គិតត្រឹមដំណាច់ខែមេសា ឆ្នាំ២០២៦ កំណើនកម្លាំងពលកម្មនៅតំបន់សេដ្ឋកិច្ចចំនួន ២ នៅទីក្រុងភ្នំពេញ និងខេត្តកណ្តាលមានចំនួនជិត ៦ ម៉ឺននាក់ កើនឡើងជាង ១៥ ភាគរយ បើធៀបនឹងរយៈពេលដូចគ្នាកាលពីឆ្នាំ ២០២៥។ នេះបើយោងតាមសេចក្តីប្រកាសពត៌មានក្រុមហ៊ុន រ៉ូយ៉ាល់ គ្រុប ភ្នំពេញ (RGPPSEZ) និង រ៉ូយ៉ាល់ គ្រុប ខេត្តកណ្តាល (RGKSEZ) ចេញផ្សារនៅថ្ងៃទី២២ ខែឧសភា ឆ្នាំ២០២៦ ។

អ្នកឧកញ៉ា គិត ម៉េង ប្រធានក្រុមប្រឹក្សាភិបាលនៃក្រុមហ៊ុន​​ រ៉ូយ៉ាល់ គ្រុប មានប្រសាសន៍ថា គិតត្រឹមខែមេសា ឆ្នាំ២០២៦ ចំនួនបុគ្គលិក កម្មករសរុបដែលកំពុងបម្រើការងារនៅក្នុងតំបន់សេដ្ឋកិច្ចពិសេសទាំងពីរ RGPPSEZ និង RGKSEZ កើនឡើងដល់ ៥៤,៥២៣នាក់ ដែលតំណាង​ឱ្យការកើនឡើងប្រមាណជា ១៥,៣ ភាគរយ បើធៀបនឹងចំនួនបុគ្គលិកកម្មករ ៥០,៧៤៦ នាក់ ដែលបានកត់ត្រាកាលពីខែមេសា ឆ្នាំ២០២៥ កន្លងទៅ។  

កំណើនដ៍មានស្ថិរភាពនេះ ឆ្លុះបញ្ចាំងពីទំនុកចិត្តឥតថមថយរបស់អ្នកវិនិយោគទាំងឡាយ មកលើប្រទេសកម្ពុជា និងការពង្រីកប្រតិបត្តិការនៃសហគ្រាសនានា នៅក្នុងតំបន់សេដ្ឋកិច្ចពិសេសទាំងពីរ។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា មើលឃើញថា បច្ចុប្បន្នកំណើនៃកម្លាំងពលកម្មមិនមែនមានតែតំបន់សេដ្ឋកិច្ចពិសេសនោះទេ ពោលគឺមានតម្រូវការខ្លាំងគ្រប់រោងចក្រ សហគ្រាស ទាំងក្នុងនិងក្រៅតំបន់សេដ្ឋកិច្ចពិសេសតែម្តង។ គិតត្រឹមរយៈពេល ៤ ខែដើមឆ្នាំ ២០២៦ មានគម្រោងថ្មីៗចុះបញ្ជីជាង ១ ពាន់ក្រុមហ៊ុន មានការកើនឡើងខ្លាំងធៀបនឹងឆ្នាំ ២០២៤ និងឆ្នាំ ២០២៥ កន្លងទៅ។

អ្នកឧកញ៉ា បានថ្លែងថា៖

“គម្រោងទាំងនេះនឹងទទួលយកកម្លាំងដែលមកពីថៃ និងកម្លាំងពលកម្មនៅក្នុងស្រុកបានចំនួនច្រើនថែមទៀត ដូច្នេះជាឱកាសល្អសម្រាប់ទទួលពលករយើង ដែលមកពីប្រទេសថៃ។”

អ្នកឧកញ៉ា បានបន្តថា នៅពេលអនាគត ទីផ្សារការងារនៅក្នុងប្រទេសកម្ពុជានឹងមានតម្លៃខ្ពស់ជាងពេលបច្ចុប្បន្ន ដែលមានលទ្ឋភាពស្រូបទាញកម្លាំងពលកម្ម មកពីប្រទេសថៃបានកាន់តែច្រើន ខណៈដែលពលករខ្មែរមួយចំនួនធំកំពុងបម្រើការងារនៅប្រទេសថៃនៅឡើយ។

