សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កម្ពុជា ពោរពេញដោយសក្តានុពលសម្រាប់វិនិយោគលើវិស័យជាច្រើនឥតគណនា ដោយហេតុថា កម្ពុជារក្សាបាននូវសុខសន្តិភាព ស្ថិរភាពនយោបាយ ជាពិសេស ស្ថិរភាពកំណើនសេដ្ឋកិច្ចក្នុងរង្វង់ ៧ភាគរយក្នុងរយៈពេលប្រមាណ១ទសវត្ស៍ចុងក្រោយ ជាមួយនឹងការសម្រេចបាននូវវឌ្ឍនភាពលើគ្រប់វិស័យ ។
យោងតាមសេចក្ដីប្រកាសព័ត៌មានមួយដែលផ្សព្វផ្សាយដោយបណ្ដាញសង្គមផ្លូវការរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបង្ហាញថា ទំហំផលិតផលក្នុងស្រុកសរុបរបស់កម្ពុជា (GDP) បានកើនឡើង ១០ដង ពី ៣,១១ពាន់លានដុល្លារក្នុងឆ្នាំ១៩៩៨ ដល់ ២៩,៦០ពាន់លានដុល្លារនៅឆ្នាំ២០២២។ ដោយឡែក សន្ទុះនៃការវិនិយោគដោយផ្ទាល់ពីបរទេស (FDI) បានកើនឡើង ១៥ដងក្នុងចន្លោះឆ្នាំ២០០៧-២០២២ ជាក់ស្ដែងយោងតាមតារាង FDI Standouts Watchlist 2024, កម្ពុជាបានឈរលើលេខរៀងទី១ នៃប្រទេសដែលមានសន្ទុះការវិនិយោគដោយផ្ទាល់ពីបរទេស (FDI) ដោយទទួលបានពិន្ទុ Index Score ៩៦,១១ លើ១០០ ។
លើសពីនេះ កម្ពុជាសម្បូរពោរពេញដោយកម្លាំងពលកម្មដែលមានវ័យក្មេងប្រកបដោយសក្តានុពល និងជាកាតាលីករដ៏សំខាន់នៅក្នុងចរន្តសេដ្ឋកិច្ចជាតិ។ កម្ពុជាក៏បានធ្វើទំនើបកម្មហេដ្ឋារចនសម្ព័ន្ធរូបវន្តបានយ៉ាងល្អប្រសើរ រាប់ចាប់ពីអាកាសយានដ្ឋានអន្តរជាតិ កំពង់ផែទឹកជ្រៅ ផ្លូវគោក ផ្លូវទឹក ក៏ដូចជាប្រព័ន្ធឡូជីស្ទីក បូកផ្សំនឹងទីតាំងដ៏មានសក្តានុពលដែលផ្តល់នូវកាលានុវត្តភាពប្លែកពីគេសម្រាប់វិនិយោគ។ ក្នុងយុទ្ធសាស្ត្របញ្ចកោណដែលបានដាក់ចេញដោយរាជរដ្ឋាភិបាលនីតិកាលទី៧ ក៏បានបន្ថែមនូវមុំយុទ្ធសាស្ត្រថ្មីបន្ថែមលើបច្ចេកវិទ្យា ដែលកំពុងតែសាយភាយលូតលាស់ពេញស្រទាប់យុវជនវ័យក្មេងរបស់កម្ពុជា ដោយអភិវឌ្ឍបាននូវប្រព័ន្ធឌីជីថលសម្រាប់ប្រើប្រាស់បានដ៏ល្អប្រសើរ ។
នៅក្នុងជំនួបជាមួយសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ឯកឧត្តម Dato Mutang Tagal ប្រធានព្រឹទ្ធសភាម៉ាឡេស៊ី បានស្នើសុំសម្ដេចធិបតីនាយករដ្ឋមន្ត្រីកម្ពុជា ចែករំលែកពីទស្សនទាន និងបទពិសោធន៍គន្លឹះដែលធ្វើឱ្យកម្ពុជាសម្រេចបាននូវកំណើនសេដ្ឋកិច្ចល្អប្រសើរក្នុងរយៈពេលជាច្រើនទសវត្សរ៍កន្លងមកនេះ ។
សម្ដេចធិបតី ហ៊ុន ម៉ាណែត បានមានប្រសាសន៍ឆ្លើយតបថា គន្លឹះចម្បងគឺកត្តាសុខសន្តិភាព និងស្ថិរភាពនយោបាយ ដែលត្រូវតែធានា និងរក្សាឱ្យបានប្រកបដោយចីរភាព និងជាមូលដ្ឋានគ្រឹះមិនអាចខ្វះបាន សម្រាប់ការអភិវឌ្ឍលើគ្រប់វិស័យ ហើយសម្រាប់បរិបទកម្ពុជា សន្ដិភាពពេញលេញ និងការឯកភាពជាតិ ឯកភាពទឹកដី គឺបានមកពីការដាក់ចេញនូវនយោបាយ ឈ្នះ ឈ្នះ របស់សម្តេចតេជោ ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា ដែលបានបញ្ចប់សង្គ្រាម បែកបាក់ជាតិ ក្នុងរយៈពេល ៥សតវត្សរ៍ និងជួយឱ្យកម្ពុជារក្សាបាននូវកំណើនសេដ្ឋកិច្ច និងការអភិវឌ្ឍរបស់ខ្លួន ។
គួរបញ្ជាក់ថា កម្ពុជាបានដាក់ផែនការមេក្នុងការអភិវឌ្ឍហេដ្ឋារចនាសម្ព័ន្ធរហូតដល់១៧៤គម្រោង គិតត្រឹមឆ្នាំ២០៣៣ខាងមុខ ដូច្នេះកម្ពុជាត្រូវការដៃគូវិនិយោគលើគម្រោងទាំងនោះ ដើម្បីជំរុញកំណើនសេដ្ឋកិច្ចរបស់ខ្លួនបន្ថែម និងជាឱកាសសម្រាប់វិនិយោគិនបរទេសទាំងឡាយណាដែលចង់មកបណ្ដាក់ទុនវិនិយោគក្នុងប្រទេសកម្ពុជាក្នុងអំឡុង១០ឆ្នាំ ខាងមុខនេះ ៕
Account
Security
Favourite Content