ព្រះសីហនុ ៖ ឯកឧត្តម ឧបនាយករដ្ឋមន្ត្រី សាយ សំអាល់ បានមានប្រសាសន៍ថា ការវិនិយោគ​លើអគារពហុមុខងារ និងសណ្ឋាគារប្រណិតលើកោះរ៉ុង ខេត្តព្រះសីហនុ ក្រៅពីចូលរួមកិច្ចអភិវឌ្ឍ៍ជាមួយរាជរដ្ឋាភិបាល ថែមទាំងអាចជួយទាក់ទាញកំណើនទេសចរបានកាន់តែច្រើន និងបានបង្កើតការងារ ផ្តល់ប្រាក់ចំណូលដល់ប្រជាពលរដ្ឋនៅក្នុងតំបន់ផងដែរ។ នេះជាការលើកឡើងរបស់ឯកឧត្តម នៅក្នុង​ពិធីបញ្ចុះបឋម​សិលា​សាងសង់​គម្រោងអគារពហុមុខងារ និងសណ្ឋាគារប្រណិត Yves Palace របស់ក្រុមហ៊ុន​ M B I S Development Co.,Ltd ស្ថិតនៅកោះរ៉ុង កាលពីព្រឹកថ្ងៃទី២៧ ខែតុលា ឆ្នាំ២០២៥ នេះ។

ឯកឧត្តម ​សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួង​រៀបចំដែនដី នគរូបនីយកម្ម​ និងសំណង់ បានមានប្រសាសន៍ថា ការវិនិយោគ​លើអគារពហុមុខងារ និងសណ្ឋាគារប្រណិត Yves Palace កោះរ៉ុង គឺជាការវិនិយោគដ៏ត្រឹមត្រូវបំផុត ដើម្បីស្វាគមន៍ភ្ញៀវទេសចរដែលមកសម្រាកលំហែកំសាន្តនៅកោះរ៉ុង, ជួយទាក់ទាញទេសចរបានកាន់តែច្រើន ក៏ដូចជាបង្កើតការងារ និងប្រាក់ចំណូលដល់ប្រជាពលរដ្ឋនៅកោះរ៉ុង និងបានចាត់ទុកថា នេះមិនត្រឹមតែជាអគារពហុមុខងារ និងសណ្ឋាគារប្រណិតប៉ុណ្ណោះទេ ប៉ុន្តែនេះជានិមិត្តរូបមួយនៃការកកើតជីវិតថ្មីមួយទៀតសម្រាប់អ្នកកោះរ៉ុង, ជាសសរទ្រូង និងឆ្អឹងខ្នងសេដ្ឋកិច្ចសម្រាប់អ្នកកោះរ៉ុងផងដែរ ។

ឯកឧត្តមឧបនាយករដ្ឋមន្ត្រី សាយ សំអាល់ បានបណ្ដុះគំនិតដល់អាជ្ញាធរ និងប្រជាពលរដ្ឋនៅកោះរ៉ុង ត្រូវយល់ឱ្យបានច្បាស់អំពីប្រភេទទេសចរណ៍នៅកោះរ៉ុង, ត្រូវយល់ឱ្យបានច្បាស់ពីគោល​បំណ​ង​​របស់អ្នកទេសចរដែលមកទីនេះដែលត្រូវការការលំហែបែបស្ងប់ស្ងាត់ជាមួយធម្មជាតិស្រស់ត្រកាល ស្រូបយកខ្យល់អាកាសបរិសុទ្ធពីសមុទ្រ ហើយទាំងនេះគឺជាអ្វីដែលអ្ន​កកោះ​រ៉ុងទាំងអស់គ្នាត្រូវយល់ដឹង និងគិតគូរធ្វើយ៉ាងណាដើម្បីទាក់ទាញទេសចរឱ្យមកកាន់ទីនេះបានកាន់តែច្រើនថែមទៀត តាមរយៈសក្តានុពលទេសចរណ៍ដ៏សំបូរបែបដែលមានស្រាប់នៅកោះរ៉ុង។

