សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ កម្ពុជា និងម៉ាឡេស៊ីកំពុងជំរុញការពង្រឹងកិច្ចសហប្រតិបត្តិការធុរកិច្ច ពាណិជ្ជកម្ម និងការវិនិយោគ ខណៈទំហំពាណិជ្ជកម្មទ្វេភាគីបានកើនឡើង ៥៥.៥ ភាគរយ ដល់ប្រមាណ ១.០៧ ពាន់លានដុល្លារ ក្នុងរយៈពេល ៨ ខែដើមឆ្នាំ២០២៦។
ការជំរុញកិច្ចសហប្រតិបត្តិការនេះត្រូវបានលើកឡើងក្នុងជំនួបពិភាក្សាការងាររវាង អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា និង ឯកឧត្តមបណ្ឌិត ស្យាហារ៉ូឌីន អ៊ន (Shaharuddin Onn) ឯកអគ្គរាជទូតវិសាមញ្ញ និងពេញសមត្ថភាពនៃប្រទេសម៉ាឡេស៊ី ប្រចាំព្រះរាជាណាចក្រកម្ពុជា នៅថ្ងៃទី១៤ ខែកញ្ញា ឆ្នាំ២០២៦។
ក្នុងជំនួបនេះ ឯកឧត្តមបណ្ឌិត ស្យាហារ៉ូឌីន អ៊ន បានគូសបញ្ជាក់ពីទំនាក់ទំនងដ៏រឹងមាំ និងកិច្ចសហប្រតិបត្តិការរវាងកម្ពុជា និងម៉ាឡេស៊ី ព្រមទាំងរំលេចពីកិច្ចប្រជុំគណៈកម្មការចម្រុះសម្រាប់កិច្ចសហប្រតិបត្តិការទ្វេភាគីកម្ពុជា-ម៉ាឡេស៊ី នាពេលថ្មីៗនេះ ដែលបានផ្តោតសំខាន់លើវិស័យគន្លឹះ ជាពិសេសពាណិជ្ជកម្ម និងការវិនិយោគ។
ឯកឧត្តមបានបន្ថែមថា ក្នុងនាមជាប្រទេសសមាជិកអាស៊ានដ៏សកម្មមួយ ម៉ាឡេស៊ីបានខិតខំប្រឹងប្រែងសម្របសម្រួលកិច្ចព្រមព្រៀងសន្តិភាព និងដោះស្រាយបញ្ហាជម្លោះព្រំដែនរវាងកម្ពុជា និងថៃ ដោយឈរលើគោលការណ៍មជ្ឈភាពអាស៊ាន សំដៅធានាសន្តិភាព ស្ថិរភាពយូរអង្វែង និងបរិយាកាសអំណោយផលដល់ការអភិវឌ្ឍសេដ្ឋកិច្ចក្នុងតំបន់។
ជាកិច្ចឆ្លើយតប អ្នកឧកញ៉ា គិត ម៉េង បានស្វាគមន៍យ៉ាងកក់ក្តៅ និងថ្លែងអំណរគុណចំពោះស្មារតីសហប្រតិបត្តិការ និងចំណងមិត្តភាពដ៏យូរអង្វែងរវាងប្រទេសទាំងពីរ។
អ្នកឧកញ៉ាបានថ្លែងអំណរគុណដល់រដ្ឋាភិបាលម៉ាឡេស៊ី ក្រោមការដឹកនាំរបស់ ឯកឧត្តមនាយករដ្ឋមន្ត្រី ដាតុ ស៊េរី អាន់វ៉ា អ៊ីប្រាហ៊ីម ដែលបានខិតខំប្រឹងប្រែងសម្របសម្រួលបញ្ចប់ជម្លោះកម្ពុជា-ថៃ រហូតឈានដល់ «កិច្ចព្រមព្រៀងសន្តិភាពទីក្រុងគូឡាឡាំពួរ» កាលពីថ្ងៃទី២៦ ខែតុលា ឆ្នាំ២០២៥។
អ្នកឧកញ៉ាបានរំលឹកពីទំនាក់ទំនងការទូតជិត ៧ ទសវត្សរ៍ រវាងប្រទេសទាំងពីរ ចាប់ពីឆ្នាំ១៩៥៧ ដល់ឆ្នាំ២០២៧ ព្រមទាំងការផ្លាស់ប្តូរទស្សនកិច្ចកម្រិតខ្ពស់ ដែលបានបើកផ្លូវយ៉ាងទូលំទូលាយដល់កិច្ចសហប្រតិបត្តិការធុរកិច្ចទ្វេភាគី។
