ភ្នំពេញ ៖ ​ក្នុងរយៈពេល ៣ឆ្នាំ ចុងក្រោយនេះ ការ​ផ្គត់ផ្គង់​ខុនដូ ដែលមានតម្លៃ​សមរម្យ​នៅលើទីផ្សារ​កម្ពុជា មានកំណើនខ្ពស់​គួរឱ្យ​កត់សម្គាល់ ជាពិសេស ក្នុងរាជធានីភ្នំពេញ ខណៈការ​ផ្គត់ផ្គង់​ខុនដូដែលមានតម្លៃមធ្យម និង​តម្លៃខ្ពស់​បង្ហាញពីនិន្នាការថយចុះ ។

បើតាមរបាយការណ៍របស់​ក្រុមហ៊ុនភ្នាក់ងារអចលនទ្រព្យ​អន្តរជាតិ APS  បានឱ្យដឹងថា​ ក្នុងរយៈពេល​ ៣ឆ្នាំចុងក្រោយនេះ ការផ្គត់​ផ្គង់​ខុនដូតម្លៃសមរម្យនៅលើទីផ្សាររាជធានីភ្នំពេញ ​មានចំនួន​រហូតដល់ជាង ១៤ ១០០យូនីត ខណៈខុនដូតម្លៃមធ្យម មាន​ប្រមាណ ៤ ៤០០យូនីត និងខុនដូតម្លៃខ្ពស់មានប្រមាណ ១ ៥០០យូនីត​ ។  បើក្រឡេកទៅមើល​ ៣ឆ្នាំមុន ពោលគឺចាប់ពីឆ្នាំ២០២០ ដល់​ឆ្នាំ២០២២ ខុនដូ​តម្លៃសមរម្យ​ដែលបានចាក់​បញ្ចូលក្នុងទីផ្សារ​មានតែ ​៨ ៥០០យូនីត ខណៈខុនដូតម្លៃមធ្យម​ មានជាង ​៨ ៦០០យូនីត និង​ប្រភេទខុនដូតម្លៃខ្ពស់​មាន​ជាង ១ ៦០០យូនីត ។

 តាមរបាយការណ៍ដដែលក៏បានបង្ហាញពីតម្លៃ​ជា​មធ្យមនៃប្រភេទខុនដូនីមួយៗ ពីឆ្នាំ២០២០ ដល់ឆ្នាំ២០២៦ ដោយបែងចែកជា​ ២ ​ដំណាក់​កាល ក្នុងនោះ ដំណាក់​កាលពីឆ្នាំ២០២០ ដល់ឆ្នាំ២០២២ ខុនដូប្រភេទ​តម្លៃសមរ​ម្យ មានតម្លៃគិតជា​មធ្យមប្រមាណ ១ ៤០០ដុល្លារអាម៉េរិក​ក្នុងមួយម៉ែត្រការ៉េ ខុនដូប្រភេទតម្លៃ​មធ្យម ​មានតម្លៃជា​មធ្យម​ប្រមាណ ២ ២០០ដុល្លារអាម៉េរិក​ក្នុង​មួយម៉ែត្រការ៉េ និងខុនដូតម្លៃខ្ពស់ ជាមធ្យមមានតម្លៃក្នុងរង្វង់ ២ ៨០០ដុល្លារ​ក្នុងមួយម៉ែត្រការ៉េ ។​ ដោយឡែកចាប់ពីឆ្នាំ២០២៣ ដល់ឆ្នាំ២០២៦នេះ តម្លៃខុនដូទាំង​ ៣ប្រភេទ​ បាន​ប្រែប្រួល​ធ្លាក់ចុះ​បន្តិច​ ក្នុងនោះប្រភេទតម្លៃស​មរម្យ​ជា​មធ្យម ១ ២០០ដុល្លារ​, ប្រភេទខុនដូតម្លៃ​មធ្យមមាន​តម្លៃ ​២១០០ដុល្លារ និង​ខុនដូតម្លៃខ្ពស់​មានតម្លៃជា​មធ្យម​ប្រមាណ​ ២៧០០ដុល្លារអាម៉េរិក​ក្នុងមួយម៉ែត្រការ៉េ ។​

