និងកិច្ចគាំពារអតិថិជន ជាកត្តាចាំបាច់ដើម្បីជំរុញកំណើនសេដ្ឋកិច្ច និងសង្គមប្រកបដោយចីរភាព រាជរដ្ឋាភិបាលកម្ពុជាបានអនុម័តយុទ្ធសាស្ត្រជាតិស្តីពីបរិយាបន្នហិរញ្ញវត្ថុឆ្នាំ២០១៩-២០២៥ ក្នុងគោលដៅបង្កើនលទ្ធភាពទទួលបាន និងប្រើប្រាស់សេវាហិរញ្ញវត្ថុផ្លូវការ ពី ៥៩% ទៅ ៧០% ព្រមទាំងកាត់បន្ថយអត្រាស្ត្រីដែលមិនទាន់ទទួលបានសេវាហិរញ្ញវត្ថុ ពី ២៧% មក ១៣% ត្រឹមឆ្នាំ២០២៥។ អាទិភាពសំខាន់មួយក្នុងចំណោមអាទិភាពទាំង៦ គឺការលើកកម្ពស់សិទ្ធិ និងកិច្ចការពារអតិថិជន ព្រមទាំងការបង្កើនតម្លាភាពក្នុងវិស័យហិរញ្ញវត្ថុដែលបង្កប់នូវការលើកកម្ពស់ចំណេះដឹងផ្នែកហិរញ្ញវត្ថុ។

លោកស្រីបានបញ្ជាក់ថា ៖ «ខ្ញុំជឿជាក់យ៉ាងមុតមាំថា កម្មវិធី “វិថីហិរញ្ញវត្ថុ រដូវកាលទី២ នឹងក្លាយជាមធ្យោបាយផ្សព្វផ្សាយតាមបែបឌីជីថលដែលមានប្រសិទ្ធភាព ព្រមទាំងនឹងចូលរួមពង្រីកវិសាលភាពនៃការចែករំលែកចំណេះដឹង បទពិសោធន៍ និងសុវត្ថិភាពពាក់ព័ន្ធនឹងការប្រើប្រាស់សេវាហិរញ្ញវត្ថុទៅកាន់ប្រជាពលរដ្ឋគ្រប់វ័យ និងគ្រប់ទីកន្លែង។ ខ្ញុំ ក៏សូមជំរុញលើកទឹកចិត្តដល់គ្រប់ភាគីពាក់ព័ន្ធទាំងអស់ ពិសេស សមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជា ក្រុមហ៊ុន ក្រេឌីត ប៉្យួរ៉ូ (ខេមបូឌា) ខូអិលធីឌី (CBC) ក្រុមហ៊ុន អប្សរា មេឌា សឺវីស គ្រឹះស្ថានធនាគារ និងហិរញ្ញវត្ថុទាំងអស់បន្តផ្តួចផ្តើម និងលើកកម្ពស់ចំណេះដឹងផ្នែកហិរញ្ញវត្ថុឱ្យបានកាន់តែទូលំទូលាយ ដើម្បីជាប្រយោជន៍ដល់វិស័យធនាគារ ដល់សង្គម និងសេដ្ឋកិច្ចកម្ពុជាទាំងមូល»៕


របាយការណ៍ថ្មីៗ

មើលទាំងអស់ ➧

ព័ត៌មានទូទៅ

មើលទាំងអស់ ➧

អ្នកជំនាញណែនាំដល់កសិករឱ្យចេះប្រើឱកាសដាំដំណាំតាមរដូវកាល និងក្នុងបរិបទមានបម្រែបម្រួលអាកាសធាតុ

ព្រឹត្តិការណ៍, សេដ្ឋកិច្ច

• 19/07/2024

កសិករអាចកាត់បន្ថយការប្រើប្រាស់ទឹកបានតាមរយៈការប្រើប្រាស់ប្រព័ន្ធស្រោចស្រពតាមបច្ចេកទេសកសិកម្មទំនើប ដែលអាចជួយសន្សំទឹកបានរហូតដល់៤០ភាគរយ

ចំណេះដឹង ៖ ផ្អកដំឡូងឈើ ជាចំណីដ៏ល្អសម្រាប់ការចិញ្ចឹមជ្រូក មាន់ និងទា

ជំនួញ, ព្រឹត្តិការណ៍

• 19/07/2024

ជំនួសឱ្យការប្រើប្រាស់ចំណីសម្រេចដែលមានតម្លៃថ្លៃ គេអាចកែច្នៃមើម និងស្លឹកដំឡូងឈើ ធ្វើជាចំណីដ៏មានប្រូតេអ៊ីនខ្ពស់សម្រាប់ចិញ្ចឹមសត្វជ្រូក មាន់ និងទា

លុចសំបួរ ជាប្រទេស​តូច​​មួយ​ក្នុង​សហភាព​អឺរ៉ុប​ ប៉ុន្តែជា​ប្រទេស​មានជាងគេ​បំផុត​លើ​ពិភពលោក