ទន្ទឹមនឹងនេះ អ្នកឧកញ៉ាបានគូសបញ្ជាក់ពីកំណើននៃទំហំពាណិជ្ជកម្មទ្វេភាគី ដែលបានលើស ១ ពាន់លានដុល្លារ កាលពីឆ្នាំ២០២៥ និងបានលើកឡើងថា កម្ពុជាមានសក្តានុពលសេដ្ឋកិច្ចខ្ពស់ និងបរិយាកាសវិនិយោគអំណោយផល ដែលអាចទាក់ទាញវិនិយោគិនបរទេសពីគ្រប់ទិសទី។
អ្នកឧកញ៉ា គិត ម៉េង ក៏បានលើកទឹកចិត្តដល់សហគមន៍ធុរកិច្ចម៉ាឡេស៊ី ឱ្យចាប់យកកាលានុវត្តភាពវិនិយោគលើវិស័យសក្តានុពលនានានៅកម្ពុជា។
បន្ថែមពីនេះ អ្នកឧកញ៉ាបានជម្រាបជូនឯកឧត្តមអគ្គរដ្ឋទូតអំពីការចុះអនុស្សរណៈយោគយល់គ្នារវាងសភាពាណិជ្ជកម្មកម្ពុជា និងអង្គភាពប្រឆាំងអំពើពុករលួយ ដែលលោកបានចាត់ទុកថា ជាការបញ្ជូនសារសំខាន់ទៅកាន់សហគមន៍ធុរកិច្ចអន្តរជាតិ ពាក់ព័ន្ធនឹងតម្លាភាពរបស់វិស័យឯកជន និងបរិយាកាសវិនិយោគនៅកម្ពុជា។
អ្នកឧកញ៉ាបានលើកឡើងថា សមិទ្ធផលសេដ្ឋកិច្ចរបស់កម្ពុជាកើតចេញពីមូលដ្ឋានគ្រឹះសន្តិភាពពេញលេញ ក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភានៃព្រះរាជាណាចក្រកម្ពុជា។ លោកក៏បានបញ្ជាក់ពីការបន្តដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលលោកបានលើកឡើងថា កំពុងជំរុញកំណើនសេដ្ឋកិច្ចជាតិ ការអភិវឌ្ឍហេដ្ឋារចនាសម្ព័ន្ធ និងការកែលម្អបរិយាកាសវិនិយោគ។
ជាកិច្ចបញ្ចប់ ភាគីទាំងពីរបានបង្ហាញការប្តេជ្ញាចិត្ត និងជំនឿជាក់ថា ទំនាក់ទំនងជិតស្និទ្ធរវាងប្រជាជន និងប្រជាជន ព្រមទាំងទស្សនវិស័យនៃវិបុលភាពរួម នឹងបន្តជាគ្រឹះដ៏រឹងមាំសម្រាប់ជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងការវិនិយោគទ្វេភាគី ឱ្យឈានទៅកាន់កម្រិត និងដំណាក់កាលថ្មីបន្ថែមទៀត។
យោងតាមទិន្នន័យរបស់អគ្គនាយកដ្ឋានគយនិងរដ្ឋាករកម្ពុជា ទំហំពាណិជ្ជកម្មទ្វេភាគី កើនឡើងប្រមាណ ១.០៧ ពាន់លានដុល្លារ ក្នុងរយៈពេល ៨ ខែដើមឆ្នាំ២០២៦ បានកើនឡើង ៥៥.៥ ភាគរយ។
ក្នុងរយៈពេល ៨ ខែដើមឆ្នាំ២០២៦ កម្ពុជាបាននាំចេញទំនិញទៅម៉ាឡេស៊ីប្រមាណ ១៥១.៧៥ លានដុល្លារ កើនឡើង ៧១.៨ ភាគរយ ធៀបនឹងរយៈពេលដូចគ្នាកាលពីឆ្នាំមុន។ ក្នុងពេលជាមួយគ្នា កម្ពុជាបាននាំចូលទំនិញពីម៉ាឡេស៊ីប្រមាណ ៩២១.១៩ លានដុល្លារ កើនឡើង ៥៣.១ ភាគរយ៕
Account
Security
Favourite Content