កញ្ញា សុខ ហេងពេជ្រ​មុនី្ន អ្នក​គ្រប់គ្រង​សេវាកម្ម​ផ្នែកលក់​រាយ ក្រុមហ៊ុន​ APS បានឱ្យដឹងថា ការផ្គត់ផ្គង់លើសតម្រូវ​ការ​ធ្វើឱ្យតម្លៃមានការ​ធ្លាក់ចុះជាងមុន ។ វាមិនមែនតែខុនដូនោះទេដែលធ្លាក់​ថ្លៃ​នៅពេលមានការផ្គត់ផ្គង់ច្រើន ហើយតម្រូវការ​នៅដដែល ឬតិចជាងមុន ជាក់ស្ដែង​ ផ្សារទំនើប​ក៏ដូច្នោះដែរ ។ ក្នុងរយៈពេលប៉ុន្មានចុងក្រោយនេះ ផ្សារ​ទំនើបជាច្រើនបានបិទទ្វារ ដោយសារតែមានការ​ប្រកួត​ប្រជែង​ខ្ពស់ ។ ​ផ្សារទំនើបថ្មីៗ ដែលទើប​បើក​ដំណើរការ​ មានយុទ្ធសាស្ត្រ​ថ្មី​បានធ្វើឱ្យផ្សារទំនើប​មុនៗ ត្រូវ​បិទទ្វារ​ ព្រោះតែធ្លាក់ចុះចំនួនអតិថិជន ។

កញ្ញា​បន្តថា​ ក្នុងពេល​តម្រូវការ​តិច​ជាងការផ្គត់ផ្គង់ នឹងធ្វើឱ្យអចលនទ្រព្យនៅសល់​ទំនេរ​ច្រើន ដូច្នេះ ក្នុងនាមជាអ្នកប្រឹក្សា និងអ្នកធ្វើការ​ក្នុងវិស័យអចលនទ្រព្យ​កញ្ញា​លើកទឹកចិត្ត​ឱ្យ​ម្ចាស់អចលនទ្រព្យគួរតែ​​ច្នៃប្រឌិត​​ឱ្យ​ទ្រព្យដែលនៅទំនេរ​នោះអាច​រកចំណូល​ត្រឡប់មកវិញ ដូចរៀបចំធ្វើជាការិយាល័យ​សម្រាប់ជួល ឬក៏ជាអាផាតមិន​ដែលមានតម្លៃទាបជាង​ទីផ្សារជាដើម ។

លោក ​ខន គង្គារ អគ្គនាយក​ក្រុមហ៊ុន​អចលនទ្រព្យ ERA Cambodia បានមានប្រសាសន៍ថា​​ ទីផ្សារ​ខុនដូ ត្រូវបែង​ចែក​ទៅតាមប្រភេទនៃខុនដូ ជាក់ស្ដែង ​ខុនដូតម្លៃសមរម្យ​ផ្ដោតលើអតិថិជនជាជនជាតិខ្មែរ ហើយសម្រាប់ខុនដូតម្លៃមធ្យមគឺមានទាំងជនបរទេស និងជនជាតិខ្មែរ ដោយឡែកសម្រាប់ខុនដូតម្លៃខ្ពស់វិញភាគច្រើន​ផ្ដោតលើ​អតិថិជនជា​ជនបរទេស ។​

