ខណៈពេលកម្ពុជាកំពុងបន្តយុទ្ធនាការបោសសម្អាត​បទល្មើស​ឆបោក​តាម​ប្រព័ន្ធ​បច្ចេកវិទ្យា​ (Online Scams) យ៉ាង​ក្តៅគគុក កម្ពុជាក៏​​កំពុងបង្កើនយុទ្ធនាការបង្រ្កាបទំនិញរត់គេចពន្ធខុសច្បាប់ពីប្រទេសថៃ​យ៉ាងសកម្ម​ផងដែរ។

សម្តេចតេជោ ហ៊ុន សែន ត្រូវគេមើលឃើញថា​ បានជំរុញ និងក្រើន​រំលឹកជាបន្តបន្ទាប់ក្នុងរយៈ​ពេល​ចុង​ក្រោយ​នេះ​​ដែល​ធ្វើ​ឲ្យ​ចលនា​ប្រឆាំងនឹង​ទំនិញ​​ខុសច្បាប់​ពី​ប្រទេសថៃស្ថិត​ក្នុងរបៀបវីរៈស្រុះគ្នាមួយ​របស់​អាជ្ញាធរ​តាម​បណ្តារាជធានី ខេត្ត។

ផលិតផលថៃ​ជាង ២០០​តោន​ត្រូវបានរកឃើញ​ក្នុងខណ្ឌមួយ​ចំនួនក្នុងរាជធានីភ្នំពេញ។ ជាមួយគ្នានេះ​សម្តេចប្រមុខរដ្ឋស្តីទី ក៏បាន​ស្នើ​ឲ្យ​បណ្តាខេត្តជាប់ព្រំដែនត្រួតពិនិត្យ​ឲ្យ​បានម៉ឺងម៉ាត់​ការលួចនាំចូល​ទំនិញ​ពី​ប្រទេស​ដែល​ត្រូវ​បានមើលឃើញថា​បង្កសង្គ្រាម​ឈ្លានពាន​មក​លើ​ប្រទេស​កម្ពុជានេះ។ ជាមួយ​គ្នានេះ​សម្តេចក៏បានព្រមាន​ឲ្យ​ចាត់​វិធានការ​ផ្លូវច្បាប់​លើ​មន្ត្រី​ និងអ្នកនាំចូល​ទំនិញ​ខុសច្បាប់​ពីប្រទេសថៃ​ផងដែរ។

អ្នកជំនាញសេដ្ឋកិច្ចបានវាយតម្លៃថា ការប្រឆាំងទំនិញខុសច្បាប់ពីប្រទេសថៃ គឺជារឿងត្រឹមត្រូវសម្រាប់ការពារផលប្រយោជន៍ជាតិ។

លោក ស្រ៊ុន ពៅ ប្រធាន​សមាគមអ្នកចិញ្ចឹមសត្វកម្ពុជា មានប្រសាសន៍ថា ទំនិញខុសច្បាប់ ជាពិសេសសាច់បង្កកខុសច្បាប់ពីប្រទេសថៃ មិនត្រឹមតែបង្កផលប៉ះពាល់ធ្ងន់ធ្ងរដល់សុខភាពសាធារណៈប៉ុណ្ណោះទេ វាថែមទាំងទម្លាក់តម្លៃទីផ្សារសាច់ក្នុងស្រុក​ផងដែរ។

លោកបណ្ឌិត ​ហុង វណ្ណៈ ​អ្នកជំនាញ​សេដ្ឋកិច្ច យល់ឃើញថា វិធានការរបស់​រដ្ឋាភិបាល និងអាជ្ញាធរមានសមត្ថកិច្ច​ គឺជាការឆ្លើយតបទៅនឹងតម្រូវការរបស់ពលរដ្ឋ កសិករ និងជាការឆ្លើយតបទៅនឹងទង្វើឈ្លានពានរបស់​ប្រទេសថៃ និងព្រមទាំងជាការព្រមានដល់មន្ត្រីខិលខូចផងដែរ។

