ភ្នំពេញ ៖ គម្រោងអភិវឌ្ឍន៍ជលផលក្រោយប្រមូលផល (CAPFISH-Capture) បានរៀបចំចងក្រង និងផ្សព្វផ្សាយជាសាធារណៈនូវសៀវភៅមគ្គទេសក៍ណែនាំបែបសាមញ្ញជាជំហានៗ​ដើម្បីបង្កើនប្រសិទ្ធភាពនៃការហាលសម្ងួតត្រី និងបង្គា ដោយប្រើប្រាស់បច្ចេកវិទ្យាថាមពលព្រះអាទិត្យ ពិសេសបង្កើនផលិតភាព និងភាពប្រកួតប្រជែងរបស់សហគ្រាសកែច្នៃផលិតផលជលផល ខ្នាតតូច និងមធ្យមនៅកម្ពុជា តាមរយៈការពង្រឹងការប្រើប្រាស់បច្ចេកវិទ្យាសម្ងួតដោយថាមពលព្រះអាទិត្យ។ នេះបើយោងតាមការបញ្ជាក់របស់អង្គការ UNIDO នៅថ្ងៃទី១០ ខែមករា ឆ្នាំ២០២៤នេះ។

បច្ចេកវិទ្យាហាលសម្ងួតដោយថាមពល ព្រះអាទិត្យ ឬទូសម្ងួតពន្លឺព្រះអាទិត្យ​ (SDD)​ ផ្តល់លទ្ធភាពដល់សហគ្រាសកែច្នៃជលផលក្នុងការហាលសម្ងួតត្រី និងបង្គាបានកាន់តែប្រសើរ នៅគ្រប់លក្ខខណ្ឌអាកាសធាតុ និងបរិស្ថានស្អាតល្អ កាត់បន្ថយការបាត់បង់ក្រោយប្រមូលផល និងលើកកម្ពស់គុណភាពផលិតផល។ ឈរលើ ទិដ្ឋភាព​នេះ គម្រោងបាន និងកំពុងជំរុញយ៉ាងសកម្មឱ្យសហគ្រាសកែច្នៃជលផលនៅកម្ពុជាប្រើប្រាស់បច្ចេកវិទ្យាហាលសម្ងួតដោយថាមពល ព្រះអាទិត្យឱ្យបានកាន់តែទូលំទូលាយក្នុងគោលដៅ​បង្វែរពីការហាលសម្ងួត​បែបនៅទីវាលក្រោមពន្លឺព្រះអាទិត្យមកប្រើប្រាស់បច្ចេកវិទ្យាសម្ងួតថ្មីនេះវិញ។ គម្រោងនេះ គាំទ្រថវិកាដោយសហភាពអឺរ៉ុប(EU)។

បច្ចេកវិទ្យាទូសម្ងួតពន្លឺព្រះអាទិត្យ (SDD) ជួយសម្រួលដល់សហគ្រាសកែច្នៃជលផលដើម្បីដោះស្រាយនូវបញ្ហាប្រឈមជាច្រើនដូចជាការ​ហាលស្ងួតពេក ឬស្រពាប់ពេក ហានិភ័យនៃការចម្លងរោគ លក្ខខណ្ឌអាកាសធាតុ មិនអំណោយផល​ និងការប្រើប្រាស់កម្លាំងពលកម្មច្រើន។ តាមរយៈកម្មវិធីគាំទ្រសហគ្រាសជលផល​ខ្នាតតូច និងមធ្យម (VCIS) គម្រោងផ្តល់ការគាំទ្រដល់សហគ្រាសកែច្នៃជលផល​ចំនួន ១០ ក្នុងខេត្តក្រុងចំនួន ៦ ​ជាមួយនឹងទូសម្ងួតពន្លឺព្រះអាទិត្យដើម្បីប្រើប្រាស់ក្នុងគោលដៅបង្កើនភាពប្រកួតប្រជែងជាមួយផលិតផលនាំចូល តាម រយៈការ​បង្កើនផលិត​ភាព កែលម្អការអនុវត្តអនាម័យល្អ ជួយឱ្យផលិតផលត្រីងៀត និងបង្គាក្រៀមមានគុណភាព និងសុវត្ថិភាពល្អ។