លោក ប៉ូ អ៊ាវគង់ អគ្គនាយ​ក​ក្រុមហ៊ុនអចលនទ្រព្យ​ Advance បានមានប្រសាសន៍ថា ក្នុងរយៈប៉ុន្មានឆ្នាំមុន​ វិនិយោគិន​ចិន​ បានចូលមក​វិនិយោគ​នៅក្នុងប្រទេស​កម្ពុជា​ច្រើន ហើយគម្រោង​របស់ពួកគេ​ជា​គម្រោងធំៗ ដោយគម្រោងមួយៗ មានច្រើនអគារ ។ ប៉ុន្តែ​សម្រាប់ជនបរទេស​ផ្សេងៗទៀត ដូចជា​កូរ៉េ​ខាង​ត្បូងចូលមក​កម្ពុជា​​មានការធ្លាក់ចុះ ដូច្នេះការ​វិនិយោគរបស់ចិន​ មិនអាច​ផ្គត់ផ្គង់បានអស់សម្រាប់​តម្រូវការទីផ្សារ​ទេ ។ ម្យ៉ាងវិញទៀត ពលរដ្ឋខ្មែរ​ក្នុងស្រុ​កក៏មិនទាន់មានតម្រូវការ​ទៅលើ​ខុនដូ​ប៉ុន្មានដែរ ដូច្នេះហើយទើប​មើលឃើញថា​តម្រូវការ​ខុនដូ​មានតិច​ជាង​តម្រូវការ​ ។

គួររម្លឹកថា ជាការ​កត់សម្គាល់​ក្នុងរយៈពេលប៉ុន្មានឆ្នាំចុងក្រោយនេះ អ្នកអភិវឌ្ឍអចលនទ្រព្យ​មួយចំនួន​បានងាកមក​អភិវឌ្ឍខុនដូតម្លៃសមរម្យ ក្នុងពេលរាជរដ្ឋាភិបាល បានលើកទឹកចិត្តដល់អ្នកអភិវឌ្ឍ​លំនៅឋានតម្លៃសមរម្យ​នៅកម្ពុជា ដើម្បីរួម​ចំណែក​ដល់​ការដោះស្រាយ​បញ្ហា​លំនៅឋានរបស់ប្រជាពលរដ្ឋ ។​ ក្នុងនោះដែរ ក្រុមហ៊ុនបុរីពិភពថ្មីរបស់​អ្នកឧកញ៉ា​ហុងពីវ បាននិងកំពុងចូលរួមចំណែក​ក្នុងការអភិវឌ្ឍខុនដូតម្លៃសមរម្យ​នៅតាម​ជាយ​រាជធានីភ្នំពេញ និងមានការគាំទ្រពីសំណាក់រដ្ឋមន្ត្រីក្រសួងរៀបចំដែនដី នគរូបនីយកម្ម​និងសំណង់​ផងដែរ ។

មន្ត្រីជាន់ខ្ពស់​ក្រសួង​រៀបចំដែនដី​ នគរូបនីយកម្ម​ និងសំណង់ ​ឯកឧត្តម សេង ឡូត បាន​លើកឡើងថា​ រាល់ការ​វិនិយោគលើ​លំនៅឋានតម្លៃសមរ​ម្យនៅកម្ពុជា នឹងទទួលបានការលើកទឹកចិត្តពីរាជរដ្ឋាភិបាល​ ដោយក្រសួងរៀបចំដែនដី នគរូបនីយកម្ម និងសំណង់ នឹងជួយ​សម្រួល​បែប​បទ និង​ការស្នើ​សុំ​អភិវឌ្ឍន៍លំនៅឋានតម្លៃសម​រម្យ​ ពន្លឿន​នីតិវិធីដើម្បីធ្វើយ៉ាងណាឱ្យការ​វិនិយោគរបស់វិនិយោគិន​លឿន​ រហ័ស​ ។ ទន្ទឹមនេះដែរ រដ្ឋ​នឹង​ជួយតភ្ជាប់ហេដ្ឋារចនាសម្ព័ន្ធ ដូចជា ​ផ្លូវ ភ្លើង និងទឹក​ស្អាត ចូលទៅកាន់គម្រោងនោះ​ផងដែរ ៕