សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ទំហំពាណិជ្ជកម្មរវាងប្រទេសចិន និងទ្វីបអាហ្វ្រិក បានសម្រេចកំណត់ត្រាខ្ពស់បំផុតជាប្រវត្តិសាស្ត្រក្នុងរយៈពេល ៦ ខែដំបូងនៃឆ្នាំនេះ ដោយមានទំហំសរុប ១,៤១ ទ្រីលានយន់ (ប្រមាណ ១៩៦,៦ ពាន់លានដុល្លារអាមេរិក) ដែលត្រូវបានជំរុញដោយគោលនយោបាយមិនយកពន្ធគយ ០ ភាគរយលើការនាំចូលទំនិញពីបណ្តាប្រទេសអាហ្វ្រិក។ នេះបើយោងតាមការរាយការណ៍របស់ TV BRICS។
លោក Lin Jian អ្នកនាំពាក្យក្រសួងការបរទេសចិន បានថ្លែងក្នុងសន្និសីទសារព័ត៌មានថា ទំហំពាណិជ្ជកម្មរវាងចិន និងទ្វីបអាហ្វ្រិកក្នុងឆមាសទី១ ឆ្នាំនេះ បានឈានដល់កម្រិតខ្ពស់បំផុតមិនធ្លាប់មាន។ លោកបញ្ជាក់ថា កំណើននេះកើតឡើងក្រោយការអនុវត្តគោលនយោបាយលើកលែងពន្ធគយសម្រាប់ទំនិញនាំចូលពីបណ្តាប្រទេសអាហ្វ្រិក ដែលបានពង្រីកឱកាសដល់អ្នកនាំចេញនៅទូទាំងទ្វីប និងពង្រឹងទំនាក់ទំនងសេដ្ឋកិច្ចរវាងភាគីទាំងពីរ។
ក្រសួងការបរទេសចិនបានលើកឡើងថា និន្នាការកំណើននេះបង្ហាញថា ពាណិជ្ជកម្មទ្វេភាគីកំពុងបន្តដំណើរការល្អ និងមានសក្ដានុពលបង្កើតកំណត់ត្រាប្រចាំឆ្នាំថ្មីមួយទៀត បន្ទាប់ពីទីក្រុងប៉េកាំងអនុវត្តគោលនយោបាយមិនយកពន្ធគយចំពោះប្រទេសអាហ្វ្រិកដែលរក្សាទំនាក់ទំនងការទូតជាមួយចិន។
ប្រភពដដែលបញ្ជាក់ថា បន្ទាប់ពីវិធានការនេះចូលជាធរមាន ការនាំចូលពីទ្វីបអាហ្វ្រិកបានកើនឡើង ២៣,៥ ភាគរយ ក្នុងខែឧសភា និងខែមិថុនា ដល់ប្រមាណ ២៧ ពាន់លានដុល្លារអាមេរិក បើធៀបនឹងរយៈពេលដូចគ្នាកាលពីឆ្នាំមុន។
ការពង្រីកទីផ្សាររបស់ចិនបានផ្តល់អត្ថប្រយោជន៍ដល់ផលិតផលអាហ្វ្រិកជាច្រើន ជាពិសេសផលិតផលកសិកម្ម ដូចជា គ្រាប់កាហ្វេ គ្រាប់ស្វាយចន្ទី និងម្ទេសក្រៀម ដែលជួយឱ្យអ្នកផលិតកាន់តែងាយស្រួលចូលទៅកាន់ទីផ្សារចិន។ ទន្ទឹមនឹងនេះ ការនាំចេញរបស់ចិនទៅកាន់ទ្វីបអាហ្វ្រិកក៏បានគាំទ្រដល់ការអភិវឌ្ឍវិស័យឧស្សាហកម្មនៅក្នុងតំបន់នេះ តាមរយៈការផ្គត់ផ្គង់គ្រឿងចក្រ ឧបករណ៍ឧស្សាហកម្ម គ្រឿងបន្លាស់ និងវត្ថុធាតុដើមសម្រាប់វិស័យកសិកម្ម និងឧស្សាហកម្ម។
ភាគីចិនបានគូសបញ្ជាក់ថា កិច្ចសហប្រតិបត្តិការពាណិជ្ជកម្មរវាងចិន និងអាហ្វ្រិកបានផ្តល់ផលប្រយោជន៍ទៅវិញទៅមក និងបន្តពង្រីកការបើកចំហទីផ្សារ ទោះបីសេដ្ឋកិច្ចពិភពលោកកំពុងប្រឈមបញ្ហាជាច្រើនក៏ដោយ។ ជាមួយគ្នានេះ កិច្ចសហប្រតិបត្តិការរវាងភាគីទាំងពីរក៏កំពុងពង្រីកទៅកាន់វិស័យផ្សេងៗបន្ថែមទៀត ដែលរំពឹងថានឹងរួមចំណែកពង្រឹងស្ថិរភាពសេដ្ឋកិច្ច និងការអភិវឌ្ឍប្រកបដោយចីរភាពនៅក្នុងតំបន់៕
Account
Security
Favourite Content