លោក ហ្វា សាលី ប្រធានសម្ព័ន្ឋសហជីពជាតិ បានធ្វើការកត់សម្គាល់ឃើញថា ក្នុងរយៈពេល ៤ ខែ​ ដើមឆ្នាំ ២០២៦ តម្រូវការកម្លាំងពលកម្ម មិនថា នៅក្នុងតំបន់សេដ្ឋកិច្ចពិសេស ឬតាមរោងចក្រសហគ្រាសនានានោះទេ ពិតជាមានការកើនឡើងពិតប្រាកដមែននៅទូរទាំងប្រទេសកម្ពុជា។ លោកថា៖

“វា (ការកើនឡើងតម្រូវការកម្លាំងពលកម្ម) បានជួយសម្រាលនូវជីវភាពរបស់បងប្អូនកម្មករនិយោជិត ក៍ដូចជាបងប្អូនដែលទើបត្រឡប់ពីប្រទេសថៃ គឺទទួលបានការងារធ្វើកាន់តែច្រើនឡើងៗ ទន្ទឹមនឹងមានការវិនិយោគចូលមកបណ្តាក់ទុនវិនិយោគកាន់តែច្រើន។”

លោកបន្តថា មកទល់ពេលនេះមិនថារោងចក្រថ្ មីឬរោងចក្រចាស់នោះឡើយ មានតម្រូវការកម្លាំងពលកម្មយ៉ាងច្រើនសន្ឋឹកសន្ឋាប់ ខុសពីរយៈពេលដូចគ្នាកាលពីឆ្នាំមុនៗ ២០២៥ និង ២០២៤ ពិសេសតម្រូវការនៃកម្លាំងពលកម្មជំនាញតែម្តង។

ឯកឧត្តម ស៊ុន មេសា អនុរដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ មានប្រសាន៍ថា តំបន់សេដ្ឋកិច្ចនៅទូទាំងប្រទេស ក៍ដូចជានៅតំបន់ប៉ូលធំៗ មានតួនាទីសំខាន់សម្រាប់ស្រូបទាញនូវកម្លាំងពលកម្មជាច្រើន ជាពិសេសការវិលត្រឡប់ របស់របងប្អូនអតីតពលករមកពីប្រទេសថៃតែម្តង។

“គិតត្រឹមរយៈពេល ០៣ ខែ ដើមឆ្នាំ ២០២៦ កន្លងទៅនេះពលករខ្មែរជាង ៦៥ ម៉ឺននាក់ ទទួលបានការងារធ្វើហើយ ក្នុងនោះ ៣៤ ម៉ឺននាក់ មានការងារធ្វើនៅក្នុងប្រព័ន្ឋ មានន័យថាពួកគាត់បានចូលកន្លែងការងារក្នុងរោងចក្រ សហគ្រាស ពិសេសតំបន់សេដ្ឋកិច្ចពិសេសដែលមានតូនាទីសំខាន់ ជាកន្លែងទាក់ទាញកម្លាំងពលកម្មច្រើនជាងគេ។”

របាយការណ៍ក្រសួងការងារនិងបណ្តុះបណ្តាលវិជ្ជាជីវៈ បង្ហាញថា កម្ពុជាទទួលបានរោងចក្រថ្មីនៅក្នុងវិស័យកាត់ដេរចំនួន ៣០១ នៅក្នុងឆ្នាំ២០២៥ ដែលធ្វីឱ្យចំនួនរោងចក្រកើនដល់ ១៨៦៧ សហគ្រាស។ រោងចក្រមិនមែនកាត់ដេរកើនដល់ចំនួន ៤៤ ៧៨២ សហគ្រាស។ កម្មករនិយោជិតក្នុងវិស័យកាត់ដេរសរុបកើនឡើងដល់ចំនួនជាង ១លាននាក់ (១ ១៣៤ ០៩១)៕