ស្របពេលដែល​អាជ្ញាធរ​ជំរុញ​ការបង្ក្រាប​ទំនិញ​ខុសច្បាប់ពីប្រទេសថៃ ប្រជាពលរដ្ឋ​បាន​ចាប់​ផ្តើម​ពហិការទំនិញ​ថៃ​ជាច្រើន​ចាប់តាំងពី​ប្រទេសនេះ​បាន​ប្រើប្រាស់កម្លាំងយោធា​ពង្វាតយកទឹកដី​កម្ពុជា​តាមតំបន់ព្រំដែន​ជាច្រើន​កន្លែងក្នុង​អំឡុងឆ្នាំ ២០២៥។ ពលរដ្ឋ និងកងទ័ពកម្ពុជាជាច្រើនបាន​ស្លាប់បាត់បង់ជីវិត។ ពលរដ្ឋរាប់ម៉ឺននាក់ទៀត បាន​បាត់បង់ទីជម្រកដោយ​សង្គ្រាម​វាតយកទឹកដីនេះ។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា យល់ឃើញថា យុទ្ធនាការបង្ក្រាប​ទំនិញ​ខុសច្បាប់​ពី​ប្រទេសថៃ ​មិនមែនជាដាក់សម្ពាធនយោបាយ ឬគាបសង្កត់ពាណិជ្ជកម្មជាមួយថៃនោះទេ តែផ្ទុយទៅវិញវាបានក្លាយជាសង្គ្រាមពាណិជ្ជកម្មដែល​ប្រទេសថៃបានធ្វើមកលើកម្ពុជាមុន បន្ទាប់ពីថៃបានបិទច្រកទ្វារព្រំដែនអន្តរជាតិជាមួយកម្ពុជាជាឯកតោភាគី។

អ្នកឧកញ៉ា លឹម ហេង ៖ ប្រសិនជាស្មារតីពហិកាយើងបានជោគជ័យ គឺមិនខុសពីយើងឈ្នះសង្គ្រាមពាណិជ្ជកម្មជាមួយថៃ  ពិតមែនថាសេដ្ឋកិច្ចថៃធំជាងយើង ការធ្វើពហិកាទំនិញថៃ នឹងធ្វើឱ្យថៃប៉ះពាល់សេដ្ឋកិច្ចមួយចំនួនផងដែរ។  

លោកបណ្ឌិត ញិល រដ្ឋា អ្នកជំនាញភូមិសាស្ត្រនយោបាយ និងសេដ្ឋកិច្ចអន្តរជាតិ យល់ស្រប​ជាមួយ​ការយល់ឃើញ​របស់អ្នកឧកញ៉ា លឹម ហេង នេះដែរ។

ប្រទេសមីយ៉ាន់ម៉ា បានធ្វើការរឹតត្បឹតចំពោះការនាំចូលទំនិញពីប្រទេសថៃ ក្រោយពីបិទព្រំដែនជាមួយថៃ ខណៈ​ប្រទេសម៉ាឡេស៊ី កាលពីដើមខែមិថុនានេះបានផ្អាកនាំចូលគ្រឿងសមុទ្រ បង្កង និងបង្គា ពីប្រទេសថៃផងដែរ។

លោកបណ្ឌិត ញិល រដ្ឋា វាយតម្លៃថា វិធានការរបស់កម្ពុជាប្រឆាំងទំនិញពីប្រទេសថៃ អាចនឹងធ្វើឱ្យតម្លៃសាច់ស្រស់ក្នុងស្រុកហក់ឡើងបន្តិចបន្តួច ប៉ុន្តែទោះបីយ៉ាងណាការឡើងថ្លៃនេះនឹងលើកទឹកចិត្តឱ្យកសិករខ្មែរបង្កើនការចិញ្ចឹមសត្វឡើងវិញ​។ នៅពេលការផ្គត់ផ្គង់ក្នុងស្រុកមានស្ថិរភាព និងគ្រប់គ្រាន់ តម្លៃទីផ្សារនឹងវិលត្រឡប់មកជាមានលំនឹងវិញ។

អ្នកជំនាញចង់ឱ្យរាជរដ្ឋាភិបាលបង្កើតអនុក្រឹត្យច្បាប់មួយដើម្បីដាក់ទោសទណ្ឌធ្ងន់ធ្ងរចំពោះបុគ្គលដែលនាំចូលសាច់បង្កកខុសច្បាប់ និងអនុវត្តច្បាប់ចំពោះមន្ត្រី​ដែល​បណ្តែតបណ្តោយឱ្យមានទំនិញថៃ​ខុសច្បាប់។ លើសពីនេះពួកគេ ស្នើឲ្យមានឆន្ទៈ​ស្នេហាជាតិគាំទ្រលើទំនិញ​ និងផលិតផលក្នុងស្រុកឲ្យកាន់តែផុលផុសខ្លាំងក្លាបន្ថែមទៀត​៕​

អត្ថបទ៖ សៅ សុខអេង