ព្រឹត្តិការណ៍, អាជីវកម្មថ្មី និងនវានុវត្ត

• 19/07/2024

យោងតាម IMF បានឲ្យដឹងថា ​ផលិតផលសរុបក្នុងស្រុក (GDP) នៅប្រទេសលុចសំបួរមានជាង ១៣០ ០០០ ដុល្លារសម្រាប់មនុស្សម្នាក់

ចំណេះដឹង ៖ ស្វែងយល់ពីអាជ្ញាធរហិរញ្ញវត្ថុនៅកម្ពុជា

ព្រឹត្តិការណ៍, ហិរញ្ញវត្ថុ

• 19/07/2024

ធនាគារជាតិនៃកម្ពុជា គឺជាធនាគារកណ្ដាលតែមួយគត់របស់កម្ពុជា ដែលដើរតួនាទីជាអាជ្ញាធររូបិយវត្ថុ និងអាជ្ញាធរត្រួតពិនិត្យប្រព័ន្ធធនាគារនៅកម្ពុជា

​៦ខែ ដើមឆ្នាំ២០២៤​ ​ចិន​ឈរ​លើលំដាប់ទី​២ ក្នុងការបណ្តាក់ទុន​វិនិយោគនៅកម្ពុជា​ច្រើន​ជាង​គេ​

ព្រឹត្តិការណ៍, អចលនទ្រព្យ

• 19/07/2024

ចិននៅតែឈរ​លំដាប់ខ្ពស់​ដែលមាន​វិនិយោគិន​ដាក់ទុន​វិនិយោគ​នៅកម្ពុជា​ច្រើនជាងគេ ជាក់ស្ដែង​៦ខែ ចិនបានដាក់ទុន​ជាង ​១,៣ពាន​លានដុល្លារ​

កូរ៉េផ្តល់ជំនួយឥតសំណង៨លានដុល្លារជួយកម្ពុជា កសាងសមត្ថភាពបណ្តុះបណ្តាលធនធានមនុស្ស

ព្រឹត្តិការណ៍, សេដ្ឋកិច្ច

• 19/07/2024

ប្រទេសកូរ៉េបានផ្តល់ជំនួយឥតសំណងចំនួន៨លានដុល្លារអាមេរិកជួយកម្ពុជាលើការកសាងសមត្ថភាព និងបណ្តុះបណ្តាលធនធានមនុស្សខាង ICT និងបច្ចេកទេសវិជ្ជាជីវៈ

វិស័យធានារ៉ាប់រង ជាសូចនាករក្នុងការវាស់វែងភាពរីកចម្រើនរបស់ប្រទេសមួយ

ព្រឹត្តិការណ៍, ហិរញ្ញវត្ថុ

• 19/07/2024

នៅក្នុងប្រទេសដែលមានការអភិវឌ្ឍតិចតួច វិស័យធានារ៉ាប់រងមិនទាន់អាចមានលទ្ធភាពរីកលូតលាស់ខ្លាំងក្លានោះទេ

ធនាគារជាតិនៃកម្ពុជាគ្រោងដាក់ឱ្យប្រើប្រាស់ប្រព័ន្ធបាគង ដើម្បីសម្រួលដល់ការទូទាត់របស់ភ្ញៀវទេសចរ

ព្រឹត្តិការណ៍, ហិរញ្ញវត្ថុ

• 19/07/2024

ធនាគារជាតិនៃកម្ពុជាគ្រោងដាក់ឱ្យប្រើប្រាស់ប្រព័ន្ធបាគងសម្រាប់ភ្ញៀវទេសចរអន្តរជាតិ ដើម្បីដោះស្រាយបញ្ហាការប្រើប្រាស់រូបិយបណ្ណចាស់ៗ ទក់ រហែក

កូរ៉េ នឹងជួយបណ្តុះបណ្តាលពលករកម្ពុជាឱ្យមានជំនាញខាងកសិកម្មដើម្បីចូលរួមកសាងសេដ្ឋកិច្ចជាតិ

ព្រឹត្តិការណ៍, សេដ្ឋកិច្ច

• 19/07/2024

សាធារណរដ្ឋកូរ៉េ នឹងជួយបណ្តុះបណ្តាលពលករ/កសិករកម្ពុជាឱ្យមានជំនាញខាងកសិកម្មច្បាស់លាស់ ដើម្បីចូលរួមកសាងសេដ្ឋកិច្ច និងអភិវឌ្ឍជាតិ

តម្លៃប្រេងសកលធ្លាក់ចុះបន្តិច ខណៈដែលការនាំចូលប្រេងរបស់ចិនកើនឡើងយឺតជាងការរំពឹងទុក

ព្រឹត្តិការណ៍, សេដ្ឋកិច្ច

• 19/07/2024

តម្លៃប្រេងឆៅម៉ាក Brent ធ្លាក់ចុះត្រឹម៨៥,៦៣ ដុល្លារក្នុងមួយបារ៉ែល ខណៈដែលតម្លៃប្រេងឆៅម៉ាក WTI ធ្លាក់ចុះ នៅត្រឹម ៨២,៤៦ ដុល្លារក្នុងមួយបារ៉ែល