ក្នុងគោលដៅចែករំលែក និងផ្សព្វផ្សាយចំណេះដឹងលើការប្រើប្រាស់បច្ចេកវិទ្យាហាលសម្ងួតដោយថាមពល ព្រះអាទិត្យ គម្រោងបានសហការជាមួយភាគីពាក់ព័ន្ធរៀបចំផលិតសៀវភៅ​មគ្គទេសក៍ណែនាំបែបសាមញ្ញជា​ជំហានៗក្នុងការហាលសម្ងួតត្រី និងបង្គាដោយប្រើប្រាស់ទូសម្ងួតពន្លឺព្រះអាទិត្យ។ សៀវភៅមគ្គទេសន៍នេះត្រូវបានផ្តល់ជូន និងចែករំលែកជាមួយសហគ្រាសកែច្នៃជលផល  និងតួអង្គក្នុងខ្សែចង្វាក់តម្លៃជលផលក្រោយប្រមូល ផល ដើម្បីមានលទ្ធភាពប្រើប្រាស់បច្ចេកវិទ្យានេះប្រកបដោយប្រសិទ្ធភាព និងទទួលបានផលិតផលដែលមានគុណភាព និងប្រកបដោយអនាម័យខ្ពស់។

លោកស្រី សុខ ឃីម ម្ចាស់សហគ្រាសផលិតត្រីងៀត ហេង ហ៊ត (សុខ ឃីម) នៅខេត្តសៀមរាបបានបញ្ជាក់ថា ​៖ ​

«សៀវភៅមគ្គទេសក៍នេះងាយយល់ និងងាយអនុវត្តតាម។ ខ្ញុំអាចប្រើប្រាស់បច្ចេកវិទ្យាហាលសម្ងួត ដោយថាមពលព្រះអាទិត្យបានយ៉ាងងាយស្រួល​ និងមានប្រសិទ្ធភាពក្នុងការបង្កើនគុណភាពផលិតផលត្រីងៀត ដែលជាលទ្ធផលវា​បង្កើនទំនុកចិត្តរបស់អតិថិជន និងការលក់ផងដែរ​។»

បន្ថែមលើសពីនេះទៀត តាមរយៈកិច្ចសហការ និងភាពជាដៃគូជាមួយគម្រោង SWITCH to Solar គម្រោង CAPFISH-Capture រួមជាមួយតួអង្គសំខាន់ៗ​ដូចជា ក្រសួងកសិកម្ម រុក្ខាប្រមាញ់ និងនេសាទ (MAFF) មន្ទីរកសិកម្ម រុក្ខាប្រមាញ់ និងនេសាទខេត្ត (PDAFFs) ខណ្ឌរដ្ឋបាលជលផលនៅតាមបណ្តាខេត្ត គ្រឹះស្ថានមីក្រូហិរញ្ញវត្ថុ ​(MFIs) ក្រុមហ៊ុនថាមពលពន្លឺព្រះអាទិត្យ និងសហគ្រាសកែច្នៃជលផល បាន និងកំពុងខិតខំជំរុញគំនិតផ្តួចផ្តើមនេះ ធ្វើយ៉ាងណាឱ្យសហគ្រាសកែច្នៃផលផលិតផលជលផល និងផលិតផលកសិកម្មផ្សេងៗទៀតនៅកម្ពុជាទទួលយក និងប្រើប្រាស់បច្ចេកវិទ្យានេះឱ្យបានកាន់តែទូលំទូលាយក្រោមរូបភាពនៃការបណ្តាក់ទុនរួមគ្នា និងផ្សារភ្ជាប់ទំនាក់ទំនងអាជីវកម្មផងដែរ៕