នាឱកាសនោះ ឯកឧត្តមឧបនាយករដ្ឋមន្ត្រី ក៏បានគូសបញ្ជាក់ដែរថា ការវិនិយោគក្នុងការសាងសង់អគារពហុមុខងារ និងសណ្ឋាគារប្រណីតនេះបានផ្ដល់ផលប្រយោជន៍ដោយផ្ទាល់ដល់អ្នកកោះរ៉ុងយ៉ាងពិតប្រាកដ ដូច្នេះ ឯកឧត្តម បានណែនាំដល់រដ្ឋបាលក្រុងកោះរ៉ុងធ្វើយ៉ាងណាខិតខំកៀរគរអ្នកវិនិយោគឱ្យមកបណ្ដាក់ទុនវិនិយោគនៅលើកោះរ៉ុងឱ្យបានច្រើនថែមទៀត, រីឯកងកម្លាំងប្រដាប់អាវុធទាំងបីប្រភេទត្រូវប្តេជ្ញាធានាការពារសុខសុវត្ថិភាពសណ្ដាប់ធ្នាប់សាធារណៈជូនដល់ភ្ញៀវទេសចរ ក៏ដូចជាប្រជាពលរដ្ឋនៅលើកោះរ៉ុងនេះឱ្យបានល្អប្រសើរ ដើម្បីឱ្យប្រជាពលរដ្ឋ ក៏ដូចជាភ្ញៀវទេសចរជាតិ- អន្តរជាតិមានភាពកក់ក្តៅ រីករាយក្នុងការធ្វើដំណើរកំសាន្តនៅទីនេះប្រកបដោយសុវត្ថិភាព, និងត្រូវរៀបចំកសាងហេដ្ឋារចនាសម្ព័ន្ធនៅលើកោះរ៉ុងបន្តទៀត ក្នុងនោះមានការកសាងផ្លូវ ដាក់អំពូលភ្លើង និងបំពាក់កាមេរ៉ាសុវត្ថិភាពជាដើម។

ជាមួយនេះ ឯកឧត្តមឧបនាយករដ្ឋមន្ត្រី នឹងខិតខំកៀរគរថវិកាដើម្បីបំពាក់ប្រព័ន្ធចម្រោះទឹកស្អាតនៅទីនេះ, រៀបចំវិនិយោគទីតាំងស្តុកទឹកស្អាតឱ្យបានត្រឹមត្រូវ, ការគ្រប់គ្រងសំរាមឱ្យបានល្អ, រៀបចំសហគមន៍ដាំបន្លែ ចិញ្ចឹមសត្វ ដើម្បីផ្គត់ផ្គង់សំរាប់អ្នកកោះរ៉ុងផង និងភ្ញៀវទេសចរផងឱ្យបានគ្រប់គ្រាន់ ដែលទាំងនេះសុទ្ធសឹងតែផ្ដល់នូវឧត្តមប្រយោជន៍ដល់ប្រជាពលរដ្ឋនៅកោះរ៉ុង និងការអភិវឌ្ឍន៍កោះនេះឱ្យក្លាយជាគោលដៅទេសចរណ៍មួយដ៏មានប្រជាប្រិយភាព និងកាន់តែមានភាពទាក់ទាញ ។

សូមជម្រាបជូនថា កោះរ៉ុង នៅតែជាកន្លែងទាក់ទាញសម្រាប់ការវិនិយោគផ្ទាល់ពីបរទេស ជាពិសេស លើវិស័យទេសចរណ៍។ ក្នុងពេលជាមួយគ្នានោះដែរ ប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ ក៏បានណែនាំឱ្យអាជ្ញាធរយកចិត្តទុកដាក់លើបញ្ហាសន្តិសុខ និងសុវត្ថិភាពដល់ភ្ញៀវទេសចរ អភិវឌ្ឍន៍ហេដ្ឋារចនាសម្ព័ន្ធចាំបាច់ដែលរួមមាន ផ្លូវ ទឹក ភ្លើង អ៊ីនធឺណែត ការបង្កបង្កើនផលបន្លែ សាច់មាន់ ទា ស្ថានីយ៍ស្តុកម្ហូបអាហារសម្រាប់ការប្រើប្រាស់ប្រចាំថ្ងៃលើកោះផ្ទាល់ ការគ្រប់គ្រងសំរាម ការសម្អាតកោះជារួម និងការគ្រប់គ្រងទឹកកខ្វក់ជាដើម ដែលទាំងអស់នេះសំដៅធានានិរន្តភាពនៃខឿនសេដ្ឋកិច្ចរបស់កោះ និងលើកស្ទួយជីវភាពរបស់អ្នកកោះរ៉ុងជារួម។

ទន្ទឹមនឹងគ្នានោះ ក៏ត្រូវផ្លាស់ប្តូរផ្នត់គំនិតមកទទួលយកថា កោះរ៉ុង ក៏ជាសហគមន៍ប្រជាជាតិមួយ ហើយអ្នកកោះរ៉ុងខ្លួនឯងមានវប្បធម៌ អរិយធម៌ល្អជាមួយអ្នកភូមិផងរបងតែមួយ ចេះយកអាសារគ្នា ជាសហគមន៍ចម្រុះប្រជាជាតិនៅលើទឹកដីកម្ពុជា ដែលនេះហើយជាតារារះនាទិសនិរតី ៕