សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅយប់ថ្ងៃទី ៣១ ខែកក្កដា ឆ្នាំ២០២៥ សហរដ្ឋអាម៉េរិកបានសម្រេចទម្លាក់អាត្រាពន្ធនាំចូលរបស់កម្ពុជាពី ៣៦% មកនៅត្រឹម ១៩% បើគិតពីអាត្រានៃការចុះពន្ធបដិការបស់កម្ពុជា គឺមានចំនួនដល់ទៅ ៦១.២% ជាអត្រាដែលខ្ពស់ជាងគេនៅទូទាំងពិភពលោក។
ជាមួយនឹងសមិទ្ធផលដ៏ត្រចះត្រចង់នេះ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ក្រុមប្រឹក្សាអភិវឌ្ឍន៍កម្ពុជា បានឱ្យដឹងថា កម្ពុជានឹងអាចទទួលបានវិនិយោគិនបន្ថែម។ ទទួលបានវិនិយោគិនបន្ថែម ដោយសារតែអត្រាពន្ធកម្ពុជាបច្ចុប្បន្នទាបជាង ឬប្រហាក់ប្រហែលនឹងប្រទេសមួយចំនួនតូច ប៉ុន្តែបើមើលទៅលើតម្លៃនៃកម្លាំងពលកម្មក្នុងស្រុក គឺនៅទាបជាងប្រទេសជិតខាង។ មិនត្រឹមតែប៉ុណ្ណោះ ទីតាំងភូមិសាស្ត្ររបស់កម្ពុជាស្ថិតនៅចំកណ្ដាលនៃមហាតំបន់មេគង្គ ដែលជាតំបន់សរសៃឈាមពាណិជ្ជកម្មជាមួយបណ្ដាប្រទេសទន្លេមេគង្គទៀតផង។
បន្ថែមពីនេះ ច្បាប់វិនិយោគកម្ពុជាក៏បានផ្ដល់ការលើកទឹកចិត្តច្រើនដល់វិនិយោគិន រីឯហេដ្ឋារចនាសម្ព័ន្ធក្នុងស្រុកក៏មានការរីកចម្រើនច្រើន ដែលនាំឱ្យតម្លៃនៃការផលិតនៅកម្ពុជាអាចប្រកួតប្រជែងជាមួយគេបាន។ ក្រៅពីនោះ រាជរដ្ឋាភិបាលនឹងបន្តខិតខំប្រឹងប្រែងកែសម្រួលនិតិវិធីផ្សេងៗទៀត កាត់បន្ថយតម្លៃនៃការផលិតនៅកម្ពុជា។
បើតាមប្រសាសន៍របស់ឯកឧត្តម ស៊ុន ចាន់ថុល បានឱ្យដឹងថា៖
«រាជរដ្ឋាភិបាលនៅតែបន្តរៀបចំវេទិការាជរដ្ឋាភិបាល និងផ្នែកឯកជន ដើម្បីស្ដាប់បញ្ហារបស់ផ្នែកឯកជនយកទៅដោះស្រាយជូនតាមរយៈក្រុមការងារ ១៦ វេទិកាកម្ពុជា-ជប៉ុន វេទិកាកម្ពុជា-សហរដ្ឋអាមេរិក វេទិកាផ្នែកឯកជន-អ៉ឺរុប និងវេទិកាកម្ពុជា-កូរ៉េជាដើម ហើយឆាប់ៗខាងមុខនេះ ក៏នឹងមានជំនួបជាមួយ ក្រុមហ៊ុននៅក្នុងតំបន់សេដ្ឋកិច្ចពិសេសទាំងអស់ ចំនួន៣២ ដើម្បីស្ដាប់បញ្ហាដែលពួកគេមាន រៀបចំដោះស្រាយបញ្ហាពួកគេ និងជាពិសេសនាំម្ចាស់ ក្រុមហ៊ុនទាំងនោះទៅទាក់ម៉ូយទាំងអស់គ្នា»។
ឆ្លៀតក្នុងឱកាសនេះ ឯកឧត្តមឧបនាយករដ្ឋមន្ត្រី បានអំពាវនាវដល់ប្រជាពលរដ្ឋខ្មែរដែលធ្វើការចំណាកស្រុកឱ្យត្រលប់មកកម្ពុជាវិញ ដោយហេតុថា ការបណ្ដាក់ទុនរបស់វិនិយោគិន និងបន្ថែមការងារជាច្រើនកន្លែងដល់ប្រជាពលរដ្ឋក្នុងស្រុក។ ជាក់ស្ដែង គម្រោងដែលកម្ពុជាបានអនុម័តនៅឆ្នាំ២០២៤ គឺមានចំនួន ៤១៤ គម្រោង ហើយគិតមកដល់ថ្ងៃទី ២៥ ខែកក្កដា ក្រុមប្រឹក្សាអភិវឌ្ឍន៍កម្ពុជាបានអនុម័ត ៤២៦ គម្រោង ដូច្នេះ វាបានលើសឆ្នាំ២០២៤ រួចទៅហើយ។
ផ្អែកតាមទិន្នន័យនេះ ឯកឧត្តមឧបនាយករដ្ឋមន្ត្រីបានដាក់ក្ដីសង្ឃឹមថា ឆ្នាំ២០២៥នេះ កម្ពុជានឹងអនុម័តគម្រោងបានដល់ ៥០០ គម្រោង ហើយអាចបង្កើតការងារជាង ៣០ម៉ឺនកន្លែងជូនប្រជាពលរដ្ឋ។
គួររំលឹកថា កាលពីខែមេសា រដ្ឋបាលលោក ដូណាល់ ត្រាំ បានប្រកាសយកពន្ធលើទំនិញរបស់កម្ពុជារហូតដល់៤៩% ពោលខ្ពស់បំផុតក្នុងចំណោមប្រទេសនានាដែលជាប់ពន្ធរបស់អាម៉េរិក។ ប៉ុន្តែបន្ទាប់ពីការចរចា នៅថ្ងៃទី៧ ខែកក្កដា ឆ្នាំ២០២៥ សហរដ្ឋអាមេរិកបានទម្លាក់ពន្ធលើកម្ពុជាមកចំនួន ៣៦% វិញ ដោយនៅបន្តបើកឱ្យមានការចរចាបន្ថែម។ ដោយឡែក រហូតដល់ថ្ងៃទី៣១ ខែកក្កដា ឆ្នាំ២០២៥ ពោលគឺមួយថ្ងៃមុនច្បាប់ពន្ធគយចូលជាធរមាន អាម៉េរិកបានទម្លាក់អត្រាពន្ធថ្មីសម្រាប់ប្រទេសកម្ពុជាមកនៅត្រឹម ១៩%៕
Account
Security
Favourite Content